ބޮލީވުޑް އެކްޓަރު އަކްޝޭ ކުމާރުގެ މިލްކިއްޔާތުގައި ޕްރައިވެޓް ޖެޓެއް އޮންނަ ކަމަށް ބުނެ، ބޮލީވުޑްގެ ޚަބަރުތަށް ގެނެސްދޭ އޮންލައިން ނޫހެއް ކަމަށްވާ "ބޮލީވުޑްލައިފް"އިން ޚަބަރު ފެތުރުމުން އޭނާ އެކަން ދޮގުކޮށްފިއެވެ.
އަކްޝޭ އިއްޔެ ކުރި ޓްވީޓެއްގައި ބުނެފައިވަނީ އޭނާއާ ބެހޭ ގޮތުން ދޮގު ވާހަކަތައް ފަތުރާނަމަ އޭނާ މަޑުން ނުހުންނާނެ ކަމަށެވެ. އަކްޝޭއަކީ އަބަދުވެސް އޭނާއާ ބެހޭ ގޮތުން ދެކެވޭ ވާހަކަތަކުގެ ތެދު ދޮގު ފޭނުންނަށް ހާމަކުރާ ފަންނާނެކެވެ. އެގޮތުން އޭނާގެ އަތުގައި އޮންނަނީ 260 ކްރޯޑް ރުޕީސްގެ އަގުބޮޑު ޖެޓެއް ކަމަށް ބުނެ ފަތުރަމުންދާ ޚަބަރަކީ ކަނޑައެޅިގެން ދޮގެއް ކަމަށް އޭނާ ކުރި ޓްވީޓުގައި ވަނީ ހާމަކޮށްފައެވެ.
Liar, Liar…pants on fire! Heard this in childhood? Well, some people have clearly not grown up, and I’m just not in a mood to let them get away with it. Write baseless lies about me, and I’ll call it out. Here, a Pants on Fire (POF) gem for you. ?#POFbyAK pic.twitter.com/TMIEhdV3f6
— Akshay Kumar (@akshaykumar) October 16, 2022
އޭނާ ކުރި ޓްވީޓުގެ ކޮމެންޓް ސެކްޝަނުގައި ބައެއް ފޭނުން ދަނީ ޝުޢޫރު ފާޅުކުރަމުންނެވެ. އެއްބަޔަކު އޭނާގެ ކުރިއަށް އޮތް ފިލްމަށް ކާމިޔާބަށް އެދެމުން ދާއިރު އެކަކު ކުރި ކޮމެންޓެއްގައި ވަނީ "ގިނަ ދުވަސްތަކަކަށްފަހު އަކްޝޭ ރުޅިވެރި މޫޑެއްގައި ހުރި ތަން ފެނުމުން 'ފައްކާ' ވެއްޖެ" ކަމެވެ.
އުމުރުން 55 އަހަރުގެ އަކްޝޭ ކުމާރު ދެން އެންމެ އަވަހަށް ބެލުންތެރިންނަށް ފެންނާނީ މިމަހުގެ 25 ވަނަ ދުވަހު ރިލީޒްކުރަން ހަމަޖެހިފައިވާ ފިލްމު "ރާމް ސޭޓޫ"އިންނެވެ. އަބީޝޭކް ޝަރުމާ ޑައިރެކްޓްކޮށް ގެނެސްދޭ މިފިލްމުގައި އަކްޝޭގެ އިތުރުން ޖެކްލީން ފެނާންޑޭޒް އާއި ސަތިޔާ ދޭވް ވެސް މައިގަނޑު ރޯލުތަކުން ފެނިގެންދާނެއެވެ.