ކަންފަތުގެ މެދު ބަޔާއި އެތެރެ ބައި ވަކިކޮށްދެނީ ތުނި ދުލިފަށެއްކަހަލަ މަސްކޮޅަކުންނެވެ. އޭގައި ވަނީ ތުނި ހަތާރު ތަކެކެވެ. އެއަށް ޓިމްޕެނިކް މެންބްރޭން އޭ ނުވަތަ އިއާރ ޑްރަމް އޭ ކިޔައެވެ. ދިވެހިން ކިޔަނީ ކަންފަތު ތޫރިއެވެ. ނުވަތަ ތޫރިއެވެ. ކަންފަތުގެ ތޫރި އަކީ ފަޅައިގެންދާ އެއްޗެކެވެ. އަޑު ބާރު ވުމުން، ހީވަނީ ކަންފަތުގެ ތޫރި ފަޅައިގެން ގޮސްދާނެ ހެއްނޭ ބުނާ އަޑު އާންމުކޮށް އަހަމުއެވެ. އާދޭހެވެ! އަޑު ބާރުވުމުން ކަންފަތުގެ ތޫރި ފަޅައިގެން ހިނގައިދާނެއެވެ. މި ލިޔުމުގައި ބަލާލާނީ ކަންފަތުގެ ތޫރި ފަޅައިގެން ދިއުމާ ބެހޭ ގޮތުންނެވެ.
ކަންފަތަށް އަދި ތަދެއް ވުމަކީ ނުވަތަ ލޭ އައުމަކީ ތޫރި ފަޅައިގެން ދިއުމެއް ނޫނެވެ. އެނޫން ސަބަބުތައްވެސް ހުރެދާނެއެވެ. ނަމަވެސް އެއީ ލަސްނުކޮށް ސިއްހީ އެހީތެރިއެއްގެ ލަފާ ހޯދަން ވާނެއެވެ. ކަންފަތުގެ ތޫރި ފަޅައިގެން ގޮސްފިނަމަ ފެނިދާނޭ އަލާމާތްތަކުގެ ތެރޭގައި ކުއްލި ކުއްލި އަށް ނަގާ ރިހުންގަނޑެއްގެ ތޫނު އިހުސާސްތަކެއް ކުރެވޭނެއެވެ. ކަންފަތުން ފާދިޔަ ކަހަލަ ދިޔަވަރަކާއި އެކު ލޭ އަތުވެދާނެއެވެ. އެ ކަންފަތަކުން އަޑު ނީވިދާނެއެވެ. ނުވަތަ ތުރުތުރެއް ކަހަލަ އަޑެއް އަބަދުމެ އިވިފާ ހުރެދާނެއެވެ. ބޮލަށް އެނބުރުން އެރުމާ ހޮޑުލެވުމަކީވެސް ދިމައިވެދާނޭ ކަމެކެވެ. މިއީ ތޫރި ފަޅައިގެން ދިއުމުން ދިމައިވާ އާންމު އަލާމާތްތަކެވެ.
ތޫރި ފަޅައިގެން ހިނގައިދާނޭ ބައެއް ކަންތައްތަކުގެ ތެރެއިން ކަންފަތުގެ އިންފެކްޝަންތައް ހިމެނެއެވެ. އެހެންކަމުން ކަންފަތުގެ އިންފެކްޝަންތަކުގައި ފަރުވާތެރިވެ، ފަރުވާ ހޯދަން ވާނެއެވެ. ކަންފަތުގެ އިންފެކްޝަނުގެ އިތުރުން މާހައުލުގެ ވައިގެ ޕުރެސަރަކީވެސް ކަންފަތު ތޫރި ފަޅައިގެން ހިނގައިދާނޭ ކަމެކެވެ. އާންމުކޮށް މާހައުލުގެ ޕުރެސަރު ތަފާތު ވަނީ އުސްތަންތަނަށް ނުވަތަ މައްޗަށް ނުވަތަ މަތިންދާ ބޯއްޓުފަދަ އުޅަނދުތަކުގައި ދަތުރުކުރާއިރުގައެވެ. އަދި ކަނޑުގެ އަޑިއަށް ފީނާ ހަދާއިރުވެސް މި ޕުރެސަރު ތަފާތުވެދެއެވެ. އެ ޕުރެސަރު މަތިވުމުން، ތޫރިއަށް ކުރާ ބާރު ބޮޑުވެ ތޫރި ފަޅައިގެން ދިއުމުގެ ފުރުސަތު ފަހިވެއެވެ.
އިވޭ ބާރު އަޑުތަކަކީވެސް ތޫރި ފަޅައިގެން ހިނގައިދާނޭ ކަމެކެވެ. އެހެނީ އަހަރެމެންނަށް އިވޭ އަޑުތައް އޭގެ މަފްހޫމާއި އެކު ދެނެގަނެވެނީ ތޫރިއަށް އަންނަ ކުދި ކުދި ހަރަކާތްތަކުންނެވެ. އަޑާއި އެކު އުފެދޭ އަޑުގެ ރާޅުތައް ކަންފަތައް އެޅި ތޫރީގައި ޖެހެއެވެ. އެހެންކަމުން ބާރު ނުވަތަ ގަދަ އަޑުތަކުގެ ސަބަބުން އުފެދޭ އަޑުގެ ރާޅުތައް ގަދަވުމުން ތޫރީގައި ޖެހި ތޫރިއަށް އަންނަ ހަރަކާތްތައް ގަދަވެ، އެއަށް ކެތްނުވެގެން ތޫރި ފަޅައިގެން ދެއެވެ.
ކަންފަތުގެ ތޫރި ފަޅައިގެން ހިނގައިދާނޭ އަނެއް ސަބަބަކީ ކަންފަތަށް ލިބޭ އަނިޔާތަކެވެ. ކަންފަތުގައި ބާރަށް އެއްޗަކުން ޖެހުމާއި ކަންފަތަށް އެއްޗެއް ވަނުން ނުވަތަ އެޅުން ފަދަ އެކި އެކި އަނިޔާތައް ހިމެނެއެވެ.
މިއީ ލަސްނުކޮށް ފަރުވާ ހޯދަން ޖެހޭނޭ ކަމެކެވެ. އާންމު އުސޫލަކީ އޭގެ ޠަބީއަތުގައި އެފަދައިން ފަޅައިގެންދާ ތަންތަން އަމިއްލައަށް ރަނގަޅުވެއެވެ. ނަމަވެސް ރަނގަޅުނުވެ ގިނަ ދުވަހު ހުންނަ ކަމުގައި ވަނީނަމަ، އެތަނުގައި ސިސްޓެއް އުފެދި އެ ސިސްޓު ބޮޑުވެ ކެންސަރަށް ބަދަލު ވުމުގެ ފުރުސަތު އޮވެއެވެ. އަދި ޖަރާސީމު އަށަގަނެ އެ ޖަރާސީމުގެ އަސަރު ބޮލުތެރެއަށް ކޮށް ސިކުނޑިއަށް އޭގެ އަސަރު ކުރުމުގެ ފުރުސަތުވެސް އޮވެއެވެ. ހަމަ އެއާއި އެކު ރަނގަޅުނުވެ ނުވަތަ ތޫރި ނުބެދި ހުންނަ ކަމުގައި ވަނީނަމަ، އަޑު އިވުމުން މުޅިން މީހާ މަހުރޫމު ވުމުގެ ބިރަކީވެސް އޮތް ބިރެކެވެ. އެހެންކަމުން ކަންފަތުގެ ތޫރި ފަޅައިގެން ހިނގައިދާނޭ ކަމެއް މެދުވެރިވެ، އެފަދަ އަލާމާތްތަކެއް ފެންނަ ނަމަ ލަސްނުކޮށް ސިއްހީ ފާރުވާ ހޯދުން ވަރަށްވެސް މުހިންމެވެ. ކަންފަތުން ލިއްބައިދޭ އަޑު އެހުމުގެ ހިއްސަކީ ވަރަށްވެސް މުހިންމު އަސާސީ ހިއްސެކެވެ. ވީއިރު އެ ހިއްސާއި މެދު ފަރުވާތެރިވުމަކީ ކޮންމެ މީހަކުވެސް ކުރަންޖެހޭނޭ މުހިންމު ކަމެކެވެ.