ދަރިންނަކީ ކޮންމެ މީހަކުވެސް އިންތިހާއަށް ލޯބިވާނޭ ބައެކެވެ. އެއްވެސް މީހަކު އެމީހެއްގެ ދަރިއަކަށް އެއްވެސް ކަހަލަ ގެއްލުމެއް ލިބޭކަށް ނޭދޭނެއެވެ. އެ ސަބަބަށްޓަކައި އެ ދަރިންގެ އުޅުމާއި ގުޅުންތަކަށް ބެލެނިވެރިން ފާރަވެރިވެއެވެ. ގޭތެރޭގެ މާހައުލުގައްޔާއި ގެއިން ބޭރުގައިވެސް މެއެވެ. އަދި އަނެއްބައި ބެލެނިވެރިންނަކީ އެ މީހުންގެ ދަރިން ގޭގައި ތިބޭނަމަ، އެއީ ބަސްއަހާ ކިޔަމަންތެރި ކުދިންތަކެއް ކަމަަށް ދެކެއެވެ. އެހެންކަމުން އެކުދިން ގޭތެރޭގައި އުޅޭނަމަ، އެ އުޅޭ އުޅުމަށް ފާރަވެރިނުވެ ދޫކޮށްލެވިފައި ހުރެއެވެ. މިކަމުން ލިބޭ އެކި އެކި ގެއްލުންތައް ވަރަށްވެސް ގިނައެވެ. މި ލިޔުމުގައި ވެސް މިފަދަ ހާދިސާއަކަށެވެ. ފިލިޕީންސްގައި ހިނގައިދިޔަ މި ހިތާމަ ވެރި ހާދިސާގައި ކުޑަކުއްޖެއްގެ ފުރާނަ ވަނީ ގޮސްފައެވެ. މިކަމުގައި ސަމާލުކަން ނުދެވުމުގެ އިހުމާލު އޮތް ނަމަވެސް އެކަމުގެ ބަދުނާމު އެއްވެސް ފަރާތެއްގެ ބޮލުގައި އެޅުވުމުގެ ގަސްތެއް އަޅުގަނޑުގެ ނެތެވެ.
ދެމަފިރިއަކަށް ލިބި ހުރި ދެ ދަރިން ކުރެ އެންމެ ހަގު ދަރިއެވެ. އުމުރުން ގާތްގަނޑަކަށް 3 އަހަރެވެ. ގޭތެރޭގައި އެކި އެކި އެއްޗެއްސާ ކުޅެން އުޅެއެވެ. ގޭތެރޭގައި ނުވަތަ ކޮޓަރި ތެރޭގައި ބަސްއަހައިގެން ތިބޭތީ، އެ ކުއްޖާގެ ބެލެނިވެރިން އެ ކުއްޖާއަށް މާ ބޮޑު ސަމާލުކަމެއް ނުދެއެވެ. އާންމު އުސޫލަކީވެސް އެއީއެވެ. ނަމަވެސް ކަމެއް ވާނީ ބުނެފައެއް ނޫނޭ ބުނާ އުސޫލުން އެއީވެސް އެއްދުވަހެއްގައި ހަމަ ކުއްލި ގޮތަކަށް ދިމާވި ހާދިސާއެކެވެ. އެ ތުއްތު ކުއްޖާގެ ފުރާނަ މި ދުނިޔެއާއި ވަކިވީ އެ ހިތާމަވެރި ހާދިސާގައެވެ. އެ ހާދިސާގެ ވާހަކަ މީސްމީޑިޔާގައި އެކި މަންސަތަކުގައި މަގުބޫލުކަން ވަނީ ހޯދާފައެވެ.
ކޮޓަރިތެރޭގައި ކުޅެން އިން އެ ކުއްޖާ ކޮޓަރި ތެރޭގައި ހުރި އެކި އެކި އެއްޗެއްސާ ކުޅެއެވެ. އެއީ އެކުއްޖާގެ އަދި އެހެން ކުޑަކުދިންގެ ވެސް އާދައެވެ. އެ ކުއްޖާ ކޮޓަރި ތެރޭގައި އޮތް ސަމުސަލެއް ނެގީ ކަމަށް ބެލެވެއެވެ. އަދި އެ ސަމްސަލާ އެކި ގޮތް ގޮތަށް ކުޅެމުން ދިޔައެވެ. މާ ދުރު ނޫން ހިސާބެއްގައި ކޮޓަރީގެ މުށިތަކު މަތީ ކަރަންޓު ލީޑެއް އޮތެވެ. އޭގެ އެއް ސޮކެޓަށް އޮތީ އިސްތިރީގެ ވާގަނޑު ގުޅާފައެވެ. އަނެއް ސޮކެޓު އޮތީ ހުސްކޮށެވެ. ބެލެވޭ ގޮތުގައި އެ ކުއްޖާ އެ ސަމްސަލާ ކުޅެމުން ގޮސް، އެ ކަރަންޓު ލީޑު ކައިރިއަށް ދިޔައެވެ. އަދި އެ ސަމްސަލުން ކަރަންޓު ލީޑާ އަޅުވާ ކުޅެއެވެ. އެގޮތުން އެ ލީޑުގައި ހުހަށް ހުރި ސޮކެޓުގެ ޓޮޕު ފައިކަށި ވަންނަ ބާގަނޑަށް އެ ސަމްސާކޮށްޕާލީ ކަމަށް ބެލެވެއެވެ. އޭރު އެ ސޮކެޓުގެ ސުއިޗުވެސް ޖައްސާފައި ހުރިކަން ފާހަކަ ކުރެވެއެވެ.
އެ ކުއްޖާއަށް މާ ބޮޑު ސަމާލުކަމެއް ނުދެވި ސިޓިންރޫމުގެ ތެރޭގައި އިން އެ ކުއްޖާގެ ބެލެނިވެރިންނަށް ސިހުމެއް ގެނައީ ކުއްލި ގޮތަކަށް އިވުނު ހަޅޭކުގެ އަޑަކާއި އެކުގައެވެ. އެއާއި އެކު ގޭގެ ކަރަންޓަށް ގޮތް ގޮތް ވާން ފެށިއެވެ. ނަމަވެސް ކަރަންޓު އެއްކޮށް ކެނޑިގެންނެއް ނުދެއެވެ. އޭރުވެސް އެ ހަޅޭކުގެ އަޑު އެ މީހުންނަށް އިވެއެވެ. ދެމީހުންވެސް އަވަހަށް ދުވެފާ ކޮޓަރި ތެރެއާއި ދިމާލަށް ދިޔައިރު، އެ ތުއްތު ކުއްޖާ އޮތީ އެ ލީޑުގެ ސޮކެޓަށް ޖަހާފައި ހުރި ސަމްސަލުގައި ހިފަހައްޓައިގެން ތެޅިލަ ތެޅިލައެވެ. ހިސާބަކަށް ތަންދޮރު ދަންނަ ބައެއް ކަމުން އަވަސްވެ ގަތީ ގެއިން ކަރަންޓު ދުއްވާލާށެވެ. އެއާއި އެކު އެ ކުއްޖާގެ ހާލު ބެލިއެވެ. ހަބަރެއް ނެތެވެ.
ލަސްނުކޮށް ހޮސްޕިޓަލަކަށް ގެންދިޔައެވެ. ނަމަވެސް ވަގުތު ފާއިތު ވެއްޖެއެވެ. އެ ކުއްޖާގެ ފުރާނަ މި ދުނިޔެއާއި ވަކިވެއްޖެއެވެ. އެވަގުތު އެ ކުއްޖާގެ މައިންބަފައިން އެކަކު އަނެކަކަށް ބަދުނާމު ކުރިއެވެ. އެ ކުއްޖާގެ ބައްޕަ، އެ ކުއްޖާގެ މަންމަ އަށް އިޝާރާތްކޮށް އިސްތިރިކޮށްފާ ލީޑު ނަގާ ފޮރުވާނަމަ އެހެނެއް ނުވީހޭ ބުނާއިރު، އެ ކުއްޖާގެ މަންމަ، އެ ކުއްޖާގެ ބައްޕައަށްވެސް އެކި އެކި ތުހުމަތުތަކާއި އިހުމާލުތައް އަޅުވާ ބަދުނާމު ކުރަންމުން ދިޔައެވެ.
އާދޭހެވެ! މި ވާހަކަ ހިއްސާކޮށްލުމުގެ ބޭނުމަކީ އަހަރެމެންގެ ދަރީން ގޭގައި މަޑުން ތިބޭ ކަމުގައި ވީނަމަވެސް އެއީ އެކުދިންނަށް ދޭން ޖެހޭ ސަމާލުކަން ކުޑަކުރަންވީ ކަމެއް ނޫން ކަމުގައި ބުނެދިނުމެވެ. ގޭތެރޭގެ މާހައުލަކީ ރައްކާތެރި މާހައުލެއް ކަމުގައި ވީނަމަވެސް، އެފަދައިން ދޫވެފައިވާ ކުދި ކުދި ކަންކަމުން ވޭނީ އަސަރު އެކުލަވާ ހިތްދަތި ހާދިސާތައް އުފެދިދާނެއެވެ. ކުޑަކުދިންނަށް ފޯނު ދެވޭއިރުވެސް އެ ކުދިން ފޯނުތަކުން ކުރަނީ ކީއްތޯ ބެލެވެން ޖެހޭނެއެވެ. އެކަނި ކޮޓަރި ތެރެއަށް ދޫކޮށްލާފައި ހުންނަ އިރު، އެފަދަ ގެއްލުމެއް ކުރިމަތިވެދާ ފަދަ އެއްޗެއް އޮތްތޯ ބަލާ ރައްކާތެރިކަން އިސްކުރަން ވާނެއެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން