މާތް ﷲ ހަނދުމަނެތިކޮށް ހަގީގީ ބާއްޖަވެރިކަން ލިބޭނޭތޯ މިއަދުގެ ހުކުރު ޚުތުބާގައި ވަނީ ސުވާލު އުފައްދާފައެވެ.

ހަގީގީ ބާއްޖަވެރިކަން މި މައުޟޫއަށް ރާއްޖޭގެ އެކި ކަންކޮޅުތަކަށް އިއްވި ހުކުރު ޚުތުބާގައި ބުނީ، މީސްތަކުންގެ ހިޔާލާއި ފިކުރު ތަފާތުވާ ފަދައިން، ބާއްޖަވެރިކަން މާނަ ކުރުމުގައި ވެސް އެކި މީހުންގެ ވިސްނުން ތަފާތުވާނެ ކަމަށެވެ. އެގޮތުން ބާއްޖަވެރިކަމަކީ މުއްސަނދިކަން ނުވަތަ ބޭނުންވާ ކަންކަން ޙާސިލުވުން ކަމުގައި ބައެއް މީހުން ދެކޭއިރު، ބާއްޖަވެރިކަމަކީ ހަމައެކަނި އެއީތޯ ވިސްނާލަން ޖެހޭކަމަށްވެސް ޚުތުބާގައި ވަނީ ބުނެފައެވެ.

ޚުތުބާގައި އިތުރަށް ބުނީ، ޙަޤީޤީ ބާއްޖަވެރިކަމަކީ މާތް ﷲ އަށް އީމާންވެ، އެކަލާނގެ ނުރުއްސެވި ކަންކަމާއި ދުރުހެލިވެ އުޅުމުން މާތް ﷲ އެމީހެއްގެ ހިތުގައި ލައްވާ ހަަމަޖެހުމާއި އުފާވެރިކަމުގެ ޝުއޫރެއް ކަމަށެވެ. އެއީ އެއްވެސް ގޮތަކަށް މާއްދީ ގޮތުންނާއޖ މާލީގޮތުން ޙާސިލު ކުރެވޭނެ އެއްޗެއް ނޫންކަމަށް ވެސް ޚުތުބާގައި ބުނެފައިވެއެވެ.

މީގެ އިތުރުން، ބާއްޖަވެރިކަމުގެ އަސާސަކީ އީމާންކަން ހަރުދަނާވުމާއި، ކިޔަމަންތެރިކަން ކަމުގައި ވެސް ޚުތުބާގައި ވަނީ ބަޔާން ކުރައްވާފައެވެ.

އުފާވެރި ދިރިއުޅުމެއް ހޯދުމަށް ކުރާ މަސައްކަތުގެ ތެރެއިން، މާތް ﷲ ހަނދުމަކުރުން ވެސް ބައެއް މީހުން ހަނދާނުގައި ނުހުންނަ ކަމަށެވެ. އެގޮތުން ފަރުޟު ފަސް ނަމާދު ކުރަން ވެސް ހަނދާން ނުހުންނަ މީހުން އުޅޭކަމަށް ޚުތުބާގައި ވަނީ ބަޔާންކޮށްފައެވެ. ނަމާދަށް ރައްކާތެރިނުވެ، ކިތަންމެ ބުރަކޮށް މަސައްކަތް ކުރިނަމަވެސް ބާއްޖަވެރިކަން ލިބޭނީ ކިހިނެއްތޯ ޚުތުބާގައި ވަނީ ސުވާލުކޮށްފައެވެ. 

އޭގެ އިތުރުން، ﷲ ތަޢާލާއާމެދު ހިތްތަކުގައި އޮންނަ ޔަޤީންކަމާއި ބަރޯސާއަކީ އިންސާނާއަށް ބާއްޖަވެރިކަން ގެނެސްދޭނެ ކަމެއްކަން ބަޔާންކޮށް ޚުތުބާގައި އިތުރަށް ބުނީ، އެ ޔަޤީންކަން ލިބޭނީ ހަމައެކަނި އީމާންކަމުން ކަމަށެވެ. އެގޮތުން އެ ޔަޤީންކަން ލިބުމުން ނަފްސާމެދު ޔަޤީންކަން އުފެދި، ޙަޔާތުގައި ދިމާވާ އެކި ކަންކަމާމެދު ހާސްވުމާއި ކަންބޮޑުވުން ނެތިދާނެކަމަށް ޚުތުބާގައި ބުނެއެވެ.