އަހަރެމެން ދިވެހިންނަށް ތަރުކާރީއެއް ކެވޭ ކަމަށްވަނީ ބޮޑު އަގު ދީފަ މާރުކޭޓުން ގަނެގެން ކެއީމައެވެ. ފަތެއް ކެވޭކަމަށް ވަނީވެސް ރަބަރު ނުވަތަ ޕްލާޓިކު އުރައިގައި އޮޅާ ބަނދުކޮށްފައި ބޮޑު އަގުގައި ވިއްކަން ހުންނަ ފަތް ގަނެގެން ކެއީމައެވެ. ފަތެއް ވިއްޔާ ކާންވަނީ ލެޓިއުސް ފަތާއި ބޮނޑި ކޮޕީއެވެ. އެހެން ނޫނީ ކޮންމެެވެސް ރީތި ރާގަކަށް އިނގިރޭސި ނަމެއް ކިޔާ، ބޭރުން އެތެރެކޮށްފަ ހުންނަ ކޮންމެވެސް ފަތެކެވެ. ބޭރުގެ ގައުމު ތަކުގެ ބޮޑެތި ދަނޑުތަކުގައި އޭތި މީތި ޖަހައިގެން އެގޮތް މިގޮތަށް ތަޅުވައިގެން އޭތި މީތި ހާކައިގެން ބަންދުކޮށްގެން ގެނެސްފައި ހުންނަ ފަތެވެ. ކަރުދާސްކޮޅުތަކުގައި ބޮޑެތި އަގު ޖާހާފާ ބޮޑު ބާޒާރުގައި ދަމާ ކަނޑާ ފަތްތަކެވެ. އެހެން ނޫންނަމަ ފަތެއް ކެވޭކަމަކަށް ނުވެއެވެ. މިއީ މިއަދު ދިވެހިންގެ ހާލެވެ.

ރާއްޖެއިން ބޭރުގެ ގައުމުތަކުގައި އެމީހުން ދަނޑުވެރިކަން ކުރަނީ ބޮޑެތި ބިންތަކުގައެވެ. އެފަދަ ބޮޑެތި ބިންތަކުގައި ގިނަ އަދަދަކަށް ގަސްގަހާގެހި ހައްދާއިރު، އެ ތަކެތި އޭގެ ޠަބީއަތުގައި ދުޅަހެޔޮކަންމަތީ ބޮޑު ކުރުމަކީ އުނދަގޫ ކަމެކެވެ. އެހެންކަމުން އެފަދަ ބޮޑެތި ދަނޑުތަކުގައި ގަސްތައް ރުވަން ފަށަނީވެސް ކޮންމެވެސް ކަހަލަ ބޭހެއް ނުވަތަ ކެމިކަލެއް ބޭނުން ކޮށްގެންނެވެ. އެ ގަހެއްގެ ހެދިބޮޑުވުމުގެ ކޮންމެ މަރުހަލާއެއްގައި ވަކިން ހާއްސަކަމެއް ދީގެން އެ ގަސްގަހަށް ބޭހާއި ކެމިކަލްދީ އުޅެއެވެ. ބައެއް މަރުހަލާ ތަކުގައި ބާރުގަދަ ކެމިކަލްތަކެވެ. އެންމެފަހުން ދަނޑުކޮށާ ދުވަހުގައިވެސް ބޭސް ޖަހައެވެ. އެތަކެތި ދޮވެ ހަދަނީވެސް ކޮންމެވެސް ނަމެއް ކިޔާ ކޮންމެވެސް ޒާތެއްގެ ކެމިކަލެއް ބޭނުން ކޮށްގެނެންވެ. އެއަށްފަހު އެ ބަންދުކުރުމުގެ މަރުހަލާގައިވެސް ކޮންމެވެސް ޒާތެެއްގެ ކެމިކަލެއް ބޭނުން ކުރާނެއެވެ. އަހަރެމެންގެ ލޯތަކުގައި އަނދުން އަޅުވާ އެއަށް ކެމިކަލޭ ނުކިޔާ ކޮންމެވެސް މޮޅު ޓްރީޓްމެންޓެކޭ ކިޔާފާ ހުރެއެވެ. ނަމަވެސް ކަމުގެ ހަގީގަތް ބަލާއިރު މުޅިންވެސް ކެމިކަލެވެ.

މި ތަކެތި އެ ބޮޑެތި ދަނޑުތަކުން ގޮވާންކޮށް، މުޅި ދުނިޔޭގެ ބޮޑެތި ބާޒާރުތަކުގައި ދެކޮޅު ދެކޮޅަށް ދަމާ ހަލުވާނެއެވެ. އެ ތަކެތި އެންމެ ފަހުން އަހަރެމެންނާއި ހަމައަށްވެސް މިހިރަ ފޯރަނީއެވެ. ރީތި ނަންނަމުގައި މީގެ ކުރިން ދިވެހިން ދެކެފާނުވާ ޒާތްޒާތުގެ ފަތްތަކެވެ. އެހެރަ ގަދަ ފެހިކުލައިގެ ފަތްތަކެވެ. ބޭރުން އެތެރެކޮށްފިޔާ އެވީ ފެހިކުލަ ގަދަ ފަތަކަށެވެ. އެހެން ނޫނިއްޔާ ފަތުގައި ކިތައްމެ ފެހިކުލަ ގަދަޔަސް އެ ފެހިކަން ފެންނަ ކަމަކަށް ނުވެއެވެ. ފަހަރުގައި މިއީ ބަވަނަވެފައިވާ ދުނިގެ ދަސްކޮށްދިން އާދައެއް ކަމުގައި ވެދާނެއެވެ. ނުވަތަ އިންސާނާގެ ވިސްނުމުގައި ފައިސާ އަކީ އެއްޗެހީގެ އަގު ވަޒަންކުރާ އާލާތެއް ކަމުގައި ގަބޫލުކުރެވެނީ ކަމަށް ވެދާނެއެވެ. އެހެނީ ބޭރުން ގެނެސްފައި ހުންނަ ފަތްތަކުގެ އަގު ބޮޑުވެފައި ފެންނަ ފެނުމަށް އެއީ މޮޅު ފަތެކޭ ހީވާތީއެވެ.

އާދޭހެވެ! އަހަރެމެން ދިވެހިންނަށް ފަތް ކެވޭ ކަމަށްވަނީ ބޭރުން އެތެރެކޮށްފައި ހުންނަ ފަތް ކާނަމަ ހެއްޔެވެ؟ ނޫނެކެވެ. ފެހިކުލަގަދަ ފަތް ކާކަށް ދިވެހިން ބޭރުގައުމުތަކަށް ބަރޯސާވާކަށް ނުޖެހެއެވެ. އަހަރެމެން ދިވެހިންގެ ބިންކޮޅު މަދަސް މި ބިމުގައި ފަތްޕިލާވެލީގެ އެތައް ބާވަތެއް ހެދެއެވެ. އޭގެ ތެރޭގައި ކެއުމަށް ބޭނުން ކުރެވިދާނޭ ކިތައްމެ ބާވަތެއް ވެއެވެ. އެއިން ކޮންމެ ބާވަތެއްވެސް ވަނީ ސިއްހަތަށް ފައިދާކުރާ އެތައް މާއްދާއަކުން މުއްސަނދި ވެފައެވެ. އެއީ ހައްދަން ޖެހޭ ގަސްގަހާގެއްސެއް ނޫނެވެ. ހިތަށް ފަޅައިގެން އަމިއްލަ އަށް ހެދިބޮޑުވާ ގަސްގަހެވެ. ބޭހެއް ކެމިކަލެއް އަނެކައްޗެއް އެ ގަސްގަހަށް ޖަހައެއް ނޫޅެއެވެ. ވަލު ތެރޭގައްޔާއި އެހެން ހުންނަ ހުސްބިން ބިމުގައި އެހެރަ ހުރެގެން ފަޅާ ހެދި ބޮޑުވަނީ ޤުދިރަތީ ފެނާއި ކެވެނީގެ ބާވަތްތަކުގެ ތާސީރެއްގެ ތެރޭގައެވެ. އެ ގަސްގަހުގައި ކެމިކަލެެއް ވިހައެއް އަދި ކިއެއް ގެއްލުން ދެނިވި މާއްދާއެއް ނުވެއެވެ. މިފަދައިން ދިވެހި ފަސްގަނޑުގައި ހެދޭ ފެހިކުލަ ގަދަ "ވަލު" ފަތްޕިލާވެލީގެ ތެރޭގައި ހިމެނެނީ ކޮޕީ ފަތާއި މާނބުޅާ ފަތާއި ދިގުތިޔަރަ އާއި ކުދި މަގުލާއި ކުއްޅަފިލާ ފަތާއި މައްސާގު ފަތާއި މުރަނގަ ފަތާއި ޖުމްހުރީ މޭވާ ފަތާއި އަދި ބެލެހެއްޓިގެން ހެއްދޭ ލެޓިއުސް ފަތާއި ކަންކުން ފަތާއި އަދިވެސް އަދިވެސް މިފަދަ ކިތައްމެ ފަތެއް މި ބިމުގައި ހެދެއެވެ. މިއީ ހައްތަހާވެސް ކެއުމަށް ބޭނުން ކުރެވިދާނޭ ފެހިކުލަގަދަ ފަތްތަކެވެ. 

މިހިރަ ފެންނަނީ ދިވެހިންނަށް ހުރި ނިއުމަތްތަކާއި ތިޔާގި ފުރުސަތުތަކެވެ. އެހެނަސް ދިވެހިން އިހްތިޔާރު ކުރީ ބޮޑު އަގުދީފައި ބޭރުން ގެންނަ ފެހިކުލަގަދަ ފަތް ކާށެވެ. މިހިރަ މިހިރަ ފުރުސަތުތަކުގެ މަތިން ހަނދާންވެސް ނެތިއްޖެއެވެ. މިފަދަ ފަތްތަކަށް އައްޗި ކިޔަން ފަށައިފިއެވެ. މިއީވެސް ބަވަނަވުން ކަމުގައި ދެކިގެން ދެންވެސް ތިބެންވީތޯއެވެ. ގެވަޅުތެރޭގައި މިއިން ގަހެއްގެ ކޯޅިއެއް ޖަހާ ހައްދައިގެން އެއިން ފަތް ބިނދެގެން ކައިފިއްޔާ އަޅެ ކަމެއް ގޯސް ވާނީ ހެއްޔެވެ؟ ހަގީގަތަކީ ދުޅަހެޔޮ ސިއްހަތަކަށް ގެވެހި ދަނޑުވެރިކަމުން އުފައްދާ ކެއުންތައް މުހިންމުކަމެވެ. އޭގައި ކެމިކަލެއް ވިހައެއް ނުވެއެވެ.

މިހިރަ މިހިރަ ފުރުސަތުތައް ދިވެހިން އަލުންބަލުން ހޯދަން ވެއްޖެއެވެ. އެތަކެތި ހައްދާ ކާން ވެއްޖެއެވެ. ކެމިކަލްޖެހި ފަތްތަކުން ދުރުވެ، "ވަލު" ފަތްތައް ކާން ވެއްޖެއެވެ. އެއީ އަހަރެމެންގެ ކާބަފައިންވެސް ކައި އުޅުނު ތަކެއްޗެވެ.