ތިބާގެ ހަޔާތުގައި އެވެނި މިވެނި މީހަކާއި ދިމާނުވި ނަމައޭ ހިތަށް އަރާ ހެއްޔެވެ؟ މިއީ އަހަރެމެންގެ ތެރެއިން ގިނަ ޒުވާނުން މިއަދު ދައްކާ ވާހަކަ އެކެވެ. މި ވާހަކަތަކުގެ ސިއްރު ގިނަފަހަރަށް ގުޅިފައި ވަނީ ލޯބީގެ ކޮންމެވެސް ދާއިރާ އަކަށެވެ. އެހެނަސް މިއީ ލޯބީގެ ރާގު އެކަނި ހިމެނޭ ކަމެއް ނޫނެވެ. ހަޔާތުގެ ކޮންމެ ކަމެއްގައިވެސް މިފަދަ ކިތައްމެ ވާހަކައެއް ދެއްކިދާނެއެވެ. އެފަދަ ކިތައްމެ ބަޔަކު ތިބޭނެއެވެ. އެގޮތަށް ދިމާވެފައިވާ ކިތައްމެ ބަޔަކާއި ދިމާނުވިނަމައޭ ހިތަށް އަރާ ކިތައްމެ ބަޔަކު ތިބޭނެއެވެ. މި ވަނީ ކީންހެއްޔެވެ؟

ދުނިޔެއަކީ ތަފާތު މީހުން އުޅޭ ތަނެކެވެ. މި ތަނަކީ އެ ތަފާތު މީހުން އެކަކު އަނެކަކާއި ބައްދަލުވެ ތައާރަފުވަމުން ހިނގާ ތަނެކެވެ. އެއިރަކު ކަންކަން ހިނގާ ގޮތާއި ކަންކަން ތަރުތީބުވާ ގޮތަކުން މި ތަފާތު މީހުންނާއި ބައްދަލުވެއެވެ. އަދި އެ ތަފާތު މީހުންގެ ތެރެއިން އެ ކަމެއް ވެ ނިމުމުން ދެމި ތިބޭ މީހުންނާއި ގެއްލިދާ މީހުން ވެއެވެ. އާންމު ގޮތެއްގައި އެ މީހަކާއި ބައްދަލު ނުވި ނަމައޭ ބުނެވެނީ މިފަދައިން ގެއްލިދާ މީހަކާއި ދިމާލަށެވެ. 

އޭނާ އާއި ބައްދަލުވެ، ހޭދަ ކުރެވުނު ވަގުތުގައި އުފަލާ ހިތްހަމަޖެހުން ލިބި، އަދި އެނޫން ނަޒަރަކުން ބަލާނަމަ ކޮންމެވެސް ހެޔޮ މަންފާތަކެއް ލިބިދެއެވެ. އެ ލިބުނު އުފަލެއް ނުވަތަ ހިތްހަމަ ޖެހުމެއް ނުވަތަ މަންފާއެއް، އެ މީހަކު ވަކިވުމުން ގެއްލި ދެއެވެ. އެ ހިސާބުން އެ ލިބުނު ކަންކަމުގެ ބޮޑު ކަމާއި ތަނަވަސްކަމުން އެކަންކަމުގެ މަތިން ހަނދާންކުރުވާ މިންވަރު އިތުރުވެއެވެ. އެއީ އެކު އެ އުނިވި ކަންކަމައިގެން އިންސާނާގެ ހަޔާތް ކުރިއަށް ގެންދަން ޖެހޭ ޖެހުމުގައި އެވެނި މިވެނި މީހަކާއި ބައްދަލު ނުވިނަމައޭ ބުނެވެއެވެ. މިއީ އިންސާނީ ޠަބީއަތެކެވެ.

ކަންއޮތީ މިހެން ކަމުގައި ވީނަމަވެސް، އަހަރެމެން ހަމަ ހަގީގަތުގައިވެސް އެހެން ބުނަން ޖެހޭ ހެއްޔެވެ؟ ފަހަރުގައި އެ ދިމާވި މީހެއްގެ ސަބަބުން ހަޔާތުގައި ވޭނާއި ތަދާއި، ދައްޗާއި ދުރާ އަދި އަނިޔާ ލިބިފައި ހުރެދާނެއެވެ. މިއީ އެ މީހަކާ ދިމާނުވި ނަމައޭ ހިތަށް އަރާ މައިގަނޑު ސަބަބު ތަކެވެ. އެހެނަސް، އެހެން ހިތަށް އެރުން އެއީ ހެވެކެވެ. ނަމަވެސް ބުއްދިވެރީ އެކަން ހާމަ ނުކުރުމެވެ.

އެހެން ހިތަށް އެރުން ހެވަކަށް ވަނީ އެ މީހެއްގެ ފަރާތުން ތިބާގެ ދިރިއުޅުމުގައި ފިލާވަޅެއް ނުވަތަ އިބުރަތެއް ތިބާއަށް ހާސިލް ވީތީއެވެ. އެ މީހަކާއި ބައްދަލު ނުވި ނަމަ ރަނގަޅޭ ހިތައް އަރާއިރު، އެމީހަކާއި ބައްދަލުވެގެން ތިބާ އަށް ދަސްވި ކަންތައް، އެމީހަކާއި ބައްދަލު ނުވާނަމަ ދަސްވާނެ ހެއްޔެވެ؟ އެހެންކަމުން އެކަމުގައިވެސް ހެވެއް ވާކަމަށް ވިސްނާށެވެ. އެ މީހަކާއި ބައްދަލުވެ ދެން އެ ހިނގި ކަމަކުން ދެރައެއް ހިތާމައެއް ލިބުމުން ދަސްކުރަންވީ ދެވަނަ ފަހަރަށް އެކަމެއް ތަކުރާރު ވިޔަ ނުދޭށެވެ. އެއީ ތިބާއަށް ދިމާވި އިމްތިހާނެއް ކަމުގައި ދެކޭށެވެ. އޭރުން އެމީހަކާއި ދިމާވިކަމަށްޓަކައި ދެރަވެ ހިތާމަ ކުރާކަށް ނުޖެހޭނެއެވެ.