ޖިންނި ޝައިޠާނުންނަކީ އުޅޭ ބައެއްކަމާއި އެބައިމީހުންގެ ފަރާތުން އިންސާނުންނަށް އުނދަގޫ ފޯރާކަން ވެސް އަހަރެމެން ގަބޫލު ކުރަމެެވެ. ސިހުރު ހަދާ މީހުން ހަދާ ސިހުރުގެ ސަބަބުންނާއި އިންސާނުންގެ އުޅުމުގެ ތެރެއިން ޖިންނި ޝައިޠާނުންނަށް އުނދަގޫ ކުރެވުމުގެ ސަބަބުންވެސް ޖިންނި ޝައިޠާނުންގެ އުނދަގޫ އިންސާނުންނަށް ފޯރައެވެ. އެކަންކަމުން ރައްކާތެރިވާނޭ މަގުތައް އަހަރެމެންގެ އިސްލާމްދީނުގައި ވަނީ ބަޔާންކޮށްދެއްވާފައެވެ. މި ލިޔުމުގައި މި ބަލާލަނީ މަޝްހޫރު ދީނީ ޢިލްމުވެރިޔާ މުފްތީ މެންކް އޭނާގެ ދަރުހެއްގައި ހިއްސާކޮށްފައިވާ ވާހަކަ ތަކެއްގެ ތަރުޖަމާއެވެ. ޖިންނީގެ ފަރާތުން އުނދަގޫވާކަން ދެނެގަންނާނެ ގޮތާއި އެކަމުގައި އަވަހަށް އަމިއްލައަށް ރައްކޭތެރިކަން ހޯދަން ކުރެވިދާނޭ ކަމަކާއިމެދު އެ ދަރުހުގައި އަލި އަޅުވާލާފައި ވެއެވެ. އެގޮތުން އެ ދަރުހުގައި މުފްތީ މެންކް ވިދާޅުވި ބައެއްކަކަން ހިއްސާކޮށްލާނަމެވެ.

އެގޮތުން ޖިންނީގެ ފަރާތުން އުނދަގޫވާކަމުގެ ބައެއް ނިޝާންތަކުގެ ތެރޭގައި ހިމެނެނީ: 

1. ރޭގަނޑު ނިދަން އުނދަގޫވުން. 

2.ފަސޭހައިން ދެރަވެ މާޔޫސްވުން.

3. ސަބަބެއް ނެތި ހަށިގަނޑުގައި ރިއްސުން.

4. ހޫނުކަން އިހުސާސްވުމާއި ގިނަ ފަހަރަށް ބިރުވެރި ހުވަފެންތައް ފެނުމެވެ.

5. ސަބަބެއް ނެތި ހިރުވުން.

6. ގިނަ ފަހަރަށް ފޫހިކަން އިހުސާސްވުން.

7. ގިނަ ފަހަރަށް ނިދިހަމަނުވުން. 

8.އުސްތަނަކުން ވެއްޓޭތަން ހުވަފެނުގައި ފެނުން.

9. ހަރުފައެއް / ވަލު ޖަނަވާރެއް ފަހަތުން ދުވާތަން ހުވަފެނުގައި ފެނުން.

10. ބޮލުގެ ފަހަތަށް ބަރުވެ ތަދުވާހެން ހީވުން.

11. ލޮލާއި ބޮލަށް ބަރުވެފާ ހުރުން.

12. އަބަދު ނިދި އައިސްފައި ހުރެމެ ނުނިދުން.

13. އަބަދުވެސް ދެރަވެފައި ހުރެވުން.

14. އަޅުކަންކުރުމަށް ކަންނެތްވުން، ޚާއްޞަކޮށް ނަމާދުކުރުން.

15. ކުއްލިއަކަށް ނުބައި ވިސްނުންތައް ވިސްނި، ފާހިޝްކަންކަމަށް އަރައިގަތުމުގެ ޝައުގު ކުއްލި ކުއްލިއަށް އުފެދުން.

އަދިވެސް އަދިވެސް މިފަދަ ނިޝާންތައް ހުރެއެވެ. އެހެނަސް މިއީ ބައެއް އާންމު ނިޝާންތަކެވެ. ގިނަ ބަޔަކު ތަހައްމަލު ކުރާ ނިޝާންތަކެކެވެ.

މިކަންކަމުން އަރައިގަންނަންވީ ގޮތަކީ ކޮބާ ހެއްޔެވެ؟ ރައްކާތެރިވުމުގެ ގޮތުން، ނިދުމުގެ ކުރިން މިނިވަންކަމާއެކު އަމިއްލަ ނަފްސަށް ކުޑަނަމަވެސް ރުޤްޔާއެއް ކުރާށެވެ. މިއީ ވަރަށް އާދައިގެ ރުޤްޔާއެކެވެ. ކުރަން ފަސޭހަ ރުޤްޔާއެކެވެ. އެއީ ދެ އަތްތިލަ އެއްކޮށްލުމަށްފަހު، އަލްއިޚްލާސް އަލްފަލަޤް އާއި އަންނާސް (ތިރީ ތިން ސޫރަތް) ކިޔުމަށްފަހު، ދެއަތްތިލައަށް ފުމެލުމެވެ. ދެން އަތްތިލަ މުޅި ހަށިގަނޑުގެ އަތްފޯރާފަށުގައި ފޮހެލުމެވެ. ނުވަތަ ހާކާލުމެވެ. ހަށިގަނޑުގެ ކުރިމަތިން ފެށިގެން ބޮލާއި މޫނާއި އެއްކޮށެވެ. (މި ގޮތަށް ތިން ފަހަރު ތަކުރާރުކުރަން ވާނެއެވެ.) މިއީ ރަސޫލާ صلى الله عليه وسلم ކުރައްވި ރުޤްޔާއެއް ކަމަށް މުފްތީގެ އެ ދަރުހުގައި ބުނެއެވެ. އެހެންކަމުން މި ރުޤްޔާ ކުރުމުގައި އަހަރެމެން މުސްލިމުން ދެމިތިބެން ޖެހެއެވެ. ރުޤްޔާ ކުރާނޭ މީހަކު ކޮންމެހެން ހޯދާކަށް ނުޖެހެއެވެ. މިއީ އަމިއްލަ އަށް ކޮށްލެވޭ ކުރު، އަދި ފަސޭހަ ރުޤްޔާ އެކެވެ.

ނުބައި ޖިންނީންނާއި ޝައިޠާނުންގެ ކިބައިން އަޅަމެން އެންމެން ރައްކާތެރި ކުރައްވާށިއެވެ. އަދި އެފަދަ ކަންކަން ތަހައްމަލު ކުރަމުންދާ ފަރާތްތަކަށް އަވަސް ޝިފާއެއް ދެއްވާ އެކަންކަމުން ސަލާމަތްވުމުގެ ހެޔޮ ތަޢުފީޤު މިންވަރު ކުރައްވާށިއެވެ.