އިހްތިރާމް ލިބޭނީ އިހްތިރާމް ކޮށްގެންނެވެ. މިއީ އަބަދުވެސް އަހަރެމެން ދައްކާ އުޅޭ ވާހަކައެކެވެ. މިކަމުގައި އިސްލާމީ ދަރުސްތަކާއި އިޖްތިމާއީ ކިތައްމެ ޖަލްސާތަކެއްގައި ކިތައްމެ ބަޔަކު ވާހަކަ ދައްކާ އުޅެއެވެ. މިއީ އެފަދައިން ތާރީޚީ ފިލާވަޅުތަކުގައި ކިޔާ އުޅޭ ވާހަކައެކެވެ. އިހްތިރާމުކޮށް އިހްތިރާމް ލިބުނު ރަސްގެފާނެއްގެ ލަޝްކަރެއްގެ ކޮމާންޑަރެކެވެ.
ރަސްގެފާނަކީ ރުޅިގަދަ، ހަރުކަށި ރަސްގެފާނެކެވެ. އެ ރަސްގެފާނުންގެ ރަސްކަމުގެ ބާރު ގަދަކޮށް، ރަސްގެފާނުންނަށް ސަނާ ކިޔާ މީހުން ގިނަ ކުރުމަކީ އަބަދުވެސް އެ ރަސްގެފާނުންގެ ހުވަފެނެކެވެ. އެކަމަށްޓަކައި އެ ރަސްގެފާނުގެ ރަސްކަމުގެ އަވަށާއި ކައިރި އަވަށްތައް އެ ރަސްގެފާނުންގެ ބެލުމުގެ ދަށަށް ގެންދަމުން ދިޔައެވެ. ހިސާބަކަށް އެކަން ކުރެވުނު ނަމަވެސް ބައެއް އަވަށްތަކުގެ ރައްޔިތުން، މިނިވަންކަން ބޭނުން ވާތީ މި ހަރުކަށި ރަސްކަލުގެ ރަސްކަމުގެ ދަށުގައި އުޅެން ބޭނުމެއް ނުވިއެވެ. އެހެނީ އެކަމުގެ ސަބަބުން އެބައިމީހުންގެ ދީން ދޫކޮށް އާދަތަކާއި ސަގާފަތްތައް ދޫކޮށްލަން ޖެހޭތީއެވެ.
މިކަމުގައި ރަސްގެފާނު ރުޅި އިސްކުރިއެވެ. އަދި ރަސްގެފާނުގެ ލަޝްކަރުގެ ކޮމާންޑަރުން އެއްކޮށް ވަރުގަދަ އަމުރެއް ކުރިއެވެ. އެ އަމުރުގައި ވަނީ އެ އަވަށްތައް ތަޅާ ސުންނާފަތިކޮށް، ފިރިހެނުން މަރާ، ފިރިހެން ކުޑަކުދިން ނުކުޅެދުންތެރިކޮށް، އަންހެނުން އަޅުންގެ ގޮތުގައި ގެނައުމަށެވެ. މިފަދައިން އަމުރުކޮށް ދެ ލަޝްކަރު ތައްޔާރުކޮށް، ދެ އަވަށަށް ފޮނުވުމަށެވެ.
މިތަނުން އެއް ލަޝްކަރުގެ ކޮމާންޑަރު މިކަމާ ކަންބޮޑުވިއެވެ. ކުށެއް ނެތް މައުސޫމު ބަޔަކަށް އެފަދަ އަނިޔާތަކެއް ދޭން މި ކޮމާންޑަރު ޖެހިލުންވިއެވެ. އެހެންނަމަވެސް މި ކޮމާންޑަރު ލަޝްކަރައިގެން އެ އަވަށަށް ދިޔައެވެ. ލަޝްކަރު ފެނި އެ އަވަށުގެ މީހުން ބިރުން ފިލުމުގެ ބަދަލުގައި އެ މީހުންގެ ޖާނާ މާލު ގުރުބާންވިޔަސް ވަރިހަމަވެފައިވާ ހާލު އެ ލަޝްކަރާ ކުރިމަތިލާން ތައްޔާރުވީ މާގިނަ ހަތިޔާރުތަކެއްވެސް ނެތިއެވެ. މި މަންޒަރު ފެނި އެއްކަލަ ކޮމާންޑަރުގެ ހިތުގައި ހަމްދަރުދީ އުފެދި އެ އަވަށުގެ ރަށްޔިތުންގެ އިހުސާސްތަކަށް އިހުތިރާމުކޮށް، ހަނގުރާމަ ނުކޮށް ދޫކޮަށްލިއެވެ. އެއާއި އެކު ލަޝްކަރުން ބައެއް މީހުން އެނބުރި ރަސްގެފާނުގެ އަރިހަށް އެ ވާހަކަ ހިފައިގެން ދިޔައެވެ. އަނެއްބަޔަކު އެ ކޮމާންޑަރާއި އެކު މަޑު ކުރިއެވެ.
ކޮންމެ އަކަސް އެ އަވަށުގެ މީހުންނަށް އެ ކޮމާންޑަރު ކުރި އިހްތިރާމުގެ ސަބަބުން، އެ އަވަށުގެ މީހުން އެ ކޮމާންޑަރަށް ވަރަށް އިހްތިރާމް ކުރިއެވެ. އަދި އެ ކޮމާންޑަރާއި ބައިއަތު ހިފާނޭ އިތުރު އެހެން އަވަށްތަކެއްވެސް ހޯދައިދޭނެކަމަށް އެ އަވަށުގެ މީހުން ބުންޏެވެ. އިސާހިތަކު، މާ ގިނަ ދުވަސްތަކެއް ނުވެ އެ ކޮމާންޑަރު ރަސްކަލަކަށް ބަދަލުވިއެވެ. މުޅިން އައު ރަސްކަލަކަށެވެ. އެހެން އަވަށްތަކެއް އެކުވެ އިއުލާނު ކުރި ރަސްކަމެކެވެ.
އެއްކަލަ ހަރުކަށި ރަސްގެފާނު ބޮޑު ލަޝްކަރެއް ތައްޔާރުކޮށް މި ކޮމާންޑަރާއި ކުރިމަތިލާން ނުކުތެވެ. އެހެނަސް މި ކޮމާންޑަރުގެ ފަހަތުގައި އޮތް ލަޝްކަރުގެ ބައި ގިނަކަން ފެނި އެއްކަލަ ހަރުކަށި ރަސްގެފާނު ފަހަތަށް ޖެހެން ފެށިއެވެ. އަދި އަމާންދީ އެނބުރި ދިޔައެވެ. ކޮމާންޑަރު ރަސްކަލަކަށް ހަދައިދީ އަދި ބޮޑު ބިޔަ ލަޝްކަރެއް އެ ރަސްގެފާނުގެ އަރިހުގައި ސާބިތުވެގެން ދިޔައީ ކޮމާންޑަރެއްގެ ހައިސިއްޔަތު، ބަޔަކަށް ކުރި އިހުތިރާމެއްގެ ނަތީޖާއެއްގެ ގޮތުންނެވެ.
އާދޭހެވެ! އެނގި ދަސްވި ކަމަކީ އިހްތިރާމު ކުރުމަކީ އިހްތިރާމު ލިބޭނޭ ކަމެެއް ކަމެވެ. އަދި ކުރާ އިހްތިރާމަށްވިރެ މާ ބޮޑުކޮށް އެ އިހްތިރާމުގެ ރައްދު އިހްތިރާމް ތިމާއަށް ލިބޭނޭ ކަމެވެ. އެހެންކަމުން އަނެކުނަށް އިހްތިރާމް ކުރުމުގައި އެއްވެސް މިންވަރަކަށް ފަސް ނުޖެހޭށެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން