މިއަހަރުގެ ތިންވަނަ ކުއާޓަރުގައި އުރީދޫ އަށް ލިބުނު އާމްދަނީ އިތުރުވިއިރު، ސާފު ފައިދާގެ ގޮތުގައި 127 މިލިއަން ރުފިޔާ ލިބިފައިވާކަމަށް އެ ކުންފުނީގެ މާލީ ހިސާބުތަކުން ދައްކައިފިއެވެ.
އުރީދޫގެ މިދިޔަ ކުއާޓަރުގެ މާލީ ހިސާބުތައް ދައްކާގޮތުން، މި އަހަރުގެ ތިންވަނަ ކުއާޓަރުގައި އާމްދަނީގެ ގޮތުގައި 471.2 މިލިއަން ރުފިޔާ ލިބިފައިވެއެވެ. މިއީ ދެވަނަ ކުއާޓަރުގައި އެ ކުންފުންޏަށް ލިބުނު 465.5 މިލިއަން ރުފިޔާގެ އާމްދަނީއާ އަޅާބަލާއިރު 1.2 އިންސައްތައިގެ އިތުރުވުމެކެވެ.
އުރީދޫ އަށް މިދިޔަ ކުއާޓަރުގައި ލިބުނު އާމްދަނީ އިތުރުވި ނަމަވެސް، ކުންފުނީގެ ހަރަދު ބޮޑުވުމާއެކު ސާފު ފައިދާގެ ގޮތުގައި ތިންވަނަ ކުއާޓަރުގައި ލިބުނު 127 މިލިއަން ރުފިޔާ އަކީ އޭގެ ކުރީ ކުއާޓަރާ އަޅާބަލާއިރު ނުވަ އިންސައްތައިގެ ދަށް ވުމެކެވެ. ދެވަނަ ކުއާޓަރުުގައި ސާފު ފައިދާގެ ގޮތުގައި އެ ކުންފުންޏަށް ލިބުނީ 141 މިލިއަން ރުފިޔާ އެވެ.
އުރީދޫ އަށް މިދިޔަ ކުއާޓަރުގައި އެންމެ ބޮޑު އާމްދަނީއެއް ލިބުނީ މޯބައިލް ހިދުމަތްތަކުންނެވެ. އެގޮތުން، މޯބައިލް ހިދުމަތްތަކުން ލިބުނު އާމްދަނީ ވެސް އޭގެ ކުރީ ކުއާޓަރާ އަޅާބަލާއިރު ވަނީ އިތުރުވެފައެވެ. މިދިޔަ ކުއާޓަރުގައި މޯބައިލް ހިދުމަތްތަކުން 363.2 މިލިއަން ރުފިޔާ ލިބިފައިވާއިރު، ދެވަނަ ކުއާޓަރުގައި ލިބުނީ 360.8 މިލިއަން ރުފިޔާ އެވެ.
މިހާތަނަށްއައިއިރު އެ ކުންފުންޏަށް މި އަހަރުގެ ތިން ކުއާޓަރު އެއްކޮށް ޖުމްލަ އާމްދަނީގެ ގޮތުގައި، 1.4 ބިލިއަން ރުފިޔާ ވަނީ ލިބިފައެވެ. އޭގެތެރެއިން 1 ބިލިއަން ރުފިޔާ ލިބިފައިވަނީ މޯބައިލް ހިދުމަތްތަކުގެ ބައިންނެވެ. މިއާއެކު، އަހަރުގެ ތިން ކުއާޓަރު އެއްކޮށް އެ ކުންފުންޏަށް ލިބުނު ޖުމްލަ ސާފު ފައިދާ އަކީ 416.4 މިލިއަން ރުފިޔާ އެވެ.
މިދިޔަ ކުއާޓަރުގައި އުރީދޫގެ 17 ވަނަ އަހަރީ ދުވަހާ ގުޅުވައިގެން ގްރޭޓަރ މާލޭ ރީޖަންގައި 5ޖީ ނެޓްވޯކްގެ ހިދުމަތްތައް ފުޅާކޮށްފައިވާއިރު، މިއަހަރު ގަތަރުގައި ބާއްވާ ފީފާ ވޯލްޑް ކަޕްގެ ސެމީ ފައިނަލް މެޗެއް ބަލަން އެ ގައުމަށް ހަތަރު މީހަކަށް ދެވޭނެ ޕްރޮމޯޝަނެއް "ވޯލްޑް ކަޕް ފޯރި 2022" ގެ ނަމުގައި އިފްތިތާހުކުރިއެވެ. މީގެއިތުރުން، "އަޕްގްރޭޑް ޔުއާ ވާލްޑް" ޓެގްލައިނާއެކު އުރީދޫ ގްރޫޕް ރީބްރޭންޑް ކުރީ ވެސް މިދިޔަ ކުއާޓަރުގައެވެ.
ސީއެސްއާރްގެ ދަށުން އަހަރީ ދުވަހުގެ މުނާސަބަތުގައި ގައުމީ ޓީމުގެ ކުޅުންތެރިންނާއެކު ފިޔަވަތީގެކުދިންގެ މެދުގައި އެކުވެރިކަމުގެ މެޗެއް ކުޅެވިގެންދިޔައިރު، ހިއުމަން ރައިޓްސް ކޮމިޝަން އޮފް މޯލްޑިވްސްއާ ގުޅިގެން "ހިއުމަން ރައިޓްސް ފެއާ" އެއް ވެސް ބޭއްވިގެންދިޔައެވެ. މިނިސްޓްރީ އޮފް އިސްލާމިކް އެފެއާޒާ ގުޅިގެން އެމްފައިސާ މެދުވެރިކޮށް ވަގްފު ފަންޑަށް ފައިސާ ޖަމާކުރެވޭނެ ގޮތް ތަޢާރަފްކުރުމާއި، ފިޔަވަތީ ކުދިންނާއެކު އީދުގެ ހާއްސަ އުފާފާޅުކުރުން ބާއްވައިފައިވެއެވެ.
އަހަރުގެ ތިންވަނަ ކުއާޓަރުގައި އުރީދޫން ސްޕޮންސާ ކޮށްގެން ބޭއްވި މުބާރާތްތަކުގެ ތެރޭގައި "އުރީދޫ ދިވެހި ޕްރިމިއާ ލީގު"، "ޓެކާސް ރިޒޯޓް ކަޕް" އަދި "ރާއްޖެ ރާޅު ދަތުރު 2022" ހިމެނެއެވެ. "ދިވެހި ފަންނާނުންގެ މިއުޒިކީ އީދު"ގެ ނަމުގައި ބޭއްވި އިވެންޓާއި "މޯލްޑިވްސް މެރިން އެކްސްޕޯ 2022"، "މޯލްޑިވްސް ބްރޯޑްކާސްޓް އެވޯޑްސް"، "ރާސް ޗެމްޕިއަންޝިޕް: އައްޑޫ އެޑިޝަން" އާއި "މޯލްޑިވްސް ހާފް މެރަތަން" އަދި "ސައުތު އޭޝިއަން ޓްރެވަލް އެވޯޑްސް، ސާޓާ"ގެ ޑިޖިޓަލް ޕާޓްނަރުގެ ގޮތުގައި ހަރަކާތްތެރިވެފައިވެއެވެ. މީގެއިތުރުން، "ޗަރުކޭސް ފެސްޓިވަލް 2022" ގެ މެއިން ސްޕޮންސަރެއްގެ ދައުރު އަދާކޮށްފައިވާއިރު، "ޓްރެވަލް ޓްރޭޑް މޯލްޑިވްސް 2022" ގެ ޕްލެޓިނަމް ޕާޓްނަރަކީ ވެސް އުރީދޫ އެވެ.