ދިރާގަށް މި އަހަރުގެ ތިންވަނަ ކުއާޓަރުގައި 627 މިލިއަން ރުފިޔާގެ އާމްދަނީއެއް ލިބިފައިވާކަމަށް އެ ކުންފުނީގެ މާލީ ހިސާބުތަކުން ދައްކައިފިއެވެ.
އެ ކުންފުނީގެ މިދިޔަ ކުއާޓަރުގެ މާލީ ރިޕޯޓުގައި ބަޔާންކޮށްފައިވާ ގޮތުގައި، ތިންވަނަ ކުއާޓަރުގައި 627.4 މިލިއަން ރުފިޔާގެ އާމްދަނީއެއް ވަނީ ލިބިފައެވެ. މިއީ އޭގެ ކުރީ ކުއާޓަރުގައި ލިބުނު 618.8 މިލިއަން ރުފިޔާގެ އާމްދަނީއާ އަޅާބަލާއިރު 1.3 އިންސައްތައިގެ އިތުރުވުމެކެވެ.
ދިރާގަށް ތިންވަނަ ކުއާޓަރުގައި ސާފު ފައިދާގެ ގޮތުގައި ލިބިފައިވަނީ 202.3 މިލިއަން ރުފިޔާ އެވެ. މިއީ އަހަރުގެ ދެވަނަ ކުއާޓަރުގައި ލިބުނު ސާފު ފައިދާއާ އަޅާބަލާއިރު 7.4 އިންސައްތައިގެ ދަށްވުމެކެވެ.
އެ ރިޕޯޓުގައި ފާހަގަކޮށްފައިވާ ގޮތުގައި، މި އަހަރުގެ ދެވަނަ ކުއާޓަރާ އަޅާބަލާއިރު މިދިޔަ ކުއާޓަރުގައި ދިރާގުގެ ވިޔަފާރީގެ މައިގަނޑު ބައިތަކުން ލިބުނު އާމްދަނީ ވެސް ރަނގަޅުވެފަ އެވެ. އެގޮތުން، މޯބައިލް ހިދުމަތްތަކުން އެ ކުންފުންޏަށް އާމްދަނީގެ ގޮތުގައި 316.8 މިލިއަން ރުފިޔާ ލިބިފައިވާއިރު، ދެވަނަ ކުއާޓަރުގައިި ލިބުނީ
312.8 މިލިއަން ރުފިޔާ އެވެ.
މި ކުއާޓާގައި ދިރާގުން ވަނީ ވަރަށް ގިނަ ހަރަކާތްތަކެއްގެ ސްޕޮންސަރެއްގެ ގޮތުގައި ހަރަކާތްތެރިވެފައެވެ. އޭގެތެރޭގައި، "ވިޒިޓް މޯލްޑިވްސް ޕްރޯ 2022 އައިބީސީ ބޮޑީބޯޑިންގ ވޯލްޑް ޓުއާ"، "އޭޝިއަން ބޮޑީބޯޑިންގ އެންޑް ފިޒީކް ސްޕޯޓްސް ޗެމްޕިއަންޝިޕް" ، ޑަބްލިއުޖިއީއޭ އޯޑިޓް އެސެމްބްލީ" އާއި "ރާއްޖެ އެޓޯލް ވޮލީބޯލް ޗެމްޕިއަންޝިޕް" އަދި "އިންޓަނޭޝަނަލް ޖޮއިންޓް ކޮންފަރެންސް ފޯރ ހެލްތުކެއާރ ޕްރޮފެޝަނަލްސް"ގެ އިތުރުން "ފުޑް އެންޑް ހޮސްޕިޓާލިޓީ އޭޝިއާ މޯލްޑިވްސް" އަދި "ސެންސަސް 2020" ހިމެނެއެވެ.
މީގެއިތުރުން، "މިނީ ބާސްކެޓްބޯލް ފެސްޓިވަލް"، "ސާބަ ވިމެންސް ޗެމްޕިއަންޝިޕް 2022"، "ނޭޝަނަލް ޔޫތު ޖޫނިއާ ޗެސް ޗެމްޕިއަންޝިޕް 2022"، "ތާޑް އެޑިޝަން އޮފް މަމެން އިންޓަ-ސްކޫލް ސައިކްލިން ޗެމްޕިއަންޝިޕް" އާއި "ބަންގްލަދޭޝް ކަލްޗަރަލް ނައިޓް 2022" ގެ ޑިޖިޓަލް ޕާޓްނަރުގެ ގޮތުގައި އާއި ބްރޭންޑް އެންގޭޖްމަންޓްގެ ތެރެއިން "ރޯލާ ސްޕޯޓްސް ޗެމްޕިއަންޝިޕް 2022" ގައި ހަރަކާތްތެރިވެފައިވެއެވެ.