ކޮންމެ މީހެއްގެ ވެސް ތަފާތު ގޮތެއް ހުންނާނެއެވެ. ތަފާތު މިޒާޖަކާއި ތަފާތު އުޅުންގަނޑެއް ހުންނާނެއެވެ. އެހެންނަމަވެސް މިއިން ކޮންމެ މިޒާޖަކާއި އުޅުމެއްގައިވެސް އަނެކާގެ ކަންކަން ކޮށްދިނުމުގައި ކޮންމެ މީހަކީވެސް އަވަސްވެގަންނަ މީހަކަށް ވާން އެބަ ޖެހެއެވެ. ބުނެ ކިޔައިގެން ނޫނީ ކަންކަން ކުރެވޭ މީހެއް ކަމުގައި ނުވާށެވެ. އަމިއްލަ އަށް ފެނިގެ ތިމާގެ އަމިއްލަ ކަންކަމާއި އަނެކާގެ ކަންކަން ކުރަން ދަސްކުރާށެވެ.
މީހެއްގެ ގާތުގައި ކަމަކު ކިޔުމަކީ އެއްވެސް މައްސަލައެއް އަދި ލަދުވެތިކަމެއް އޮތްކަމެއްވެސް ނޫނެވެ. އެހެންނަމަވެސް އެ މީހަކު އެކަމެއް ނުކޮށް އުޅޭނަމަ، އެ ކަމެއްގެ ވާހަކަ އެމީހެއްގެ ގާތުގައި ތަކުރާރުކޮށް ކިޔަން ޖެހިދެއެވެ. އެހިސާބުން އެއީ ގޯހެކެވެ. ނުވަތަ މައްސަލައެކެވެ. އެފަދަ ކަންކަން ތަކުރާރުކޮށް ބުނަން ނުހަދާށެވެ. އެއްފަހަރު ބުނުމުން ފުދެން ޖެހޭނެއެވެ. އާދޭހެވެ! ހަނދާން ނެތިދާނެއެވެ. އޭގެ މާނައަކީ ތަކުރާރުކޮށް ކިޔަން ޖެހުމެއް ނޫނެވެ. މިފަދައިން ތަކުރާރު ކުރަން ޖެހޭނަމަ، އަނެކާގެ ހިތުގައި ލަދުވެތިކަމަކާއި ނަފްރަތެއް އުފެދޭނެއެވެ.
ބައެއް މީހުންނަކީ އެމީހުންގެ ދިރިއުޅުމުގައި އެމީހުންގެ އަމިއްލަ ކަންކަން ވެސް، އިސްވެ ކުރަން ނޭނގޭ މީހުންނެވެ. އެމީހެއްގެ އަމިއްލަ ކަންކަން ވެސް ކުރަން ޖެހެނީ އެހެން މީހުން ބުނެ ކިޔައިގެންނެވެ. ގޭތެރޭގެ ސާފުތާހިރުކަމާއި އަމިއްލަ ނަފުސުގެ ސާފުތާހިރުކަމަށް ކުރަން ޖެހޭ ކަންކަން ވެސް އެއީ އަބަދު ކިޔަން ޖެހޭ ކަންކަން ކަމުގައި ވަނީނަމަ އެ މީހަކު ދެކެ އެހެން މީހުން ފޫހިވާން ފަށާނެއެވެ. ފަހަރުގައި އެއީ އޭނާގެ މިޒާޖު ކަމުގައި ވެދާނެއެވެ. އެހެންކަމުގައި ވަނީނަމަވެސް، އެއީ ރަނގަޅު ކުރަންޖެހޭނެ ކަމެކެވެ.
ރަނގަޅު ތައުލީމަކާއި މަދީ ސަނަދުތައް ހޯދައިގެން އުޅޭ މީހުންގެ ހާލަކީވެސް މިއެވެ. ކޮންމެވެސް ކަމަކާ އެމީހުންގެ ދިރިއުޅުން އަޅުވާ، އެމީހުންގެ އަމިއްލަ ކަންކަމާއި އަދި އެހެން މީހުން އެމީހުންނާއި ހަވާލުކޮށްފައި ހުންނަ ކަންކަން މަތިން ހަނދާން ނެތެއެވެ. އެއާއި އެކު އަނެކާ، އޭނާގެ ކިބައިން އެ ކަންކަން ހަނދާން ކޮށްދޭން ޖެހެއެވެ. އެއްފަހަރު ދެފަހަރަކު ނޫނެވެ. ތަކުރާރުކޮށް ކިތައްމެ ފަހަރެކެވެ. އެކަމެއް ވެ ނިމެންދެން ކިޔަން ޖެހެއެވެ.
އިންސާނުން ދުނިޔޭގައި އުޅެނީ އެކަކު އަނެކަކުގެ އެހީ ހޯދައިގެންނެވެ. އެނޫންގޮތަކަށް މިއީ އުޅެވެންވެސް ހުރި ތަނެއް ނޫނެވެ. އެހެންކަމުން އެހެން މީހުންގެ ކަންކަމުގައި ބުނެ ކިޔައިގެން ކަންކަން ކުރަން ނުހަދާށެވެ. އިސްވެ އަމިއްލަ އަަށް ފެނިގެން ކުރާށެވެ. އެއްފަހަރު ބުނެފި ކަމެއް، އެކަމެއްގެ ހަނދާން ހުރި އިރު އަވަހަށް އެކަމެއް ކޮށް ނިންމާލާށެވެ. ތަކުރާރުކޮށް ބުނަން ނުހަދާށެވެ. އަހަރެމެންނީ ބޮޑުވެ ތަަސައްރަފު ފުދިފައި ތިބި ބައެކެވެ. ވިސްނުމެއް ހުރިއްޔާ ބުއްދި އިސްކޮށް ވިސްނަބަލާށެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން