ނިމިދިޔަ އަހަރު ރާއްޖެ އަށް މުޅިން އަލަށް "މުލަ މޯލްޑިވްސް"ގެ ނަމުގައި ތަޢާރަފްކުރި ދިވެހި އަމިއްލަ ބްރޭންޑް އަށް އެއް އަހަރު ފުރުން ފާހަގަކުރަން މިވަނީ ނިންމާފައެވެ.
އެގޮތުން، "މުލަ މޯލްޑިވްސް" އަށް އެއް އަހަރު ފުރުމުގެ މުނާސަބަތުގައި ރާއްޖޭގެ މަޝްހޫރު ރިސޯޓް ބްރޭންޑް ކަމަށްވާ ސަން ސިޔާމް ރިސޯޓްސް އިން އެންމެ ފަހުން ހުޅުވި ރާއްޖޭގެ އެންމެ ބޮޑު ރިސޯޓް ކަމަށްވާ ސިޔާމް ވޯލްޑްގައި 2 ބޭފުޅަކަށް 2 ރެއާއި ތިން ދުވަހުގެ އޯލް އިންކްލޫސިވް ޕެކޭޖެއްދިނުމަށް ވަނީ ހަމަޖެހިފައެވެ.
މިއީ "މުލަ މޯލްޑިވްސް"ގެ އިންސްޓަގްރާމް ޕޭޖްގައި ކުރިއަށްގެންދާ ގިވްއަވޭގައި ބައިވެރިވެގެން ގުރުއަތުން ހޮވޭ ފަރާތަކަށް ލިބޭ ފުރުޞަތެކެވެ. މި ގިވްއަވޭއާ ގުޅޭ މަޢުލޫމާތު "މުލަ މޯލްޑިވްސް"ގެ އިންސްޓަގްރާމް ޕޭޖް އަދި ވެބްސައިޓް https://www.mulamaldives.com އިން ލިބެން ހުންނާނެ އެވެ. މި ގިވްއަވޭގައި ބައިވެރިވުމުގެ ފުރުޞަތު ދިވެހިންގެ އިތުރުން ބޭރުގެ ފަރާތްތަކަށް ވެސް ވަނީ ހުޅުވާލެވިފައެވެ.
"މުލަ މޯލްޑިވްސް" ލޯންޗްކޮށްފައިވަނީ ނިމިދިޔަ އަހަރު ރާޅުގަނޑުގައި "މުލަ މޯލްޑިވްސް"ގެ ފަރާތުން އިންތިޒާމްކުރި މުލަ ބޮޑީ ބޯޑިންގ ޗެލެންޖްގެ ތެރެއިން ޓުއަރިޒަމް މިނިސްޓަރު ޑރ. އަބްދުﷲ މައުސޫމް އެވެ. އަދި މި އިވެންޓްގައި ދިވެހިރާއްޖޭގެ ރައީސުލްޖުމްހޫރިއްޔާގެ އަނބިކަނބަލުން ފަޒްނާ އަހުމަދު ވެސް ބައިވެރިވެވަޑައިގެންނެވިއެވެ.
"މުލަ މޯލްޑިވްސް"ގެ ފައުންޑަރ، ހުސައިން ނިމާލް ފާހަގަކުރި ގޮތުގައި މި ގިވްއަވޭ އަކީ އެއް އަހަރުވުމުގެ މުނާސަބަތުގައި ބްރޭންޑްގެ ސަޕޯޓަރުންނަށް ޝުކުރު އަދާކުރުމުގެ ގޮތުން ދެވޭ ހަދިޔާ އެކެވެ.
"މުލަ މޯލްޑިވްސް" އަކީ ގަދަ އަވިން ހަންގަނޑަށް ލިބޭ ގެއްލުންތަކުން ރައްކާތެރިވުމަށްޓަކައި ބޭނުންކުރެވިދާނެ އުފެއްދުންތަކެއް ހިމެނޭ ދިވެހި ސަންކެއާ ބްރޭންޑެކެވެ. އޮސްޓްރޭލިއާގައި އުފައްދާފައިވާ އަދި އެ ގައުމުގެ ތެރެޕިއުޓިކް ގުޑްސް އެޑްމިނިސްޓްރޭޝަން އިން ސެޓްފިކެޓް ހޯދާފައިވާ މި އުފެެއްދުންތަކަކީ ތިމާވެއްޓާ ރަށްޓެހި އުފެއްދުންތަކެކެވެ.