އަހަރެމެންގެ އާންމު ދިރިއުޅުމުގައި އަހަރެމެން އެކަނިވެރިވާ ވާހަކަ އާއި އެކަނިވެރިކަން އިހުސާސް ކުރެވޭ ވާހަކަ ވަރަށް އާންމުކޮށް ދައްކާ އުޅެއެވެ. ތިމަންނާ އަކީ އެކަނިވެރިއެއް ކަމާއި އެކަނިވެރިކަމުގައި އެކަނި އުޅޭ މީހެެއްކަމަށް ބުނެވެއެވެ. ހަގީގަތަކީ އެއްވެސް މީހަކީ އެކަނިވެރިއެއް ނޫނެވެ. އެކަނިވެރިކަން އިހުސާސް ވިޔަސް އެއީ އެކަނިވެރިކަމެއް ނޫނެވެ. އެކަނިވެެރިކަން ގިނަފަހަރަށް މިނަނީ އެކަނިވެރިކަން މާނަ ކުރާ ގޮތުންނެވެ. ނުވަތަ އެކަނިވެރިކަމަށް އަމިއްލަ އަށް ދެކިގެން އުޅޭ އުޅުމުންނެވެ. 

ދީނީ ހަމައަކުން އެކަނިވެެރި ނުވާނޭކަން ބުނެދޭކަށް ނެތީމެވެ. އެހެނީ މާތް ﷲ އަބަދުވެސް އަހަރެމެންނާއި އެކުގައި ވާނެތީއެވެ. އެހާލަތުގެ ވާހަކަ މި ލިޔުމުގައި ނުދައްކާނަމެވެ. އެއީ އެއްމެންވަށް ވެސް އެނގޭ އެއްމެންވެސް ގަބޫލުކުރާ ކަމެކެވެ.

ގިނަފަހަރަށް އިންސާނާއަށް އެކަނިވެެރިކަން އިހުސާސް ކުރެވެނީ އޭނާގެ ދިރިއުޅުމުގައި އޭނާއަށް އެހީތެރިވެދޭނޭ އިތުރު މީހަކު ނެތްކަމަށް ހީކޮށެވެ. މިކަމުގައި އެކި މީހުން ދެކޭ ގޮތް ތަފާތުވެދެއެވެ. އެކަނިވެރިކަމަކީ ތިމާ އަމިއްލަ އަށް ގަބޫލުކުރާ ހަމައެއް ކަމަށް ވެދެއެވެ. އެހެނީ އެކަމެއްގައި ނުވަތަ ތިމާގެ ހަޔާތުގައި ތިމާއަށް މަދަދުދީ އަޅާލާ އެހީތެރިވާން ޖެހޭނީ ވަކި ބަޔަކު ކަމަށް ތިމާ އަމިއްލަ އަށް ގަބޫލުކުރެވޭތީއެވެ.

މިހާލަތުގައި އިންސާނާއަށް ވާ ގޮތަކީ އޭނާގެ ހަޔާތުގައި ނުވަތަ ދިރިއުޅުމުގައި އޭނާ އުންމީދު ކޮށްގެން ހުރި މީހުންގެ ކިބައިން، އެ މީހަކު އުންމީދު ކުރި މިންވަރަށް އަޅާލުމާ އޯގާތެރިކަމާއި ހިތްވަރު ނުލިބުމުން، އެކަމުގައި އެމީހަކީ އެކަނިވެރިއެއް ކަމަށް ނިންމުމެވެ. އިންސާނާގެ ޠަބީއަތުގައި އިހުސާސްތަކާއި ޖަޒުބާތުތައް ލައްވާފައިވުމުން އެކަން އެމަގުން ހިނގާފާނެއެވެ. އެހެނަސް އިންސާނާގެ އަނެއް ޠަބީއަތަކީ ވިސްނުމާ ފިކުރު ކުރުމުގެ ޠަބީއަތެވެ. ވީއިރު، އިންސާނާ ކަންކަމާއި މެދު ވިސްނާ ފިކުރުކޮށް އުޅޭނަމަ، އެކަނިވެރި ވާން ނުޖެހޭނެކަން އިނގޭނެއެވެ.

ތިމާ އުންމީދު ކުރާ މީހުންގެ ފަރާތުން، ތިމާ އުންމީދު ކުރި މިންވަރަށް އަޅާލުމާއި ހިތްވަރު ނުލިވުމަކީ އެކަނިވެރިކަން އިހުސާސް ކުރަން ޖެހޭ ކަމެއް ނޫނެވެ. ދުނިޔޭގައި އިންސީ ހުސްވީކީ ނޫނެވެ. އެކަކު ތިމާއަށް ބަލާ ނުލައިގެން އެކަނިވެެރިކަން އިހުސާސް ވާން ވީ ކީއްވެ ހެއްޔެވެ؟ އެކަނިވެރިކަން ފިލުވުމަށް އާއިލާގި އެހެން މެންބަރުން ނެތީ ހެއްޔެވެ؟ އެކުވެރި ރަހުމަތްތެރިއަކު ނެތީ ހެއްޔެވެ؟ ދުރުތާ ތިމާގެ މީހަކު ނެތީހެއްޔެވެ؟ ދަނެ ފަރިތަ މީހަކު ނެތީ ހެއްޔެވެ؟ ނުދަތަސް ފެންނަ މީހަކު ނަމަވެސް ނެތީ ހެއްޔެވެ؟ ބީރައްޓެއްސަކުވިޔަސް އަމުދުން ނެތީހެއްޔެވެ؟ އެކަނިވެެރިކަން ފިލުވާލާނެ، އޮޅު ޖަނަވާރެއްވެސް ނެތީ ހެއްޔެޗެ؟ ހައްތަހާވެސް އިންސާނާއަށް އޮތް ފުރުސަތު ތަކެވެ.

މި ހުރިހާ ފުރުސަތެއް އޮވެމެ، އެކަނިވެރިވާންވީ ކީއްވެ ހެއްޔެވެ؟ އެކަނިވެރިވާން ބޭނުން ނުވާ މީހާއަށް އެކަނިވެރި ނުވެ އުޅެވޭނޭ ކިތައްމެ މަގެއް މި ދުނިޔޭގައި ހުންނާނެއެވެ. އެކަނިވެރިކަމުގެ އިހުސާސުގައި ދުނިޔެ އަޅާދާންވީ ކީއްވެ ހެއްޔެވެ؟ ބުއްދިއެއް ވިސްނުމެއް ނެތީ ހެއްޔެވެ؟ މާޔޫސް ވާންވީ ހަމަ އެއްވެސް ކަމެއް އެބަ އޮތް ހެއްޔެވެ؟