އެންމެ ފަހުގެ ޒަމާނީ އަދި ބައިނަލްއަގުވާމީ މިންގަނޑުތަކަށް ފެތޭ މީޓަރު ޓެސްޓް ބެންޗެއް ހޯދައި، ކަރަންޓް މީޓަރު ޓެސްޓްކުރެވޭ ފެސިލިޓީއެއް ފެނަކަ ކޯޕަރޭޝަނުން ގާއިމްކޮށް، އެ ހިދުމަތް އިފްތިތާހުކޮށްފިއެވެ.
ފެނަކަ ހެޑް އޮފީހުގައި މިއަދު ހެނދުނު ބޭއްވި ހާއްސަ ރަސްމިއްޔާތެއްގައި މި ހިދުމަތް އިފްތިތާހުކޮށްދެއްވީ އެ ކުންފުނީގެ ޗެއަރމަން މުހައްމަދު ރަޝީދު އާއި މެނޭޖިންގ ޑިރެކްޓަރ އަހުމަދު ސައީދު މުހައްމަދު އެވެ.
ފެނަކަ އިން މިއަދު މި ދޭން ފެށުނު ހިދުމަތާއެކު މުޅި ރާއްޖޭގައި މީޓަރު ޓެސްޓްކުރުމަށް އެއް ފަރާތެއްގެ މައްޗަށް ވެފައިވާ ބަރޯސާ އަށް ނިމުމެއް އައިސް، ރާއްޖޭގެ އެކި ސަރަހައްދުތަކަށް ފަސޭހަކަމާއެކު އެ ހިދުމަތް ކުރިއަށް ގެންދެވޭނެ އެވެ.
މިއާއެކު، މީޓަރު ޓެސްޓްކުރުމުގެ ހިދުމަތް ހޯދުމަށް އަތޮޅުތެރޭ ރަށްރަށުގައި ރައްޔިތުން ކުރަންޖެހޭ ހޭދަ ވަރަށް ބޮޑުތަނުން ކުޑަވެގެންދާނެ ކަމަށް ފެނަކަ އިން ބުނެއެވެ.
ފެނަކައިން މިވަގުތު ބޭނުންކުރަމުން ދަނީ ގަޑިއިރަކު 75 މީޓަރު ޓެސްޓު ކުރެވޭ ވަރުގެ ފެންވަރު ހުރި ބެންޗެއް ކަމަށް އެ ކުންފުނިން ވަނީ ބުނެފަ އެވެ.
އެގޮތުން، އަތޮޅުތެރޭ ރަށްތަކުގެ ކަސްޓަމަރުންނަށް ހިދުމަތް އަވަސްވުމުގެ އިތުރުން އަލަށް ކަރަންޓްލުމުގެ ހިދުމަތަށް އެދޭ ފަރާތްތަކަށް ވެސް މިހާރަށްވުރެ އަވަހަށް ހިދުމަތް ލިބިގެންދާނެ އެވެ.
ފެނަކަ އިން ބުނީ، ކުރިމަގުގައި ރާއްޖޭގެ އެކި ސަރަހައްދުތަކުގައި މި ފަދަ ވަސީލަތްތައް ގާއިމްވެގެން ދިއުމުން މިހާރަށް ވުރެ އާއްމުންނަށް އެތައް ގޮތަކުން ލުއިފަސޭހަތައް ލިބިގެންދާނެ ކަމަށެވެ.