އަންހެނުންނަށް ދިމާވާ މައްސަރު ކަންތައްތަކަކީ ނުވަތަ ޕީރިއަޑުގެ ކަންތައްތަކަކީ ބައެއް މީހުނަށް ގަވައިދުން އަދި އަނެއްބައި މީހުންނަށް ނުގަވައިދުން ދިމާވަމުން އަންނަ ކަމެކެވެ. މިކަމުގައި އެ މީހެއްގެ ސިއްހީ ދުޅަހެޔޮކަން ބޮޑު ދައުރެއް އަދާކުރެއެވެ. ޕީރިއަޑުވުމުން ބައެއް އަންހެނުންނަށް އެހެން އަންހެނުންނާ ހިލާފަށް ގަދަ ރިހުމެއް ބަރުދާސްތުކުރަން ޖެހެއެވެ. މި ލިޔުމުގައި މި ބަލާލަނީ ޕީރިއަޑުވުމުން ބަނޑުގައި ރިހޭ ރިހުމަށް ގޭގައި ކުރެވިދާނޭ ބައެއް ފަރުވާތަކަށެވެ.
ހޫނަކީ ތަދު ފިލުވުމަށާއި އަރާމު އިހުސާސްކުރުމަށް ވަރަށްވެސް މުހިއްމު އެއްޗެކެވެ. ހޫނު ފެން އެޅޭ ގޮތަށް ހުންނަ، ބޯ ރަބަރު ދަބަހެއް ކަހަލަ އެއްޗެއް، (ހޮޓް ވޯޓާ ބޭގް) ބޭސް ފިހާރަ ތަކުގައި ވިއްކާނެއެވެ. ޕީރިއަޑްވުމުން މިފަދައިން، އާންމުކޮށް ގަދަ އަށް ރިހޭ މީހެއް ނަމަ މިފަދަ ބޭގެއް ގަނެގެން ގެންގުޅުން ވަރަށްވެސް މުހިންމެވެ. މި ބޭގުގެ ތެރެއަށް ހޫނުފެން އަޅާ މަތި ޖެހުމަށް ފަހު، ތުވާލި ގަނޑަކުން ނުވަތަ ފޮތިގަނޑަކުން ރަނގަޅަށް، އެ ބޭގުގެ ވަށާ އުޅާލާށެވެ. އެއަށްފަހު ހެދުން މަތިން، ރިހުން ނަގާ ހިސާބުގައި ބާއްވާލާށެވެ. ބައެއް ފަހަރަށް ބަނޑުދަށަށް ލާ، ބަނޑުން ވެސް އޮއެވިދާނެއެވެ. މިގޮތަށް ހޫނުން މާލީސް ކުރާއިރު، މާ ހޫނު ގަދަވިޔަ ނުދޭށެވެ. އެއް ހޫނު މިނެއްގައި ގިނައިރު ހިފެހެއްޓިފާ ހުރުމަކީ ބުއްދިވެރި ކަމެކެވެ. އިލެކްޓްރިކް ހޮޓް ވޯޓަރ ބޭގްވެސް މިހާރު ބާޒާރުން ލިބެން ހުންނާނެއެވެ.
ހޫނުގެ ސަބަބުން އެ ސަރަހައްދުގެ ލޭހޮޅިތައް ބޮޑުވެ ފުޅާވެއެވެ. ނަތީޖާ އަކީ ލޭ ހިނގުން ރަނގަޅުވެ، އޮކްސިޖަނުން އެ ސަރަހައްތުގެ ހަތާ ތަކާއި ހަތާރުތައް މުއްސަނދި ވުމެވެ. މިފަދައިން ކަން ހިނގުމުން އެ ސަރަހައްދުން ނަގާ ރިހުމުގެ އިހުސާސް ކުރެވޭ މިންވަރު ކުޑަވެއެވެ. ހޫނު ފެންފޮދެއް ނުވަތަ ސައިފޮދެއް ބޯލުމަކީވެސް މި މަގުން ތަދާއި ރިހުމުގެ އިހުސާސް ކުޑަކޮށްދިނުމަށް އެހީތެރިވެދޭނެ ކަމެކެވެ. މިކަމުގައި ވެސް ކަން ހިނގަނީ ހޫނުގެ ސަބަބުން ތަދު ފިލާ އާންމު އުސޫލުންނެވެ. ހޫނުފެނުން ފެން ވަރާލުމަކީވެސް ހަމަ މިމަގުން ތަދާއި ރިހުމަށް ލުއިކަމެއް ލިބިދާނޭ ކަމެކެވެ.
ފީރިއަޑްވުމުން ރިހޭ ރިހުމުގެ ސަބަބަކަށް ވަނީ ރަހިމުގެ މަސްތައް ހަރުވެ ކުރުގެޅޭ ގެޅުމެވެ. މިކަމުގައި އިންސާނާގެ ހަށިގަނޑު ގެންގުޅޭ ގޮތަކުން އެ ތަދުގެ އިހުސާސް ކުޑަކުރެވިދާނެއެވެ. އެއީ ރަހިމުގެ މަސްތައް ހަރުވެ ކުރުގެޅޭ ގެޅުމަށް ހިތްވަރެއް ދީގެންނެވެ. އުޑުފައިން އިނުމަކީ ޕީރިއަޑުގެ ރިހުން ކުޑަ ކުރެވިދާނޭ ކަމެއް ކަމަށް ދިރާސާވެރިން ދެކިލައްވައެވެ. ނަމަވެސް ސަމާލުކަން ދޭން ޖެހޭނެ ކަމަކީ މިފަދައިން އުޑުފައިން އިންނަ އިރު މިރަކަށި ސީދަލަށް ބެހެއްޓުމެވެ. އެހެންކަމުން މިކަމުގައި ތެދުފާރެއްގައި ބުރަކަށި ޖައްސާލައިގެން އުޑުފައިން އިނުން ބުއްދިވެރިއެވެ.
މައްސަރުކަންކަން ދިމާވާ ދުވަސްވަރު، ހާސްކަމާއި ނުތަނަވަސްކަންމަތީ ހުރުމަކީ އެކަމުގައި ވޭން އިތުރުވެދާ ކަމެކެވެ. އެހެންކަމުން އެފަދައިން ރިހުން އިތުރުވާނަމަ ހާސްކަމުން ދުރުވެ ހިތްހަމަ ޖެހުމެއް ހޯދާލާށެވެ. ހިތް އުފާވާނެފަދަ ކަމެއް ކޮށްލާށެވެ. މަސައްކަތުގެ މާހައުލުން ދުރަށްޖެހި ބޯ ހަމަ ޖައްސާލާށެވެ. މިއީވެސް ޕީރިއަޑް ރިހުން ލުއިކުރުމަށް ކުރެވިދާނެ ކަމެކެވެ.
ބޭހެއް ބޭނުން ކުރުމަކީވެސް ގޯސް ކަމެއް ނޫނެވެ. ކެތްނުވާ ވަރަށް ނުވަތަ އިށީނދެ ނުވަތަ އޮށޯވެ ނުއޮވެވޭ ވަރަށް ރިހޭނަމަ ޕެނަޑޯލްފަދަ ބޭހެއް ބޭނުން ކުރުމަކީ އެއްވެސް މައްސަލައެއް ނޫނެވެ. ނަމަވެސް ހަނދާނުގައި ބަހައްޓަންވީ ކަމަކީ ބޭސް ބޭނުން ކުރުމަކީ އާދައެއް ކަމުގައި ހަދައިގެން ނުވާނޭކަމެވެ.
ޕީރިއަޑްވުމާއި އެކު ރިހުމެއް އުފެދުމަކީ އާންމު ކަމެކެވެ. އަދި އެ ރިހުން ގަދަވުމަކީވެސް އާންމު ކަމެކެވެ. ކަންބޮޑުވާންވީ ކަމެއް އެކަމުގައި ނެތެވެ. ނަމަވެސް ޕީރިއަޑުވާ ކޮންމެ ފަހަރަކު އެހެން ގަދައަށް ރިހޭނަމަ އަންހެނުންގެ ހާއްސަ ޑަކްޓަރަކަށް ދައްކާލާ ޑަކްޓަރުގެ ލަފާ ހޯދާލުން މުހިންމެވެ.
ހަވާލާ: މޭރީ ޑެވިސް (2020) - އެވްރިޑޭ ހެލްތް