ލޯތްބަކީ އަަދަޔާ ހިލާފު ބާރެކެވެ. އަޖައިބެއްކަހަލަ ޖަޒުބާތެކެވެ. އެއީ އޯގަތެރިކަމާއި ހަމްދަރުދީގެ ޝައުގުވެރިކަމެކެވެ. ހޭހަންކުރުމާ އަޅާލުމުގެ ދަރުބާރެކެވެ. ލޯބީގައި އިންސާނުންގެ ލޯތަކުން ކަރުނަ ފާއްދާލާ ކިތައްމެ ވާހަކައެއް ކިޔާ އުޅެއެވެ. އެ ވާހަކަތަކަށް ތަމްސީލުތައްވެސް ކުޅެފައި ހުރެއެވެ. މިއީވެސް އެފަދަ ވާހަކައެވެ. ޒަމާނުއްސުރެ ލޯބީގެ ދަރުބާރުތަކުގައި، ލޯބީގެ އަޖައިބު ކުރަނިވި އަސަރުގެ ވާހަކަ ދައްކަން ކިޔާ އުޅޭ ވާހަކައެކެވެ.

އެއީ ދެމަފިރިއެއްގެ ވާހަކައެވެ. އާދައިގެ ދެރަ ދިރިއުޅުމެއް އުޅެމުން އައި ދެމަފިރިއެއްގެ ވާހަކައެވެ. ކައިވެންޏަށް އެތައް އަހަރެއް ފުރި، ދެމީހުންވެސް ތިބީ މުސްކުޅި އުމުރަށް އަޅާފައެވެ. އާއިލާއެއްގެ ތެރޭގައި ދިރުމާ ބަހާރު ގެނުވާ ކަމަކީ ދެމަފިރިންނަށް ލިބޭ ކުދިންކަމުގައި ކިޔާ އުޅެއެވެ. އެހެނަސް ތަގުދީރަކީ އެއްވެސް މީހަކަށް ބަދަލުކުރެވޭނެ އެއްޗެއް ނޫނެވެ.

ކަން ދިމާކުރިގޮތުން އެ ދެމަފިރިންނަކަށް ދަރިއަކު ނުލިބުނެވެ. ނަމަވެސް ފައިސާ ހުރިނަމަ، ފަރުވާކޮށްގެން އެކަން ކުރެވުނީހެވެ. އެ ތަނަވަސްކަން އެ ދެމަފިރިންގެ ނެތީއެވެ. ނަމަވެސް އުންމީދުކޮށްގެން ހުރީ އެ ފަރުވާ ކުރެވޭނެ ދުވަހަކަށެވެ. ތަގުދީރު މިފަހަރުވެސް އެ ފުރުސަތެއް އެދަމަފިރިންނަކަށް ނުދިނެވެ. މުސްކުޅި އުމުރަށް ފޯރި އިރުވެސް، އެ ތަނަވަސްކަމެއް އެދެމަފިރިންނަކަަށް ނުލިބުނެވެ.

މިއީ އެދެމަފިރިންގެ ހާލެވެ. ކިޔާ އަދި އުޅެނީ މިވާހަކައެއް ނޫނެވެ. އެއީ އެއްދުވަހެއްގެ ވަގުތެކެވެ. އަނބިމިހާ ގެ ބޮލުގެ އިސްތަށިގަނޑަކީ ދިގު އިސްތަށިގަނޑެކެވެ. ތީރި ފަން އިސްތަށިގަނޑެކެވެ. އެދުވަހު އަންހެން މީހާ އެދުނީ އޭނާގެ ބޮލުގައި ފުނާ އަޅައިދޭނޭ ރަނގަޅު ފުނައެއް ގަނެދިނުމަށެވެ. ނަމަވެސް ފިރިމީހާގެ ޖަވާބަކަށްވީ އޭނާގެ މަސައްކަތުގައި ބޭނުން ކުރާ ގަޑިއެއްގެ ކަމަރު ހަލާކުވެފައި އޮތުމުން، އިހަށް މުހިއްމު ކަމަކީ އެ ކަމަރު ހެދުން ކަމުގައެވެ. 

ކޮންމެއަކަސް އެދުވަހުގެ އެކަންތައް އެގޮތުގައި އޮވެ ނިމުނީއެވެ. ޖެހިގެން އައި ދުވަހު، ފިރިހެންމީހާ ބާޒާރުމައްޗަށް ނުކުތެވެ. އަދި ކަމަރު ހަލާކުވެފައި އޮތް ގަޑީގެ މައިގަނޑު ބާޒާރުގައި ހުރި މީހަކަށް ވިއްކާލިއެވެ. ކުރާ މަސައްކަތުގައި ކޮންމެވެސް އެހެން މަގެއް ހޯދުމަށް ގަސްތުކޮށެވެ. އަނބިމީހާގެ އެ އެދުން ފުއްދައި ދިނުމުގެ ޝައުގުވެރިކަމުގައެވެ.

އެ ލިބުނު ފައިސާކޮޅު ހިފައިގެން އެހެން ފިހާރައަކަށް ވަދެ، ފުނައެއް ގަތެވެ. ފުނާ ހިފައިގެން އެ ފިރިމީހާ ގެއަށް ދިޔައީ އޭނާގެ އަންހެނުންނަށް "ސަޕްރައިޒެއް" ދޭށެވެ. ނަމަވެސް "ސަޕްރައިޒް" ވީ ފިރިމީހާއެވެ. ގެއަށް ދިޔައިރު އަންހެނުން ހުރީ އޭނާގެ ބޮލުގެ އެ ދިގު އިސްތަށިގަނޑުން އެއްބައި ކޮށާލާ ކުރުކޮށްލާފައެވެ. އެހެނަސް އަނބިމީހާގެ އެ ރީތި ސިފައަށް ކުޑަވެސް ބަދަލެއް ނާދެއެވެ. ދެން އެ އަންހެން މީހާ، ފިރިމީހާ އަށް ދިނީ މުޅިން އައު ގަޑިއެކެވެ. އަންހެންމީހާ މި ހެދި ގޮތަކީ ބާޒާރުމަތީ ފެޝަން ފިހާރައަކަށް އޭނާގެ ބޮލުގެ އިސްތަށިކޮޅު ވިއްކާލީއެވެ. އެ ލިބުނު ލާރީގައި ފިރިމީހާއަށްޓަކައި ގަޑިއެއް ގަނެ ދިނީއެވެ.

އާދޭހެވެ! މި ވާހަކައިގެ އިބުރަތަކީ ލޯތްބަކީ ތަފާތު އެއްޗެއް ކަމެވެ. ލޯބީގައި ގުރުބާންވުމަކީ ޝައުގުވެރިކަމާއެކު ކުރެވޭނޭ ކަމެއްކަން މި ހާދިސާއިން އެނގެއެވެ. މި ވާހަކަ ޒަމާންތަކަށް ޖެހެންދެން ލޯބީގެ ދަރުބާރުތަކުގައި ދައްކާ ކިޔާ އުޅެނީ ސަބަބެއް ނެތިއެއް ނޫނެވެ. މިކަމުގައި ނުވިސްނާ ބަޔަކަށް އެއްޗެއް ފަހުމް ވުމަކީ ވުމަށްވުރެ ނުވުން ގާތް ކަމެކެވެ. އެހެންކަމުން ވިސްނައިފި ބަޔަކަށް މިއީ އިބުރަތުން ފުރިގެންވާ ވާހަކައެކެވެ.