މިފަހަރުގެ ފީފާ ވޯލްޑް ކަޕް ހުޅުވި މެޗުގައި މިރޭ އެނާ ވެލެންސިއާ ވައްދާލި ދެ ލަނޑާއެކު އިކުއޭޑޯ އިން 2-0 ގެ ނަތީޖާއަކުން ގަތަރު ބަލިކޮށްފިއެވެ. 

މިއީ ވޯލްޑް ކަޕްގެ 92 އަހަރުވީ ތާރީޚުގައި ވެސް ފުރަތަމަ މެޗުން މުބާރާތް ބާއްވާ ގައުމު ބަލިވި ފުރަތަމަ ފަހަރެވެ.

އަލް ބައިތު ސްޓޭޑިއަމްގައި މިރޭ ކުޅުނު މެޗުގައި ފެލިކްސް ސަންޗޭޒްގެ އިރުޝާދުގެ ދަށުން ކުޅެމުން އަންނަ ގަތަރުން ފެށީ ވަރަށް ބޮޑަށް ފަހަތަށް ޖެހިގެންނެވެ. އޭގެ ނަތީޖާއެއްގެ ގޮތުން، މެޗުގެ ތިންވަނަ މިނެޓުގައި އިކުއޭޑޯ އިން ވަނީ ގަތަރުގެ މިޑްފީލްޑްގެ ތެރެއިން ލިބުނު ހުސްޖާގަތަކުގެ އެހީގައި އެ ޓީމުގެ ކެޕްޓަން އެނާ ވެލެންސިއާ ލަނޑެއްޖަހައިފައެވެ. އެކަމަކު، ވީއޭއާރްގެ އެހީ ހޯދުމަށް ފަހު އިޓަލީގެ ރެފްރީ މަސިމޯ އިރާޓީ ނިންމީ އޮފްސައިޑް ގޯލެއް ކަމަށެވެ. މިއީ މި ފަހަރުގެ މުބާރާތުގައި މުޅިން އަލަށް ބޭނުންކުރާ ސެމީ އޮޓޮމެޓިކް އޮފްސައިޑް ޓެކްނޮލޮޖީގެ އެހީގައި ނިންމި ނިންމުމެކެވެ.

އިކުއޭޑޯ އިން މި މެޗުގައި ޖެހި ފުރަތަމަ ލަނޑު، 16 ވަނަ މިނެޓުގައި ލިބުނު ޕެނަލްޓީއަކުން ކާމިޔާބުކޮށްދިނީ ވެލެންސިއާ އެވެ. މިއީ ޕެނަލްޓީއޭރިޔާތެރެއިން އިކުއޭޑޯގެ ވެލެންސިއާ އަށް ގަތަރުގެ ގޯލްކީޕަރު ސާދް އަލް ޝީބް ކުރި ފައުލަކަށް ރެފްރީ ދިން ޕެނަލްޓީއެކެވެ.

ފުރަތަމަ ހާފު ނިމުމުގެ ކުރީން ވެލެންސިއާ ވަނީ އިކުއޭޑޯގެ ލީޑް ފުޅާކޮށްދީފައެވެ. މެޗުގެ 31 ވަނަ މިނެޓުގައި އަންޖެލޯ ޕްރެޝިއާޑޯ ނެގި ހުރަހަކުން ވެލެންސިއާ ޖެހި ބޮލުންނެވެ. މިއީ ވޯލްޑް ކަޕްގައި އޭނާ ޖެހި ފަސްވަނަ ލަނޑެވެ. އަދި އިކުއޭޑޯ އިން މި މުބާރާތުގައި އެންމެ ފަހުން ޖެހި ފަސް ގޯލް ވެސް ކާމިޔާބުކޮށްދިނީ ވެލެންސިއާ އެވެ.

ފުރަތަމަ ހާފެކޭ އެއްގޮތަށް ދެވަނަ ހާފުގައި ވެސް ގަތަރަށް މާއެދެވޭ ކުޅުމެއް ދެއްކިފައިނުވާއިރު، ގޯލަށް އަމާޒުކޮށް އެންމެ ހަމަލާއެއް ވެސް ފޮނުވާލެވިފައެއްނުވެއެވެ. ފަހު ހާފުގައި ގަތަރުގެ އަކްރަމް އަފީފް އާއި މުހައްމަދު މުންތާރީ ފޮނުވާލި ބޯޅަތައް ދިޔައީ ގޯލްގެ ދަނޑިމަތިން ބޭރަށެވެ.

މި މުބާރާތުގައި މާދަމާ ކުޅޭ ފުރަތަމަ މެޗުގައި އިރުއޮއްސި ހައެއް ޖަހާއިރު އިންގްލެންޑުން، އީރާނާ ދެކޮޅަށް ނިކުންނައިރު ދެވަނަ މެޗުގައި ރޭގަނޑު 9 ޖަހާއިރު ނެދަލެންޑްސް ބައްދަލުކުރާނީ ސެނެގޯލްއާ އެވެ. އަދި މާދަމާ ރޭގެ ފަހު މެޗުގައި އެމެރިކާ ނިކުންނާނީ ވޭލްސްއާ ދެކޮޅަވެ.