މިހާރު ގަތަރުގައި ކުރިއަށްދާ ފީފާ ވޯލްޑް ކަޕްގައި މިރޭ ކުޅުނު މެޗުގައި ފަހަތުންއަރައި 2-1 އިން ޖަރުމަން ބަލިކޮށް ޖަޕާނުން މުޅި ދުނިޔެ އަށް ސިހުން ގެނެސްފިއެވެ.

މިއީ ވޯލްޑް ކަޕްގެ ތާރީޚުގައި ދެވަނަ އަށް އެންމެ ކާމިޔާބު ޓީމު ކަމަށްވާ ޖަރުމަނުން ޖެހިޖެހިގެން ދެ މުބާރާތުގެ ފުރަތަމަ މެޗުން ބަލިވި ފުރަތަމަ ފަހަރެވެ. ޖަރުމަނުން ވަނީ ވޯލްޑް ކަޕްގެ ޓްރޮފީ ހަތަރު ފަހަރު އުފުލާލައިފައެވެ. މީގެކުރީން، 2018 ވަނަ އަހަރުގެ މުބާރާތުގެ ގްރޫޕް ސްޓޭޖުގެ ފުރަތަމަ މެޗުގައި މެކްސިކޯ އަތުން ވެސް އެ ޓީމު ވަނީ ބަލިވެފައެވެ. އެ މުބާރާތުން އެ ޓީމު ކެޓީ ގްރޫޕް ސްޓޭޖުންނެވެ.

އަލް ރައްޔާންގެ ޚަލީފާ އިންޓަނޭޝަނަލް ސްޓޭޑިއަމްގައި މިރޭ ކުޅުނު މެޗު ފެށިގެން 33 ވަނަ މިނެޓުގައި ލިބުނު ޕެނަލްޓީއަކުން ޖަރުމަނަށް ލީޑްނަގައިދިނީ އިލްކާއި ގުންޑޮގާން އެވެ. މިއީ ޕެނަލްޓީއޭރިޔާ ތެރެއިން އެ ޓީމުގެ ފުލްބެކް ޑޭވިޑް ރައުމް އަށް ޖަޕާނުގެ ގޯލްކީޕަރު ސުއީޗީ ގޮންޑާ ކުރި ފައުލަކަށް ރެފްރީ ދިން ޕެނަލްޓީއެކެވެ.

އޭގެކުރީން، ޖަޕާނުން ވަނީ ކައުންޓާ އެޓޭކެއްގައި ބޯޅަ ހިފައިގެން ކުރިއަށްޖެހިލާފައި ޖުންޔާ އީޓޯ ނެގި ހުރަހަކުން ފޯވާޑް ޑައިޒެން މައީޑާ ގޯލެއް ކާމިޔާބުކޮށްފައެވެ. ނަމަވެސް، ވީއޭއާރް އިން ބެލުމަށްފަހު އެ ބޯޅަ ފޮނުވާލިއިރު މައީޑާ އޮފްސައިޑް މަގާމެއްގައި ހުރިކަމަށް ނިންމައި ރެފްރީ އެ ލަނޑު ގަބޫލެއް ނުކުރިއެވެ.

ޖަރުމަނާ ދެކޮޅަށް ޖަޕާން ކުޅުނު މެޗުގެ ތެރެއިން. --

ދެވަނަ ހާފުގެ ކުރީކޮޅު ޖަޕާނުގެ ކޯޗު ހަޖީމޭ މޮރިޔާސޫ ގެނައި ބަދަލުތަކާއެކު އެ ޓީމުން ކުޅުން ރަނގަޅު ކުރިއެވެ. އޭގެ ނަތީޖާއެއްގެ ގޮތުން، ޖަޕާނުން މި މެޗުގައި އެއްވަރުކުރި ލަނޑު، 75 ވަނަ މިނެޓުގައި ކާމިޔާބުކޮށްދިނީ ރިޓްސޫ ޑުއާން އެވެ. މިއީ އެ ޓީމުގެ ޓަކޫމީ މިނަމީނޯ ފޮނުވާލި ހަމަލާއެއް ޖަރުމަނުގެ ގޯލްކީޕަރު މެނުއެލް ނޯޔާ މަތަކުރުމުން ދެވަނަ ފަހަރަށް އެ ބޯޅަ ޑުއާން އަށް ލިބުމުން އޭނާ ކާމިޔާބުކުރި ގޯލެކެވެ. މި ދެ ކުޅުންތެރިން ވެސް ކުޅެން ނިކުތީ ދެވަނަ ހާފުގައެވެ.

މެޗު ނިމެން ހަތް މިނެޓަށްވެފައިވަނިކޮށް ޖަޕާން މޮޅުވި ލަނޑުޖަހައިދިނީ ބުންޑެސްލީގާގެ ބޯކަމް އަށް ކުޅެމުން އަންނަ ޓަކޫމާ އަސާނޯ އެވެ. މިއީ އެ ޓީމުގެ ސެންޓްރަލް ޑިފެންސްގައި ކުޅެމުން އަންނަ ކޯ އިޓަކޫރާ ދިން ބޯޅައަކުން އަސާނޯ ކާމިޔާބުކުރި ގޯލެކެވެ.

މި މުބާރާތުގައި މިއަދު ހަވީރު ކުޅުނު މެޗުގައި މޮރޮކޯއާ ވާދަކޮށް އެންމެ ފަހުގެ ވޯލްޑް ކަޕްގެ ރަނަރަޕް ކްރޮއޭޝިއާ އަށް ޖެހުނީ ޕޮއިންޓަކުން ފުއްދާލާށެވެ. މި މެޗު ނިމުނީ ދެ ޓީމަށް ލަނޑެއްނުޖެހި އެއްވަރުވެގެންނެވެ. މިއީ މި ފަހަރުގެ މުބާރާތުގައި 0-0 އިން އެއްވަރުވި ތިންވަނަ މެޗެވެ.