ކޮސްޓަ ރީކާ އަތުން ސްޕެއިނަށް ރެކޯޑް މޮޅެއް، ކެނެޑާ އަތުން ބެލްޖިއަމް މޮޅުވެއްޖެ

ގަތަރުގައި މިހާރު ކުރިއަށްދާ ފީފާ ވޯލްޑް ކަޕްގައި ރޭ ކޮސްޓަ ރީކާ އަތުން ސްޕެއިނުން ރެކޯޑް މޮޅެއް ހޯދިއިރު، ބެލްޖިއަމުން ވަނީ ކެނެޑާ ބަލިކޮށްފައެވެ.

ސްޕެއިނުން ރޭ ކޮސްޓަ ރީކާ ބަލިކުރީ 7-0 އިންނެވެ. 36 އަހަރަށްފަހު ވޯލްޑް ކަޕަށް އެނބުރިއައި ކެނެޑާ އަތުން ބެލްޖިއަމް މޮޅުވީ 1-0 އިންނެވެ.

ރޭގެ މެޗަކީ ވޯލްޑް ކަޕްގެ ތާރީޚުގައި ސްޕެއިނުން އެންމެ ތަފާތު ބޮޑު ނަތީޖާއަކުން މޮޅުވި މެޗެވެ.

ދޯހާގެ އަލް ތުމާމާ ސްޓޭޑިއަމްގައި ރޭ ކުޅުނު މި މެޗު ފެށިގެން 11 ވަނަ މިނެޓުގައި ސްޕެއިނުގެ ފުރަތަމަ ލަނޑުޖަހައިދިނީ ޑަނީ އޮލްމޯ އެވެ. މިއީ ވޯލްޑް ކަޕްގައި ސްޕެއިނުން ކާމިޔާބުކުރި 100 ވަނަ ގޯލެވެ. ސްޕެއިނަކީ ވޯލްޑް ކަޕްގައި 100 ގޯލު ހަމަކުރި ހަވަނަ ގައުމެވެ. މީގެކުރިން، އެކަން ހާސިލްކުރީ ބްރެޒިލް، އާޖެންޓީނާ، އިޓަލީ އަދި ފްރާންސް އެވެ.

ސްޕެއިނުން ފުރަތަމަ ލަނޑުޖެހިތާ 10 ވަރަކަށް މިނެޓުގެ ތެރޭގައި އެ ޓީމުގެ ދެވަނަ ލަނޑުޖަހައިދިނީ މާކޯ އަސެންސިއޯ އެވެ. އަދި އޭގެފަހުން، މެޗުގެ ފުރަތަމަ ހާފު ނިމުމުގެ ކުރީން ފެރާން ޓޮރޭޒް ވަނީ އިތުރު ލަނޑެއްޖަހައި ނަތީޖާ 3-0 އަށް ބަދަލުކޮށްލާފައެވެ. ޓޮރޭޒް މި ލަނޑުޖެހީ ލިބުނު ޕެނަލްޓީއަކުންނެވެ. މިއީ ސްޕެއިނުގެ ފުލްބެކް ޖޯޑީ އަލްބާ އަށް ކޮސްޓަ ރީކާގެ ކުޅުންތެރިއަކު ކުރި ފައުލަކަށް ރެފްރީ ދިން ޕެނަލްޓީއެކެވެ.

ދެވަނަ ހާފުގެ ކުޅުން ފެށިތާ ނުވަވަނަ މިނެޓުގައި ޓޮރޭޒް ވަނީ ސްޕެއިނުގެ ހަތަރުވަނަ ލަނޑުޖަހައިދީފައެވެ. މިއާއެކު، ސްޕެއިނުގެ ކޯޗު ލުއިސް އެންރީކޭ ވަނީ 15 ވަރަކަށް މިނެޓުގެ ތެރޭގައި ފުރަތަމަ އެގާރަ އަށް ފަސް ބަދަލެއް ގެނެސްފައެވެ. އެގޮތުން، ޓޮރޭޒް އާއި ޕެޑްރީ އަދި ސާޖިއޯ ބުސްކެޓްސްގެ އިތުރުން އަލްބާ އާއި އަސެންސިއޯ ވަނީ ބަދަލުކޮށްފައެވެ. މި ކުޅުންތެރިންގެ ބަދަލުގައި ކުޅެން ނިކުތީ އަލްވާރޯ މޮރާޓާ، ކާލޯސް ސޮލެއާ، އަލެހަންދްރޯ ބާލްޑޭ، ކޯކޭ އަދި ނިކޯ ވިލިއަމްސް އެވެ.

މި މެޗުގައި ސްޕެއިނުން ޖެހި ފަސްވަނަ ލަނޑު، 74 ވަނަ މިނެޓުގައި ކާމިޔާބުކޮށްދިނީ ގަވީ އެވެ. މި ލަނޑާއެކު ބާސެލޯނާ އަށް ކުޅެމުން އަންނަ އުމުރުން 18 އަހަރުގެ ގަވީ ވަނީ ވޯލްޑް ކަޕްގައި ސްޕެއިނަށް ލަނޑުޖަހައިދިން އެންމެ ހަގު ކުޅުންތެރިޔާގެ ޝަރަފު ހޯދާފައެވެ. ސްޕެއިނުގެ ހަވަނަ ލަނޑު، 90 ވަނަ މިނެޓުގައި ސޮލެއާ ކާމިޔާބުކޮށްދީފައިވަނިކޮށް، އިތުރުވަގުތުގައި މޮރާޓާ ވަނީ އެ ޓީމުގެ ހަތްވަނަ ލަނޑުޖަހައި ރެކޯޑް ގާއިމްކޮށްފައެވެ.

މި މުބާރާތުގައި ރޭ ގްރޫޕް އެފްގައި ކުޅުނު މެޗުގައި ބެލްޖިއަމުން ވަނީ 1-0 އިން ކެނެޑާ ބަލިކޮށްފައެވެ. މިއީ ކެނެޑާ އިން ވޯލްޑް ކަޕްގައި ލަނޑެއްނުޖެހި ނިންމާލަންޖެހުނު ހަތަރުވަނަ މެޗެވެ. މިއީ ރެކޯޑެކެވެ. އަދި މިއީ އެ ޓީމުން ވޯލްޑް ކަޕްގައި ވާދަކުރާ ދެވަނަ ފަހަރެވެ. ކެނެޑާ އެންމެ ފުރަތަމަ ކުޅުނީ 1986 ވަނަ އަހަރުގެ މުބާރާތުގައެވެ.

އަލް ރައްޔާންގައި ހުންނަ އަހުމަދު ބިން އަލީ ސްޓޭޑިއަމްގައި ރޭ ކުޅުނު މި މެޗު ފެށިގެން 11 ވަނަ މިނެޓުގައި ކެނެޑާ އަށް ލީޑްނަގަން ރަނުގެ ފުރުޞަތެއްލިބި ވަނީ ބޭކާރުވެފައެވެ. ޕެނަލްޓީއޭރިޔާ ތެރެއިން ބެލްޖިއަމްގެ ޔަނިކް ފެރެއިރާ ކަރަސްކޯ އަތުގައި ބޯޅައިން ޖެހުމުން ލިބުނު މި ޕެނަލްޓީ ކެނެޑާގެ އަލްފޮންސޯ ޑޭވީސް ފޮނުވާލުމުން ބެލްޖިއަމްގެ ގޯލްކީޕަރު ތިބައުޓް ކޯޓުއާ މަތަކުރިއެވެ. މި މެޗުގައި ފެނިގެންދިޔަ ހަމައެކަނި ލަނޑު، 44 ވަނަ މިނެޓުގައި ބެލްޖިއަމަށް ކާމިޔާބުކޮށްދިނީ މިޝީ ބަޓްޝުއާޔީ އެވެ. އާއްމުކޮށް ބެލްޖިއަމްގެ ބެންޗުން ފަށާ ބަޓްޝުއާޔީ އަށް މި މެޗުގެ ފުރަތަމަ އެގާރަ އިން ޖާގަ ލިބުނީ އެ ޓީމުގެ އެއްވަނަ ފޯވާޑް ރޮމެލޫ ލުކާކޫ އަނިޔާގައި ހުރުމުންނެވެ.