އީރާނުން އިތުރުވަގުތުގައި ވައްދާލި ދެ ލަނޑާއެކު ވޭލްސް އަތުން މޮޅުވެއްޖެ

މިހާރު ގަތަރުގައި ކުރިއަށްދާ ފީފާ ވޯލްޑް ކަޕްގައި މިއަދު ކުޅުނު މެޗުގެ އިތުރުވަގުތުގައި ވައްދާލި ދެ ލަނޑާއެކު އީރާނުން 2-0 ގެ ނަތީޖާއަކުން ވޭލްސް އަތުން މޮޅުވެއްޖެއެވެ.

މިއީ މި ފަހަރުގެ މުބާރާތުގެ ގްރޫޕް ސްޓޭޖުގައި އީރާނުން މޮޅުވި ފުރަތަމަ ފަހަރެވެ. އެ ޓީމު ކުޅުނު ފުރަތަމަ މެޗުގައި 6-2 ގެ ތަފާތު ބޮޑު ނަތީޖާއަކުން ބަލިވިއިރު، އެ މެޗުގައި އެ ޓީމުގެ އެއްވަނަ ގޯލްކީޕަރު އަލީރެޒާ ބީރަންފާންދު އަށް އަނިޔާވެގެން ވަނީ ބަދަލުކޮށްފައެވެ.

މި ނަތީޖާއާއެކު އީރާން ވަނީ ގްރޫޕް ބީ ގެ ދެވަނަ މަގާމަށް ޖެހިލައިފައެވެ. މި ގްރޫޕުގެ އެއްވަނައިގައި އުޅޭ އިންގްލެންޑްގެ އިތުރުން އީރާނަށް ވެސް ލިބިފައިވަނީ ތިން ޕޮއިންޓެވެ. އިންގްލެންޑަށް ކުރިލިބެނީ ފައިދާ ގޯލްގެ ތަފާތުންނެވެ. ތިންވަނައިގައި އޮތް އެމެރިކާ އާއި އެންމެ ފުލުގައި އޮތް ވޭލްސް އަށް ވެސް ލިބިފައިވަނީ އެއް ޕޮއިންޓެވެ.

އަލް ރައްޔާންގައި ހުންނަ އަހްމަދު ބިން އަލީ ސްޓޭޑިއަމްގައި ކުޅުނު މި މެޗުގައި ފެނިގެންދިޔަ ހުރިހާ ގޯލެއް ވެސް ކާމިޔާބުކުރީ ދެވަނަ ހާފުގައެވެ. މި މެޗުގެ ފުރަތަމަ ހާފުގައި އީރާންގެ އަލީ ގޮލިޒާދޭ ގޯލެއް ކާމިޔާބުކުރި ނަމަވެސް ވީއޭއާރް އިން ބެލުމަށްފަހު އޮފްސައިޑް ކަމަށް ނިންމާ ރެފްރީ އެ ލަނޑު ގަބޫލެއްނުކުރިއެވެ. މި ހާފުގައި ވޭލްސް އަށް ލިބުނު އެންމެ ރަނގަޅު ފުރުޞަތުގައި ކީފާ މޫރ ފޮނުވާލި ބޯޅަ އީރާންގެ ގޯލްކީޕަރު އަލް ހޮސެއިނީ ވަނީ މަތަކޮށްފައެވެ.

ދެވަނަ ހާފުގެ ކުޅުން ފެށިގެން ހަވަނަ މިނެޓުގައި އީރާންގެ ފޯވާޑް ސަރްދާރް އަޒްމޫން ޕެނަލްޓީއޭރިޔާ ތެރެއިން ފޮނުވާލި ބޯޅަ ގޯލްގެ އަރިމަތީދަނޑިއަށް އަމާޒުވިއިރު، އެ ބޯޅަ ދެވަނަ ފަހަރަށް އެ ޓީމުގެ ގޮލިޒާދޭ އަށް ލިބުމުން އޭނާ ފޮނުވާލި ބޯޅަ ވެސް އަމާޒުވީ ގޯލްގެ ދަނޑިއަށެވެ. އެއަށްފަހު އެ ބޯޅަ އަޒްމޫން އަށް ލިބުމުން ފޮނުވާލި ބޯޅަ ވޭލްސްގެ ކީޕަރު ވޭން ހެނެސީ މަތަކުރިއެވެ.

އޭގެފަހުން، އީރާންގެ ސައީދު އެޒަތޮލާހީ އާއި މޮރްތޭޒާ ޕޫރަލިގަންޖީ ފޮނުވާލި ހަމަލާތައް ވޭލްސްގެ ކީޕަރު ހެނެސީ ހުއްޓުވިއިރު، ވޭލްސްގެ ބެން ޑޭވީސް ފޮނުވާލި ބޯޅަ އީރާންގެ ކީޕަރު އަލް ހޮސެއިނީ މަތަކުރިއެވެ.

މެޗުގެ 86 ވަނަ މިނެޓުގައި ވޭލްސްގެ ކީޕަރު ހެނެސީ އަށް ސީދާ ރަތެއް ދެއްކުމުން އެ ޓީމަށް ވަނީ މަައްސަލަތައް ކުރިމަތިވެފައެވެ. ހެނެސީ އަށް ރަތް ކާޑު ދެއްކީ، އީރާނުން ކުރި އެޓޭކެއް ހުއްޓުވަން ގޯލް އޭރިޔާ ދޫކޮށް ބޭރަށް ނިކުމެ ފައިން ބޯޅައިގައި ޖަހަން މަސައްކަތްކުރި ވަގުތު އީރާންގެ ފޯވާޑް މެހްދީ ތަރޭމީ އަށް ފައުލްކުރުމުންނެވެ. ރެފްރީ ފުރަތަމަ ރީނދޫ ކާޑު ދެއްކި ނަމަވެސް، ވީއޭއާރް އިން ބެލުމަށްފަހު ވަނީ ރަތް ކާޑު ދައްކާފައެވެ. މިއީ މި ފަހަރުގެ މުބާރާތުގައި ފެނިގެންދިޔަ ފުރަތަމަ ރަތް ކާޑެވެ.

މިއާއެކު، ވޭލްސް އިން ވަނީ އެ ޓީމުގެ މިޑްފީލްޑްގެ އެންމެ މުހިއްމު އެއް ކުޅުންތެރިޔާ ކަމަށްވާ އާރޮން ރަމްސީގެ ބަދަލުގައި ލެސްޓާ ސިޓީ އަށް ކުޅެމުން އަންނަ ގޯލްކީޕަރު ޑެނީ ވޯޑް ކުޅެން އަރުވާފައެވެ.

އެއް ކުޅުންތެރިއަކު މަދުކޮށް ކުޅެމުންދިޔަ ވޭލްސް ކޮޅަށް އީރާނުން ޖެހި ފުރަތަމަ ލަނޑު، އިތުރުވަގުތުގެ 8 ވަނަ މިނެޓުގައި ކާމިޔާބުކޮށްދިނީ ރޫޒްބޭ ޗެޝްމީ އެވެ. މިއީ ގޯލާއި ގާތްގަނޑަކަށް 20 ޔާޑު ދުރުން ފޮނުވާލި ބާރު ހަމަލާއަކުން ޗެޝްމީ ކާމިޔާބުކުރި ގޯލެކެވެ.

އަދި އޭގެފަހުން، މެޗުގެ އިތުރުވަގުތުގެ 11 ވަަނަ މިނެޓުގައި އީރާނުން ވަނީ ކައުންޓަ އެޓޭކެއްގައި އެ ޓީމުގެ ދެވަނަ ލަނޑުޖަހައި، މެޗުން ތިން ޕޮއިންޓް ކަށަވަރުކޮށްފައެވެ. ތަރޭމީ ދިން ޕާހަކުން ރަމިން ރެޒައިއަން މި ލަނޑުޖެހީ ވޭލްސްގެ ކީޕަރު ވޯޑްގެ ބޯމަތިން ބޯޅަ ހިއްލާލުމަށްފަހު ގޯލްގެ ތެރެއަށް ފޮނުވާލައިގެންނެވެ.