ގަތަރުގައި މިހާރު ކުރިއަށްދާ ފީފާ ވޯލްޑް ކަޕްގައި މިރޭ ކިލިއަން އެމްބާޕޭ ވައްދާލި ލަނޑާއެކު ފްރާންސުން 2-1 އިން ޑެންމާކް ބަލިކޮށް އެ މުބާރާތުގެ ދެވަނަ ބުރަށް ދަތުރުކޮށްފިއެވެ.

މި ނަތީޖާއާއެކު ފްރާންސް އޮތީ ކުޅުނު ދެ މެޗުން ލިބުނު ހަ ޕޮއިންޓާއެކު ގްރޫޕް ޑީ ގެ އެއްވަނައިގައެވެ. އޮސްޓްރޭލިއާ ދެވަނައިގައި އޮތީ ތިން ޕޮއިންޓާއެކު އެވެ. ޑެންމާކް އާއި ޓިއުނީޝިއާ އަށް ލިބިފައިވަނީ އެއް ޕޮއިންޓެވެ.

ދޯހާގެ ސްޓޭޑިއަމް 974 ގައި މިރޭ ކުޅުނު މި މެޗުގެ ފުރަތަމަ ހާފުގައި ދެ ޓީމަށް ވެސް ލަނޑުޖަހަން ލިބުނު ފުރުޞަތުތަކުގެ ބޭނުންހިފޭގޮތްނުވިއިރު، މި ހާފުގައި ލިބުނު އެންމެ ރަނގަޅު ފުރުޞަތުގައި ފްރާންސްގެ އެންޓޮއިން ގްރީޒްމަން ފޮނުވާލި ހިލޭޖެހުމަކުން އެޑްރިއެން ރަބިއޯ އަށް ލިބުނު ބޯޅަ ބޮލުން ފޮނުވާލުމުން ޑެންމާކްގެ ގޯލްކީޕަރު ކެސްޕާ ޝުމެއިކަލް ވަނީ މަތަކޮށްފައެވެ.

އޭގެފަހުން، ފުރަތަމަ ހާފުގެ 41 ވަނަ މިނެޓުގައި ފްރާންސަށް ލީޑްނަގައިދޭން އެމްބާޕޭ އަށް ލިބުނު ފުރުޞަތުގެ ވެސް ބޭނުމެއް ނުހިފުނެވެ. އެ ޓީމުގެ އޮސްމާނޭ ޑެމްބެލޭ ދިން ޕާހަކުން އެމްބާޕޭ ފޮނުވާލި ބޯޅަ ދިޔައީ ގޯލްގެ ހުރަސްދަނޑިމަތިންނެވެ.

ފްރާންސުން މި މެޗުގައި ލީޑްނެގީ 61 ވަނަ މިނެޓުގައި އެމްބާޕޭ ކާމިޔާބުކުރި ގޯލުންނެވެ. މިއީ ކައުންޓާ އެޓޭކެއްގައި އެ ޓީމުގެ ވާތު ފުލްބެކް ތިއޯ ހެނާންޑޭޒްއާ އެމްބާޕޭ ގުޅިގެން އުފެއްދި ހަމަލާއެކެވެ.

ފްރާންސުން ފޮނުވާލި ހަމަލާއެއް ޑެންމާކްގެ ގޯލްކީޕަރު ކެސްޕާ ޝުމެއިކަލް މަތަކުރަނީ. --ފޮޓޯ: ފީފާ

އެކަމަކު، އޭގެ ހަތް މިނެޓުފަހުން ޑެންމާކުން ވަނީ ނަތީޖާ އެއްވަރުކޮށްފައެވެ. މި ލަނޑު އެ ޓީމަށް ޖަހައިދިނީ އަންދްރެސް ކްރިސްޓެންސަން އެވެ. މިއީ އެ ޓީމުގެ މިޑްފީލްޑަރު ކްރިސްޓިއަން އެރިކްސަން ނެގި ކޯނަރަކުން ޕެނަލްޓީއޭރިޔާ ތެރެއަށް ހުރަސްވީ ބޯޅަ އެ ޓީމުގެ ޔޯކިމް އެންޑަސަން ބޮލުން ޖައްސާލުމުން ކްރިސްޓެންސަން އެ ބޯޅަ ލިބުމުން ބޮލުން ގޯލްގެ ތެރެއަށް ފޮނުވާލައިގެން ކާމިޔާބުކުރި ގޯލެކެވެ.

މެޗުގެ 73 ވަނަ މިނެޓުގައި ޑެންމާކްގެ ޔެސްޕާ ލިންޑްސްޓްރޮމް އަށް ލިބުނު ފުރުޞަތުގައި ފޮނުވާލި ބޯޅަ ފްރާންސްގެ ގޯލްކީޕަރު ހޫގޯ ލޮރިސް މަތަކުރިއިރު، އޭގެފަހުން އެ ޓީމުގެ ކެސްޕާ ޑޮލްބާގް ދިން ޕާހަކުން މާޓިން ބްރެއިތުވެއިޓް ފޮނުވާލި ބޯޅަ ބޭރަށް ދިޔައީ އަރިމަތީދަނޑީގައި ޖެހިފައެވެ.

މެޗު ނިމެން ހަތަރު މިނެޓަށްވެފައިވަނިކޮށް ފްރާންސް މޮޅުވި ލަނޑުޖަހައިދިނީ އެމްބާޕޭ އެވެ. އަރިމަތިން އެ ޓީމުގެ ފޯވާޑް ގްރީޒްމަން ނެގި ހުރަހަކުން ލިބުނު ބޯޅަ އެމްބާޕޭ ވަނީ ޑެންމާކްގެ ޑިފެންޑަރުންނަށް ފުރުޞަތެއްނުދީ ގޯލްގެ ތެރެއަށް ފޮނުވާލައިފައެވެ. މިއީ ފްރާންސްގެ ޖާޒީގައި އެމްބާޕޭ އެންމެ ފަހުން ކުޅުނު 12 މެޗުގައި ޖެހި 14 ވަނަ ލަނޑެވެ. އަދި މިއީ ވޯލްޑް ކަޕްގައި އެ ޓީމަށް އޭނާ ޖަހައިދިން ހަތްވަނަ ގޯލެވެ.

މި ގޯލާއެކު އެމްބާޕޭ ވަނީ ފްރާންސްގެ ގައުމީ ޓީމަށް މިހާތަނަށް އެންމެ ގިނަ ލަނޑުޖަހައިދިން ކުޅުންތެރިންގެ ލިސްޓުގެ ހަތްވަނައިގައި އުޅޭ ކުރީގެ ލެޖެންޑް ޒިނެދިން ޒިދާންއާ އެއްވަރަށް 31 ލަނޑުޖަހައިދީފައެވެ.