މިފަހަރުގެ ފީފާ ވޯލްޑް ކަޕްގައި ރޭ ސްޕެއިނާއި ޖަރުމަނު ވާދަކުރި މެޗުން ދެ ޓީމު 1-1 އިން އެއްވަރުވެގެން ނިމިއްޖެއެވެ.
ޖަރުމަނުން ފުރަތަމަ މެޗުގައި ޖަޕާން އަތުން ބަލިވިއިރު، ސްޕެއިނުން ވަނީ ރެކޯޑަކާއެކު ކޮސްޓަ ރީކާ ބަލިކޮށްފައެވެ. ރޭގެ ނަތީޖާއާއެކު މި ގްރޫޕުގައި ހިމެނޭ ހުރިހާ ޓީމަކަށް ވެސް އަމިއްލަ ބާރުގައި ދެވަނަ ބުރަށް ދިއުމުގެ ފުރުޞަތު އެބައޮތެވެ.
ގްރޫޕް އީ ގައި ކޮންމެ ޓީމެއް ދެ މެޗު ކުޅުނު އިރު، އެއްވަނައިގައި އުޅޭ ސްޕެއިނަށް ލިބިފައިވަނީ ހަތަރު ޕޮއިންޓެވެ. ދެވަނައިގައި އޮތް ޖަޕާނާއި، ތިންވަނައިގައި އޮތް ކޮސްޓަ ރީކާ އަށް ލިބިފައިވަނީ ތިން ޕޮއިންޓެވެ. ޖަޕާނަށް ކުރިލިބެނީ ފައިދާ ގޯލްގެ ތަފާތުންނެވެ. އެންމެ ފުލުގައި ޖަރުމަން އޮތީ އެއް ޕޮއިންޓާއެކު އެވެ.
ގަތަރުގެ އަލް ޚޯރްގައި ހުންނަ އަލް ބައިތު ސްޓޭޑިއަމްގައި ރޭ ކުޅުނު މެޗުގައި ފެނިގެންދިޔަ ހުރިހާ ގޯލެއް ވެސް ކާމިޔާބުކުރީ ދެވަނަ ހާފުގައެވެ. ފުރަތަމަ ހާފުގައި ލަނޑުޖަހާނެ އެންމެ ރަނގަޅު ފުރުޞަތެއްލިބުނީ ސްޕެއިނުގެ ޑަނީ އޮލްމޯ އަށެވެ. އޭނާ ފޮނުވާލި ބޯޅަ ޖަރުމަނުގެ ގޯލްކީޕަރު މެނުއެލް ނޯޔާ މަތަކުރުމުން ދިޔައީ ގޯލްގެ ހުރަސްދަނޑީގައި ޖެހިފައެވެ. މި ހާފުގައި އެ ޓީމުގެ ފުލްބެކް ޖޯޑީ އަލްބާ ދުރުން ފޮނުވާލި ބޯޅަ އަމާޒުވީ ގޯލްގެ އަރިމަތީ ދާގަނޑަށެވެ. އަދި މި ހާފުގައި ޖަރުމަނުން ގޯލެއް ކާމިޔާބުކުރިއިރު، އެ ޓީމުގެ ޑިފެންޑަރު އެންޓޯނިއޯ ރުޑިގާ އެ ބޯޅަ ފޮނުވާލިއިރު އޮފްސައިޑް މަގާމެއްގައި ހުރި ކަމަށް ރެފްރީ ނިންމީ ވީއޭއާރް އިން ބެލުމަށްފަހު އެވެ.
ސްޕެއިނުން ލީޑްނެގީ ފަހު ހާފުގައި ކުޅެން ނިކުތް ފޯވާޑް އަލްވާރޯ މޮރާޓާ ކާމިޔާބުކުރި ގޯލުންނެވެ. އޭނާ މި ލަނޑުޖެހީ 62 ވަނަ މިނެޓުގައެވެ. މެޗު ނިމެން ހަތް މިނެޓަށްވެފައިވަނިކޮށް ޖަރުމަނަށް އެއްވަރުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން ނިކުތް ފޯވާޑް ނިކްލަސް ފުލްކްރުގް އެވެ. އޭނާ ކުޅެން ނިކުތީ އެ ޓީމުގެ އަބަދަށްފެހި ފޯވާޑް ތޯމަސް މުލާގެ ބަދަލުގައެވެ.
މި ގްރޫޕުގެ ފަހު މެޗުތައް އަންނަ ހުކުރު ދުވަހު ކުރިއަށްދާއިރު، ހުރިހާ މެޗުތަކެއް ވެސް ކުޅެވޭނީ އެއް ގަޑިއެއްގައެވެ. އެގޮތުން، ސްޕެއިނުން ޖަޕާނާ ދެކޮޅަށް ނިކުންނައިރު، ޖަރުމަން ނިކުންނާނީ ކޮސްޓަ ރީކާއާ ދެކޮޅަށެވެ.
ހިޔާލު
ފޮނުއްވާ ޚިޔާލުތައް ޝާއިޢުކުރެވޭނީ އާންމު އިޖުތިމާއީ މިންގަނޑަށް ފެތޭތޯ ބެލުމަށް ފަހު ކަމުގައި ދަންނަވަން