އިންގްލެންޑަށް ގްރޫޕުގެ އެއްވަނަ، އީރާން ކަޓުވާލައި އެމެރިކާ އަށް ދެވަނަ

މިހާރު ގަތަރުގައި ކުރިއަށްދާ ފީފާ ވޯލްޑް ކަޕްގައި ރޭ ކުޅެވުނު ގްރޫޕް ބީ ގެ ފަހު މެޗުތަކަށްފަހު އިންގްލެންޑް މޮޅުވެ، އެއްވަނަ އަށް ޖެހިލިއިރު އީރާން ކަޓުވާލައި އެމެރިކާ އިން އެ ގްރޫޕުގެ ދެވަނަ ޓީމުގެ ގޮތުގައި ދެވަނަ ބުރަށް ދަތުރުކޮށްފިއެވެ.

މިއީ 2006 ވަނަ އަހަރުގެ ފަހުން ވޯލްޑް ކަޕްގެ ގްރޫޕް ސްޓޭޖުގެ އެއްވަނަ ޓީމުގެ ގޮތުގައި އިންގްލެންޑުން ދެވަނަ ބުރަށް ދަތުރުކުރި ފުރަތަމަ ފަހަރެވެ. އެ ފަހަރުގެ މުބާރާތުގެ ކުއާޓާ ފައިނަލްގައި އެ ޓީމު ކެޓީ ޕޯޗުގަލް އަތުންނެވެ.

އިންގްލެންޑުން 3-0 ގެ ނަތީޖާއަކުން ވޭލްސް ބަލިކުރިއިރު، އީރާން އަތުން އެމެރިކާ މޮޅުވީ 1-0 އިންނެވެ.

ރޭގެ މެޗުތަކަށްފަހު އިންގްލެންޑް އެއްވަނައިގައި އޮތީ ކުޅުނު ތިން މެޗުން ހަތް ޕޮއިންޓް ހޯދައިގެންނެވެ. ދެވަނައިގައި އެމެރިކާ އޮތީ ފަސް ޕޮއިންޓާއެކު އެވެ. އީރާން ތިންވަނައިގައި ތިން ޕޮއިންޓާއެކު އޮތްއިރު، އެންމެ ފުލުގައި އޮތް ވޭލްސް އަށް ލިބިފައިވަނީ އެއް ޕޮއިންޓެވެ.

އިންގްލެންޑުން ރޭގެ މެޗަށް ނިކުތީ އެންމެ ފަހުން ކުޅުނު މެޗުގެ ފުރަތަމަ އެގާރަ އަށް ތިން ބަދަލެއް ގެނެސްގެންނެވެ. އެގޮތުން، އިންގްލެންޑްގެ ކޯޗް ގަރެތު ސައުތުގޭޓް ވަނީ ކިއެރަން ޓްރިޕިއާ، މޭސަން މައުންޓް އާއި ބުކާޔޯ ސަކާގެ ބަދަލުގައި ކައިލް ވޯކާ، ޖޯޑަން ހެންޑަސަން އަދި މާކަސް ރަޝްފޯޑް އަށް ފުރަތަމަ އެގާރައިން ފުރުޞަތު ދީފައެވެ.

އަލް-ރައްޔާންގައި ހުންނަ އަހްމަދު ބިން އަލީ ސްޓޭޑިއަމްގައި ކުޅުނު މި މެޗުގައި ފެނިގެންދިޔަ ހުރިހާ ގޯލެއް ވެސް ކާމިޔާބުކުރީ ދެވަނަ ހާފުގައެވެ. ދެވަނަ ހާފުގެ ކުޅުން ފެށިގެން ފަސްވަނަ މިނެޓުގައި އިންގްލެންޑުން ލީޑްނެގީ މާކަސް ރަޝްފޯޑް ފޮނުވާލި ހިލޭޖެހުމަކުންނެވެ. 

އިންގްލެންޑުން ލީޑްނެގިތާ މިނެޓެއްފަހުން ފިލް ފޯޑެން ވަނީ ނަތީޖާ 2-0 އަށް ބަދަލުކޮށްލާފައެވެ. މިއީ އެ ޓީމުގެ ކެޕްޓަން ހެރީ ކޭން ނަގައިދިން ހުރަހަކުން ފޯޑެން ކާމިޔާބުކުރި ގޯލެކެވެ. މިއީ މި މުބާރާތުގައި ކޭން ހެދި ތިންވަނަ އެސިސްޓެވެ. ކޭން އަކީ 2002 ވަނަ އަހަރުގެ މުބާރާތުގައި ޑޭވިޑް ބެކަމް ތިން އެސިސްޓް ހެދިފަހުން، ވޯލްޑް ކަޕްގެ އެއް މުބާރާތެއްގައި ތިން ލަނޑުޖެހުމަށް އެހީތެރިވެދިން އިނގިރޭސި ފުރަތަމަ ކުޅުންތެރިޔާ އެވެ.

މެޗުގެ 68 ވަނަ މިނެޓުގައި އިންގްލެންޑްގެ ފަހު ލަނޑުޖަހައިދިނީ ވެސް ރަޝްފޯޑް އެވެ. މިއީ އެ ޓީމުގެ މިޑްފީލްޑަރު ކެލްވިން ފިލިޕްސް ފޮނުވާލި ބޯޅައެއް ވޭލްސްގެ ގޯލްކީޕަރު ވޯޑް މަތަކުރުމުން ދެވަނަ ފަހަރަށް އެ ބޯޅަ ރަޝްފޯޑް އަށް ލިބުމުން އޭނާ ކާމިޔާބުކުރި ގޯލެކެވެ. މިއީ މި ފަހަރުގެ މުބާރާތުގައި ރަޝްފޯޑް ޖެހި ތިންވަނަ ލަނޑެވެ. އަދި މިއީ ވޯލްޑް ކަޕްގެ ތާރީޚުގައި އިންގްލެންޑުން ކާމިޔާބުކުރި 100 ވަނަ ގޯލެވެ.

މި ގްރޫޕުގެ އަނެއް މެޗުގައި ރޭ އެމެރިކާ އިން ވަނީ 1-0 އިން އީރާން ބަލިކޮށްފައެވެ. މި މެޗުގައި ފެނިގެންދިޔަ ހަމައެކަނި ލަނޑު، 38 ވަނަ މިނެޓުގައި އެމެރިކާ އަށް ކާމިޔާބުކޮށްދިނީ ކްރިސްޓިއަން ޕުލިސިޗް އެވެ.

ރޭގެ މެޗު ކާމިޔާބުކޮށް އެމެރިކާ އިން ވަނީ ޖެހިޖެހިގެން ތިންވަނަ ފަހަރަށް ވޯލްޑް ކަޕްގެ ނޮކްއައުޓް ބުރަށް ދަތުރުކޮށްފައެވެ. އަދި މިއީ އީރާނުން އެ މުބާރާތުގެ ގްރޫޕް ސްޓޭޖުން ކެޓި ހަވަނަ ފަހަރެވެ.

މި މުބާރާތުގެ ނޮކްއައުޓް ބުރުގައި އެމެރިކާ އިން ނިކުންނާނީ ގްރޫޕް އޭ ގެ އެއްވަނަ މަގާމް ހޯދި ނެދަލެންޑްސް އާ އެވެ. އިންގްލެންޑް ނިކުންނާނީ ގްރޫޕް އޭ ގެ ދެވަނަ އަށް ދިޔަ ސެނެގޯލްއާ ދެކޮޅަށެވެ.