ބައެއް މީހުންނަކީ އެމީހުންގެ ވާހަކަ ދެއްކުމުގައި ތަފާތު ކަމެއް ހުންނަ މީހުންނެވެ. އެއީ އެއްބަހަކުން ވާހަކަ ދެއްކި ކަމުގައި ވީނަމަވެސް މެއެވެ. ވާހަކަ ދައްކާ ބަހުރުވަ އާއި ވާހަކަ ދައްކާ ރާގާއި ވާހަކަ ދެއްކުމުގައި ބޮލުގެ އިޝާރާތް ހުންނަ ގޮތާއި އަތުގެ ހަރަކާތްތައް ހުންނަ ގޮތެވެ. މި ލިޔުމުގައި މި ބަލާލަނީ ވާހަކަ ދެއްކުމުގައި އަތުގެ ހަރަކާތް ގިނަ މީހުންގެ އެ ވައްޓަފާޅިއަށެވެ. ބުނެވޭ ގޮތުގައި އިޓަލީ ވިލާތުގެ މީހުންނަކީ އެމީހުންގެ ވާހަކަ ދެއްކުމުގައި އަތުގެ ހަރަކާތްތައް ގިނަ ބައެކެވެ. އެހެންނަމަވެސް ކޮންމެ މުޖުތަމައެއްގައިވެސް އެފަދަ މީހުން އުޅޭނެއެވެ.

މިއީ އާދައިގެ ކަމެއް ހެއްޔެވެ؟ އާދޭހެވެ! މިއީ އާދައިގެ ކަމެކެވެ. ނަމަވެސް މިފަދައިން އަތުގެ ހަރަކާތް ގިނަ މީހަކާއި ވާހަކަ ދައްކާނަމަ ތަފާތު ކަމެއް ފާހަގަ ކުރެވޭނެއެވެ. އާންމު ގޮތެއްގައި ގިނަ މީހުންނަށް އަތުގެ އިޝާރާތް ބޭނުން ކުރެވެނީ ކޮންމެވެސް މަޖިލީހެއްގައި ނުވަތަ ޖަލްސާއެއްގައި ގިނަ ބަޔަކާއި މުހާތަބުކޮށް ވާހަކަ ދައްކާނަމައެވެ. އެނޫން ހާލަތްތަކުގައި އެ މީހުންގެ އަތުގެ ހަރަކާތްތައް މަދެވެ. މިއީ ވާހަކަ ދެއްކުމާއި އަތުގެ ހަރަކާތާ ގުޅުވައިގެން ދެކެވޭ ވާހަކަތަކުގައި އެއްނެ އާންމުކޮށް ކަން ހިނގާ އުސޫލެވެ.

ބައެއް މީހުންނަކީ އެކަކު އަނެކަކާއި ބައްދަލަވެ ވާހަކަ ދައްކާއިރުވެސް އަތުގެ ހަރަކާތް ގިނަ މީހުންނެވެ. އަދި އަނެއްބައި މީހުންނަކީ ފޯނުން ވާހަކަ ދައްކާއިރުވެސް އަތުގެ ހަރަކާތް ގިނަ މީހުންނެވެ. މިއީ އެމީހެއްގެ "ކަށީގައި ހިފާފާ ހުންނަ" ކަމެކެވެ. ބައެއް ފަހަރަށް މިއީ ޖެނެޓިކްސް ގެ ކަމަކަށްވެސް ވެދެއެވެ.

ހަގީގަތަކީ ވާހަކަ ދެއްކުމާއި އެކު އަތުގެ ހަރަކާތް ކުރުމަކީ އެ ވާހަކައެއް އެހެން މީހުންނަށް ނަގައިގަންނަން ފަސޭހަ ވެދާ ކަމެކެވެ. އަދި އެ ވާހަކަ އެއް ދައްކާ މީހާއަށް ބުނަން އުޅޭ އެއްޗެއް ފަސޭހަ ކަމާއެކު ބުނުމުގެ ގާބިލުކަންވެސް ލިބިދާ ކަމެކެވެ. ނަމަވެސް މިކަމުގައި މަންޒަރު ދެކޭ މީހާ އާއި އަޑުއަހަން ހުންނަ މީހާއަށް ބައެއް ފަހަރު އުނދަގޫ ވާ ގޮތްވެއެވެ. ގިނަފަހަރަށް މިހެން އުނދަގޫވަނީ އަތުގެ ހަރަކާތްތައް މާ ގިނަ ވީމައެވެ. 

ވާހަކަ ދައްކާއިރު އަތުގެ ހަރަކާތެއް ގެންގުޅުމަކީ ބުއްދިވެރި ކަމެކެވެ. ނަމަވެސް ވިސްނަން ޖެހޭނެ ކަންތައްތަކެއް ހުންނާނެއެވެ. އެއީ މާ ގިނައިން އަދި ބޮޑެތި ހަރަކާތްތަކެއް ނުކުރެމެވެ. ކޮންމެވެސް ވަރަކަށް ވާހަކައިގެ ފަޅުކަން ފިލާވަރަށް ހަރަކާތް ކުރުމެވެ. ކޮންމެ ކަމެއްގައިވެސް ހައްދެއް އޮންނާނެއޭ ބުނާ އުސޫލުން މިކަމުގައިވެސް ހައްދު ފަހަނަ އަޅާ ނުދާށެވެ. މިއީ ވާހަކަ ދެއްކުމުގައި ބޭނުނަތެރި ސިފައެއްކަމަށް ގިނަ މާހިރުން ދެކިލައްވައެވެ.