ޓިއުނީޝިއާ އަތުން ބަލިވިޔަސް ފްރާންސަށް އެއްވަނަ، އޮސްޓްރޭލިއާ އަށް ދެވަނަ

މިފަހަރުގެ ވޯލްޑް ކަޕްގައި މިރޭ ޓިއުނީޝިއާ އަތުން 1-0 އިން ބަލިވިނަމަވެސް، ފްރާންސުން ގްރޫޕު ޑީ ގެ އެއްވަނަ މަގާމް ހޯދިއިރު، ޑެންމާކް އަތުން 1-0 އިން ހޯދީ މޮޅާއެކު އޮސްޓްރޭލިއާ އިން ދެވަނަ ބުރަށް ދަތުރުކޮށްފިއެވެ.

މިއީ 2014 ވަނަ އަހަރުގެ ވޯލްޑް ކަޕްގެ ކުއާޓާ ފައިނަލްގައި ޖަރުމަނު އަތުން 1-0 އިން ބަލިވި ފަހުން އެ މުބާރާތުގައި ފްރާންސް ބަލިވި ފުރަތަމަ ފަހަރެވެ. އަދި މިއީ ވޯލްޑް ކަޕްގައި ޓިއުނީޝިއާ އެންމެ ފަހުން ކުޅުނު ހަތަރު މެޗުގެ ތެރެއިން މޮޅުވި ދެވަނަ މެޗެވެ. އަނެއްކޮޅުން މިއީ ފްރާންސް އަތުން ޓިއުނީޝިއާ މޮޅުވި ފުރަތަމަ ފަހަރު ވެސް މެއެވެ.

މި ނަތީޖާއާއެކު ފްރާންސަށް އެއްވަނަ ލިބުނީ ކުޅުނު ތިން މެޗުން ހޯދީ ހަ ޕޮއިންޓާއެކު އެވެ. ދެވަނައިގައި އޮތް އޮސްޓްރޭލިއާ އަށް ވެސް މިއަދަދަށް ޕޮއިންޓް ލިބިފައިވާއިރު، ފްރާންސަށް ކުރިލިބުނީ ގޯލްގެ ތަފާތުންނެވެ. ޓިއުނީޝިއާ ތިންވަނައިގައި އޮތީ ހަތަރު ޕޮއިންޓާއެކު އެވެ. އެންމެ ފުލުގައި އޮތް ޑެންމާކަށް ލިބުނީ އެއް ޕޮއިންޓެވެ.

ފްރާންސުން މިރޭގެ މެޗަށް ނިކުތީ އެންމެ ފަހުން ކުޅުނު މެޗުގެ ފުރަތަމަ އެގާރަ އަށް ނުވަ ބަދަލެއް ގެނެސްގެންނެވެ. އެގޮތުން، އެ މެޗުގެ ފުރަތަމަ އެގާރައިގައި ހިމެނުނު ކުޅުންތެރިންގެ ތެރެއިން މިރޭގެ މެޗުގައި ކުޅުނީ އައުރެލިން ޗުއަމެނީ އާއި ރަފައެލް ވަރާން އެވެ. ކިލިއަން އެމްބާޕޭ އާއި އެންޓޮއިން ގްރީޒްމަންގެ އިތުރުން އޮސްމާނޭ ޑެމްބެލޭ މެޗު ފެށީ ބެންޗުންނެވެ.

ގަތަރުގެ އަލް ރައްޔާންގެ އެޑިއުކޭޝަން ސިޓީ ސްޓޭޑިއަމްގައި ކުޅުނު މެޗުގެ 17 ވަނަ މިނެޓުގައި ޓިއުނީޝިއާ އަށް ލީޑްނަގައިދޭން އެ ޓީމުގެ ބެން ރޮމްދޭން އަށް ލިބުނު ފުރުޞަތުގައި ފޮނުވާލި ބޯޅަ އަމާޒުވީ ގޯލްގެ އަރިމަތީ ދާގަނޑަށެވެ. އޭގެކުރީން، އެ ޓީމުން ވަނީ މެޗުގެ ނުވަވަނަ މިނެޓުގައި ލަނޑެއްޖަހައިފައެވެ. އެކަމަކު، ވީއޭއާރް އިން ބެލުމަށްފަހު ރެފްރީ އެ ލަނޑު ގަބޫލެއްނުކުރިއެވެ.

މެޗުގެ 30 ވަނަ މިނެޓުގައި ޓިއުނީޝިއާގެ ބެން ސްލިމާނޭ ބޮލުން ފޮނުވާލި ބޯޅަ ފްރާންސްގެ ގޯލްކީޕަރު ސްޓީވް މަންޑަންޑާ މަތަކުރިއިރު، އޭގެ ފަސް މިނެޓުފަހުން ގޯލާއި 35 ޔާޑު ދުރުން ޓިއުނީޝިއާގެ ކެޕްޓަން ވަހްބީ ކަޒްރީ ފޮނުވާލި ހަމަލާގެ ހުރަހަކަށްވީ ވެސް މަންޑަންޑާ އެވެ.

ޓިއުނީޝިއާ އިން މި މެޗުގައި ޖެހި ހަމައެކަނި ލަނޑު، 58 ވަނަ މިނެޓުގައި ކާމިޔާބުކޮށްދިނީ ކަޒްރީ އެވެ. މިއީ ފްރާންސްގެ މެދުތެރެއިން ހެދުނު ގޯހެއްގެ ފައިދާނަގައި ޕެނަލްޓީއޭރިޔާ ތެރެއަށް ބޯޅަ ހިފައިގެން ވަދެ، ކަޒްރީ ކާމިޔާބުކުރި ގޯލެކެވެ.

ފްރާންސުން ލަނޑެއްޖެހޭތޯ ކުރި މަސައްކަތްތަކުގެ ތެރެއިން ފަހު ހާފުގައި ކުޅެން ނިކުތް ޑެމްބެލޭ ހުރަހަކުން ފޮނުވާލި ބޯޅައެއް ޓިއުނީޝިއާގެ ގޯލްކީޕަރު ޑާމެން ހުއްޓުވިއެވެ. އޭގެފަހުން، ގްރީޒްމަން ނެގި ކޯނަރަކުން ޑިސާސީ ބޮލުން ފޮނުވާލި ބޯޅަ ހުރަސްދަނޑިމަތިން ބޭރަށްދިޔައިރު، ޑެމްބެލޭ އަށް ދެން ލިބުނު ފުރުޞަތުގައި ފޮނުވާލި ބޯޅަ ޓިއުނީޝިއާގެ ކީޕަރު ޑާމެން މަތަކުރިއެވެ. 

އޭގެފަހުން، މެޗުގެ 89 ވަނަ މިނެޓުގައި އަރިމަތިން އެމްބާޕޭ ހިފައިގެން އޭރިޔާތެރެއަށް ވަނުމަށްފަހު ފޮނުވާލި ހަމަލާގެ ހުރަހަކަށްވީ ވެސް ޑާމެން އެވެ. އޭގެ މިނެޓެއްފަހުން، ގްރީޒްމަން ދިން ބޯޅައަކުން ރެންޑަލް ކޯލޯ މުއާނީ ފޮނުވާލި ހަމަލާ ދިޔައީ ދަނޑިކައިރިންނެވެ. 

މެޗުގެ އިތުރުވަގުތުގެ ގޮތުގައި 8 މިނެޓުގެ ތެރެއިން 3 ވަނަ މިނެޓުގައި ފްރާންސަށް ލިބުނު ހިލޭޖެހުމަކުން އެމްބާޕޭ ފޮނުވާލި ބޯޅަ އަމާޒުވީ ޕެނަލްޓީއޭރިޔާ ކުރިމަތީ އެތުރިފައިވާ ދިފާއީ ފާރަށެވެ. އަދި އޭގެފަހުން، މެޗުގެ އިތުރުވަގުތުގެ 8 ވަނަ މިނެޓުގައި ފްރާންސުން ގޯލެއް ކާމިޔާބުކުރިއިރު، ފުރަތަމަ ރެފްރީ ގޯލެއް ކަމަށް ނިންމިއެވެ. އެކަމަކު، ފަހުން ވީއޭއާރްގެ އެހީ ހޯދުމަށްފަހު ރެފްރީ ވަނީ އެ ބޯޅަ ލިބުމުގެ ކުރީން ފްރާންސްގެ ގްރީޒްމަން އޮފްސައިޑް މަގާމެއްގައި ހުރި ކަމަށް ނިންމާ އެ ލަނޑު ގަބޫލުނުކޮށްފައެވެ.

މި ގްރޫޕުގައި ހިމެނޭ އަނެއް ދެ ޓީމުގެ ކުރިމަތިލުމުގައި އޮސްޓްރޭލިއާ އިން ވަނީ 1-0 އިން ޑެންމާކް ބަލިކޮށްފައެވެ. މި މެޗުގެ ހަމައެކަނި ލަނޑު، 60 ވަނަ މިނެޓުގައި އޮސްޓްރޭލިއާ އަށް ކާމިޔާބުކޮށްދިނީ މެތިއު ލެކީ އެވެ.

މިއީ ވޯލްޑް ކަޕްގެ ތާރީޚުގައި އޮސްޓްރޭލިއާ އިން ޖެހިޖެހިގެން ދެ މެޗުން މޮޅުވި ފުރަތަމަ ފަހަރެވެ. އަދި މިއީ އެ ޓީމުން ގްރޫޕް ސްޓޭޖު ފަހަނައަޅައި ދިޔަ ދެވަނަ ފަހަރެވެ.