އެމެރިކާ ބަލިކޮށް ނެދަލެންޑްސް ކުއާޓާ އަށް

މިފަހަރުގެ ފީފާ ވޯލްޑް ކަޕްގެ ދެވަނަ ބުރުގައި މިރޭ އެމެރިކާ އަތުން 3-1 އިން ހޯދީ މޮޅާއެކު ނެދަލެންޑްސް އިން އެ މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.

މިއީ ނެދަލެންޑްސް މިހާތަނަށް ވާދަކުރި 11 ވޯލްޑް ކަޕްގެ ތެރެއިން ކުއާޓާ ފައިނަލަށް އެ ޓީމު ދަތުރުކުރި ހަތްވަނަ ފަހަރެވެ. މީގެތެރެއިން، ފަސް ފަހަރު އެ ޓީމު ސެމީގައި ވާދަކުރިއިރު، ތިން ފަހަރު ފައިނަލްގައި ކުޅެފައިވެއެވެ.

އަލް ރައްޔާންގައި ހުންނަ ޚަލީފާ އިންޓަނޭޝަނަލް ސްޓޭޑިއަމްގައި ކުޅުނު މެޗު ފެށިތަނާ އެމެރިކާ އިން ވަނީ ލަނޑެއްޖެހުމާ ގާތަށް ޖެހިލައިފައެވެ. މެޗުގެ ތިންވަނަ މިނެޓުގައި ނެދަލެންޑްސްގެ އޮފްސައިޑް މަޅިން ސަލާމަތްވެ، އެމެރިކާގެ ކްރިސްޓިއަން ޕުލިސިކް ހުހަށް ހުރެ ފޮނުވާލި ބޯޅަ ނެދަލެންޑްސްގެ ގޯލްކީޕަރު އަންދްރެއަސް ނޮޕާޓް މަތަކުރިއެވެ.

މެޗުގެ 10 ވަނަ މިނެޓުގައި ނެދަލެންޑްސް އިން ލީޑްނެގީ ވިންގް ބެކް، ޑެންޒެލް ޑަމްފްރީސް ދިން ޕާހަކުން މެމްފިސް ޑިޕާއީ ކާމިޔާބުކުރި ގޯލުންނެވެ. މިއީ ނެދަލެންޑްސްގެ ޖާޒީގައި ޑިޕާއީ ކާމިޔާބުކުރި 43 ވަނަ ގޯލެވެ.

މި ގޯލާއެކު، ޑިޕާއީ ވަނީ ނެދަލެންޑްސްގެ ތާރީޚުގައި އެންމެ ގިނަ ލަނޑުޖެހި ކުޅުންތެރިންގެ ލިސްޓުގެ ދެވަނަ އަށް ޖެހިލައިފައެވެ. މިހާތަނަށް އެ ޓީމަށް އެންމެ ގިނަ ލަނޑުޖަހައިދީފައިވަނީ 50 ގޯލާއެކު އެ ލިސްޓުގެ އެންމެ ކުރީގައި އުޅޭ ރޮބިން ވެން ޕާސީ އެވެ.

ފުރަތަމަ ހާފު ނިމެން ދެ މިނެޓަށްވެފައިވަނިކޮށް އެމެރިކާ އަށް އެއްވަރުކޮށްދޭން ޓިމޮތީ ވެއާ އަށް ލިބުނު ފުރުޞަތުގައި ފޮނުވާލި ބޯޅަ ނެދަލެންޑްސްގެ ކީޕަރު ނޮޕާޓް ހުއްޓުވިއެވެ. އޭގެފަހުން، މި ހާފުގެ އިތުރުވަގުތުގެ ފުރަތަމަ މިނެޓުގައި ނެދަލެންޑްސްގެ ދެވަނަ ލަނޑުޖަހައިދިނީ ޑޭލީ ބްލިންޑް އެވެ. މި ލަނޑުޖެހުމަށް އެހީތެރިވެދިނީ ވެސް ޑަމްފްރީސް އެވެ. މިއާއެކު، އޭނާ ވަނީ ވޯލްޑް ކަޕްގެ މެޗެއްގެ ފުރަތަމަ ހާފުގައި ދެ އެސިސްޓް ހެދި ނެދަލެންޑްސްގެ ފުރަތަމަ ކުޅުންތެރިޔާގެ ޝަރަފު ހޯދާފައެވެ.

ދެވަނަ ހާފުގެ ކުޅުން ފެށިގެން ފަސްވަނަ މިނެޓުގައި ޕުލިސިކް ނަގައިދިން ހުރަހަކުން ވެސްޓަން މެކެނީ ބޮލުން ފޮނުވާލި ބޯޅަ ނެދަލެންޑްސްގެ ކީޕަރު ނޮޕާޓް މަތަކުރިއެވެ. އޭގެފަހުން، ނެދަލެންޑްސްގެ ކުޅުންތެރިއަކު ފޮނުވާލި ބޯޅައެއް ދިފާއުކުރަން އުޅުމުގެ ތެރޭގައި އެމެރިކާގެ ޑިފެންޑަރު ވޯލްކާ ޒިމަމަން އަތުން ބައިކޮޅަށް ލަނޑެއްނުވަނީ ހަމަ ކިރިޔާ އެވެ. އެމެރިކާގެ ކީޕަރު މެޓް ޓާނާ ވަނީ އެ ބޯޅަ ސަލާމަތްކޮށްފައެވެ.

އަދި އޭގެފަހުން، ނެދަލެންޑްސްގެ ޓެއުން ކޫޕްމެއިނާސް އާއި ޑިޕާއީ ފޮނުވާލި ދެ ހަމަލާއެއް އެމެރިކާގެ ކީޕަރު ޓާނާ ހުއްޓުވިއެވެ. މި ހާފުގައި އެމެރިކާ އިން އެއްވަރުކުރަން ލިބުނު ފުރުޞަތުތަކުގެ ތެރެއިން ނެދަލެންޑްސްގެ ޑިފެންސަށް ހެދުނު ގޯހެއްގައި އެމެރިކާގެ ހާޖީ ރައިޓް ފޮނުވާލި ބޯޅަ ޑަމްފްރީސް ވަނީ ބްލޮކްކޮށްފައެވެ.

މި މެޗުގައި އެމެރިކާ އިން ޖެހި ހަމައެކަނި ލަނޑު، 76 ވަނަ މިނެޓުގައި ކާމިޔާބުކޮށްދިނީ ރައިޓް އެވެ. މިއީ ފަހު ހާފުގައި ކުޅެން ނިކުތް ޑެއަންޑްރެ ޔެޑްލިން ދިން ތުރޫ ޕާހަކުން ޕުލިސިކް ޖައްސާލި ބޯޅައަކުން ރައިޓް ކާމިޔާބުކުރި ގޯލެކެވެ.

މެޗުނިމެން ނުވަ މިނެޓަށްވެފައިވަނިކޮށް ޑަމްފްރީސް ވަނީ ނެދަލެންޑްސް އަށް އަލުން ދެލަނޑުގެ ލީޑް ދަމަހައްޓައިދީފައެވެ. މިއީ ބްލިންޑް ދިން ޕާހަކުން ޑަމްފްރީސް ކާމިޔާބުކުރި ގޯލެކެވެ.