މިހާރު ގަތަރުގައި ކުރިއަށްދާ ފީފާ ވޯލްޑް ކަޕްގެ ދެވަނަ ބުރުގައި ރޭ 2-1 އިން އޮސްޓްރޭލިއާ ބަލިކޮށް އާޖެންޓީނާ އިން އެ މުބާރާތުގެ ކުއާޓާ ފައިނަލަށް ދަތުރުކޮށްފިއެވެ.

މިއީ ވޯލްޑް ކަޕްގެ ދެވަނަ ބުރުގައި އެ ޓީމު އެންމެ ފަހުން ވާދަކުރި ހަ ފަހަރުގެ ތެރެއިން ކުއާޓާ އަށް ދަތުރުކުރި ފަސްވަނަ ފަހަރެވެ. އެ ޓީމު އެންމެ ފަހުން ދެވަނަ ބުރުން ކެޓީ 2018 ގައި ފްރާންސް އަތުންނެވެ. އަނެއްކޮޅުން ރޭގެ މެޗަކީ ވޯލްޑް ކަޕްގެ ތާރީޚުގައި ދެކުނު އެމެރިކާގެ ޓީމުތަކާ ދެކޮޅަށް އޮސްޓްރޭލިއާ އެންމެ ފަހުން ކުޅުނު ހަތަރު މެޗުގެ ތެރެއިން ބަލިވި ހަތަރުވަނަ ފަހަރެވެ.

މި މަހުގެ 10 ވާ ހޮނިހިރު ދުވަހު ކުޅުމަށް ހަމަޖެހިފައިވާ ކުއާޓާ ފައިނަލްގެ ދެވަނަ މެޗުގައި އާޖެންޓީނާ ނިކުންނާނީ ނެދަލެންޑްސްއާ ދެކޮޅަށެވެ.

އަލް ރައްޔާންގައި ހުންނަ އަހްމަދު ބިން އަލީ ސްޓޭޑިއަމްގައި ރޭ ކުޅުނު މެޗުގެ 35 ވަނަ މިނެޓުގައި އާޖެންޓީނާ އިން ލީޑްނެގީ އެ ޓީމުގެ ކެޕްޓަން ލިއޮނަލް މެސީ ކާމިޔާބުކުރި ގޯލުންނެވެ. މިއީ ނިކޮލަސް އޮޓަމެންޑީ ދިން ޕާހަކުން މެސީ ކާމިޔާބުކުރި ގޯލެކެވެ. މިއީ މެސީގެ ކެރިއަރުގައި ކުޅުނު 1،000 ވަނަ މެޗުގައި ޖެހި 789 ވަނަ ގޯލެވެ. އަދި މިއީ އެ މުބާރާތުގެ ނޮކްއައުޓް ބުރުގައި މެސީ ޖެހި ފުރަތަމަ ލަނޑެވެ.

އޮސްޓްރޭލިއާ އާ ދެކޮޅަށް އާޖެންޓީނާ ކުޅުނު މެޗުގެ ތެރެއިން. --ފޮޓޯ: ރޮއިޓާސް

މި ގޯލާއެކު މެސީ ވަނީ ވޯލްޑް ކަޕްގައި މިހާތަނަށް އާޖެންޓީނާ އަށް އެންމެ ގިނަ ލަނޑުޖެހި ކުޅުންތެރިންގެ ލިސްޓުގެ ދެވަނަ އަށް ޖެހިލައިފައެވެ. މި ލިސްޓުގެ އެންމެ ކުރީގައި 10 ލަނޑާއެކު ގެބްރިއެލް ބަޓިސްޓޫޓާ އުޅޭއިރު، ނުވަ ގޯލާއެކު މެސީ އުޅެނީ ދެވަނައިގައެވެ. ތިންވަނައިގައި އޮތް ޑިއޭގޯ މަރަޑޯނާ ވަނީ 8 ލަނޑުޖަހައިފައެވެ.

ދެވަނަ ހާފުގެ ކުޅުން ފެށިގެން 12 ވަރަކަށް މިނެޓުގެ ތެރޭގައި އާޖެންޓީނާގެ ދެވަނަ ލަނޑުޖަހައިދިނީ ހޫލިއަން އަލްވަރޭޒް އެވެ. މިއީ އޮސްޓްރޭލިއާގެ ގޯލްކީޕަރު މެޓް ރަޔާން އަށް ހެދުނު ގޯހެއްގެ ފައިދާނަގައި އަލްވަރޭޒް ކާމިޔާބުކުރި ގޯލެކެވެ.

މެޗުގެ 77 ވަނަ މިނެޓުގައި އާޖެންޓީނާގެ އެންޒޯ ފެނާންޑޭޒް އަތުން ބައިކޮޅަށް ވަތް ގޯލަކުން އޮސްޓްރޭލިއާ އިން ފަރަގު ކުޑަކުރިއެވެ. އޭގެފަހުން، އޮސްޓްރޭލިއާގެ އަޒީޒް ބެހިޗް އަށް ލިބުނު ފުރުޞަތުގައި ޕެނަލްޓީއޭރިޔާ ތެރެއަށް ވަދެ، ގޯލަށް އަމާޒުކޮށް ބޯޅަ ފޮނުވާލުމުގެ ކުރީން އާޖެންޓީނާގެ ޑިފެންޑަރު ލިސަންދްރޯ މާޓިނޭޒް ވަނީ ބްލޮކްކޮށްފައެވެ.

މި ހާފުގައި އާޖެންޓީނާ އަށް ލަނޑުޖަހަން ލިބުނު އެންމެ ރަނގަޅު ދެ ފުރުޞަތުގައި ލަޓާރޯ މާޓިނޭޒް ފޮނުވާލި ދެ ހަމަލާ ވެސް އޮސްޓްރޭލިއާގެ ކީޕަރު ރަޔާން މަތަކުރިއެވެ. އަދި އޭގެފަހުން، މެޗުގެ އިތުރުވަގުތުގެ ހަތްވަނަ މިނެޓުގައި އޮސްޓްރޭލިއާ އަށް އެއްވަރުކޮށްދޭން ގަރަން ކުއޯލް ފޮނުވާލި ހަމަލާ އާޖެންޓީނާގެ ގޯލްކީޕަރު އެމިލިއާނޯ މާޓިނޭޒް މަތަކުރިއެވެ.