ދުނިޔޭގައި އިންސާނާ ހިތާމަކޮށް ކަރުނަ އަޅާނޭ ކިތަންމެ ކަމެއް ދިމާވާނެއެވެ. ހިތްދަތިކަމާއި މާޔޫސްކަން ކުރިމަތި ކުރުވާ ކިތައްމެ ކަމެއްވެސް މެއެވެ. މިއިން ކޮންމެ ދަނޑިވަޅެއްގައި އިންސާނާއަށް އޮތީ ކެތްތެރިވުމެވެ. އަދި ހާއްސަކޮށް އެ އިންސާނާ އަކީ މުއުމިނެއް ކަމުގައިވާނަމަ، ކެތްކުރުން އަދި މާބޮޑަށް އައުލާކަން ބޮޑެވެ. އެހެނީ މުއުމިނެއް ނަމަ ޤަޟާޤަދަރަށް އީމާން ވާނެއެވެ. އަދި ﷲ ގެ ހަޟްރަތުން އުންމީދު ކަނޑައެއްވެސް ނުމެ ލާނެއެވެ.

މިފަދައިން ހިތްދަތިކަމާއި ކެކުޅުމާއި ވޭނެއް ބަރުދާސްތު ކުރާ މީހުންގެ (މުއުމިނުންގެ) ހިތްތަކަށް ސާބިތުކަން ދެއްވުމަށް މާތް ﷲ ކީރިތި ޤުރުއާނުގައި އެތައް އާޔަތެއް ވަނީ ބާވާލައްވަވާފައެވެ. އެފަދައިން އާލް އިމްރާން ސޫރަތުގެ 139 ވަނަ އާޔަތުގައި މާތް ﷲ ވަޙީ ކުރައްވާފައި ވެއެވެ.

﴿139﴾ وَلَا تَهِنُوا وَلَا تَحْزَنُوا وَأَنتُمُ الْأَعْلَوْنَ إِن كُنتُم مُّؤْمِنِينَ 

މާނައީ: ތިޔަބައިމީހުން (ފިނޑިވެ) ނިކަމެތި ނުވާށެވެ! އަދި، ތިޔަބައިމީހުން ހިތާމަވެސް ނުކުރާށެވެ! މަތިވެރިކަން ބޮޑުވެގެންވާ ބަޔަކީ ތިޔަބައިމީހުންނެވެ. (އެއީ) ތިޔަބައިމީހުން مؤمن ން ކަމުގައި ވާނަމައެވެ. (އާލް އިމްރާން 139 ވަނަ އާޔަތް)

އާދޭހެވެ! މިއާޔަތުން ދޭހަވާ އެއް ކަމަކީ މުއުމިނެއްނަމަ ފިނޑިވެ ނިކަމެތިވުމެއް ނެތްކަމެވެ. އަދި ހިތާމަކޮށް ހިތާމައިގެ މަތީ ދެމި ހުރުމެއްވެސް ނެތްކަމެވެ. އަދި މުއުމިނުންނީ މަތިވެރިވެގެންވާ ބަޔަކު ކަމުގައި ވާނޭ ކަންވެސް މި އާޔަތުން ދޭހަ ވެއެވެ. ކަން މިހެން ހުރުމާއި އެކު މުއުމިނުންނަށް ދިމާވާ މިފަދަ ހިތްދަތި ކަންކަމުގަޔާއި މޮޅިވެރިކަން އިހުސާސް ކުރަންޖެހޭ ފަދަ ނިކަމެތި ހާލަތްތަކުގައިވެސް ދެރަވެ ފިނޑި ނުވާށެވެ. މާތް ﷲ އަށް ފުރިހަމައަށް ކިޔަމަންގަނެ އެ އިލާހުގެ މަދަދަށް އެދޭށެވެ. އެ އިލާހުގެ ހަޞްރަތުން އުންމީދު ކަނޑާނުލާށެވެ. ނިކަމެތިވެ ފިނޑި ނުވުމަށާއި ހިތާމަ ނުކުރުމަށް އެންމެހާ މުއުމިނުންނަށް މާތް ﷲ މިވަނީ އެކަލާނގެ ވަޙީ ބަސްފުޅަކުން އަންގަވާ ދެއްވާފައެވެ.