އަކުނިވަޔަށްދެމުމަކީ އިންސާނުންގެ ހަށިގަނޑުގައި ހިނގާ އާންމު ކަމެކެވެ. އާންމު ގޮތެއްގައި އަނުވިޔަށްދަމަނީ ފައިގެ މަސްތަމެވެ. ފައިގެ މަސްތަކުންވެސް ހާއްސަކޮށް ކުޑަކަޅުވާ މަސްގަނޑެވެ. އަކުނިވަޔަށްދެމުމަކީ ކޮބާ ހެއްޔެވެ؟ އަކުނިވަޔަށްދަމަނީ ކީއްވެގެން ހެއްޔެވެ؟ ސަބަބު ތަކަކީ ކޮބާ ހެއްޔެވެ؟
އަކުނިވަޔަށްދެމުމަކީ އާންމު ކަމެއް ކަމަށް ވީއިރު މިއީ އިންސާނާގެ ފުރާނައަށް ނުރައްކާ ކުރުވާ ކަމެއް ނޫނެވެ. މިއީ ހަށިގަނޑިގައި ހުންނަ މަހުގެ ހަތާރުތައް އިހްތިޔާރަކާއި ނުލާ ކުއްލި ގޮތަކަށް ހަރުވެ ގުރުގެޅޭ ގެޅުމެކެވެ. މިކަން ވަމުން ދަނީ އާދައިގެ ވަރަށްވުރެ ބޮޑުކޮށެވެ. ނަތީޖާއަކަށް ވަނީ ކުއްލި ތަދެއް އިހުސާސް ކުރަން ޖެހުމެވެ. އަދި މިއީ އޭގެ އަމިއްލަ ޒާތުގައި ރަނގަޅުވެސް ވެދާ ކަމެކެވެ.
އާއްމު ގޮތެއްގައި އަކުނިވަޔަށްވަމަނީ އެ މަސްތަކަކަށް ބޭނުންވާ މިންވަރަށް ލޭ ފޯރުކޮށްނުދެވުމުވެ ސަބަބުންނެވެ. މިހެން އެކަށީގެންވާ މިންވަރަށް ލޭ ނުފޯރުމުގެ ނަތީޖާ އަކަށް ވަނީ އެ މަސްތަކަށް ބޭނުންވާ އޮކްސިޖަނާއި ކެވެނީގެ މާއްދާތައް ނުލިބުމުން އެ މަސްތައް ވަރުބަލިވެ ހަރުވެ ކުރުގެޅެނީއެވެ.
މައިބަދައަކީ ހަށިގަނޑުގެ ހިއްސީ މައި ނާރުތައް ދަތުރުކުރާ މައި ތަނެވެ. މައިބަދައިގެ ތެރެއިން ގުނަވަންތަކަށް ގޮސްފައި ހުންނަ ހިއްސީ ނާރުތައް ފިތޭ ކަމުގައި ވަނީނަމަ އެއީވެސް އަކުނިވަޔަަށްދަމާފާނޭ ސަބަބެކެވެ. މި ގޮތަށް މައިބަދައިގެ ތެރެއިން ހިއްސީ ނާރެއް ފިތެނީ މައިބަދަޔަށް ލިބޭ ކޮންމެވެސް އަނިޔާއެއްގެ ސަބަބުންނެވެ. މިގޮތަށް ފިތޭ ފިތުމުގައި ނުބައި މެޖެސުތަކެއް ގުނަވަނަށް ދެއެވެ. އެއާއި އެކު ގުނަވަނުގެ މައްޗަށް ނަފުސުގެ ކޮންޓްރޯލު ގެއްލި ގުނަވަން އަމިއްލަ އަށް އެ ނުވައި މެސެޖުތަކަށް ރައްދުދޭން މަސައްކަތް ކުރެއެވެ. ނަތީޖާއަކަށް ވަނީ އަކުނިވަޔަށްދެމުމެވެ.
އިންސާނާގެ ހަށިގަނޑުގައި ހުންނަ އިލެކްޓްރޯލައިޓްސް އޭ ކިޔާ މާއްދަަތަކަކީ ވަރަށް އެއް ހަމައެއްގައި ހުންނަން ޖެހޭ މާއްދާތަކެކެވެ. މި މާއްދާތަކުގެ ނަހަމަ ކަމަކީވެސް އަކުނިވަޔަށްދަމާފާނޭ ސަބަބެކެވެ. ލޭގެ ތެރޭގައި ހުންނަ ޕޮޓޭސިއަމް، ކެލްސިއަމް، މެގްނީސިއަމް އަދި ސޯޑިއަމް ގެ މިންވަރުތައް (މިއިން އެއްމާއްދާވެސް) ހުންނަން ވާރަށް ވުރެ މަތި ނުވަތަ ދަށްވެދާ ކަމުގައި ވަނީނަމަ މަސްތަކުގެ ހަތާރުތަކަށް ލިބޭ ކެވެނީގެ މިންވަރުގައި އަރާރުންވުންތަކެއް އުފެދޭނެއެވެ. އެކަމުގެ ނަތީޖާއެއްގެގޮތުންވެސް އަކުނިވަޔަށްދެމުވަކީ ވެދާނޭ ކަމެކެވެ.
ކުއްލިއަކަށް ބުރަކޮށް ވަރުބަލިވަންދެން މަސައްކަތް ކުރުމަކީ މަސްތަކަށް ބޭނުންވާ ލޭ އެކަށީގެންވާ މިންވަރަށް، އެ ހިނދުކޮޅުގައި ފޯރުކޮށް ނުދެވޭ މައިގަނޑު އެއް ސަބަބެވެ. ކުޅިވަރު ކުޅުމުގައި އަކުނިވަޔަށްދަމަނީ މިސަބަބާއި ހުރެއެވެ. މައިބަދައިގެ އަނިޔާތަކުގެ ސަބަބުން ހިއްސީ ނާރު ފިތޭ ގޮތްވެއެވެ. ހަށިގަނޑުން ފެން ދަމައިގަތުމާއި ހޫނު އަރާ އޮށްދާހިއްލުމާއި ގިނައިން ހޮޑު ލެވުމާއި ގިނައިން ބޭރަށް ހިނގުންފަދަ ކަންކަމުގެ ސަބަބުން އެލެކްޓްރޯލައިޓްސް ގެ ހަމަހަމަކަން ގެއްލި ދެއެވެ.
މި ބަލާލެވުނީ އަކުނިވަޔަށްދަމާ ބައެއް ސަބަބުތަކާއި އެ ސަބަބުތައް މެދުވެރިވެދާ ބައެއް ކަންކަމަށެވެ. މިއީ އެކަމެއް ދިމައިވުމުން މާބޮޑަށް މީހާ ހާސްވެ ނުތަނަވަސް ވާންވީ ކަމެއް ނޫނެވެ. މިއީ އިންސާނުންގެ ހަށިގަނޑުގައި ހިނގާ އާންމު ކަމެކެވެ. ނަވެސް އާދަވެ މާ ގިނައިން މިކަންކަން ދިމައިވާނަމަ، ސިއްހީ އެހީތެރިއެއްގެ ލާފާ ހޯދުން ބުއްދިވެރިއެވެ.