އޮޑިދޯނިފަހަރު ބަނުމުގެ މަސައްކަތުގައި ރ. އަލިފުށީގެ ވަޑިންނާ ވާދަކުރެވޭނެ އިތުރު ބަޔަކު ނުވެއެވެ. އޭރު އޮޑިދޯނިފަހަރު ބަންނަނީ ލަކުޑިންނެވެ. މިހާރު ފައިބަރްގްލާސް އިންނެވެ. ނަމަވެސް އަދިވެސް އަލިފުށީގެ ވަޑިންނަށްވުރެ ކުރިއަރައިގެން ދެވޭނެ ބަޔަކު ނެތެވެ. ކުރީގައި ބޮޑު ދޯންޏެއް ބަންނަ ނަމަ އޭގެ ކޮޅުދާލި ބޭނުންކޮށްގެން ކުޑަ ދޯންޏެއްވެސް ހަމަ އެހަރުގެ ތެރޭގައި ބަނދެވެމުން ދިއުން އެއީ ވަރަށް އާންމު ކަމެކެވެ. ގިނަ ފަހަރަށް އެއީ ބޮޑު ދޯނީގެ ބޮއްކުރައެވެ. ރަށްރަށުގައި ޖެޓީތައް ހެދިފައި ނެތް އިރުގައި ނަގިލިލާ، ފަޅުވެރިން ދޯންޏަށް ގެންގޮސް ގެނެސްދިނުމަށް ބޮއްކުރައެއް އިތުން މުހިންމެވެ. ނަމަވެސް މިހާރު ހުރިހާ ރަށެއްގައިހެން ޖެޓީތައް ހެދި ބޮއްކުރާގެ ބޭނުން ވަނީ ކުޑަވެފައެވެ. އަދި ދޯނިބަނުމަށް މި ބޭނުން ކުރެވެނީ ފައިބަރގްލާސްއެވެ. އެއީ ދަރުގެ ގޮތުގައިވެސް ބޭނުން ކުރެވޭ އެއްޗެއް ނޫނެވެ. އެހެންވިޔާ އެއިން ބާކީވާ ބައިތައް ހަމަ އުކާލާނީހެއްޔެވެ؟

މޯލްޑިވްސް މެރިން ސަރވިސަސްގެ މެނޭޖިންގ ޑިރެކްޓަރ ޢަލީ ޙަސަންގެ ޖަވާބު ވަރަށް ސާފެވެ. "ފައިބަރގްލާސްއަކީ ލަކުޑިއަށް ވުރެ އަގުބޮޑު އެއްޗެއް. ބާކީވާ ބައިތައް އުކާލުމުގެ ބަދަލުގައި އެ ބޭނުންކޮށްގެން އެހެން އުޅަނދުތައް ބަނދެވޭނެ". އޮޑިދޯނި ފަހަރު ބަނުމުގެ ދާއިރާއިން ރާއްޖެއިން ބޭރުން މަތީތަޢުލީމް ޙާޞިލްކުރި ފުރަތަމަ "މާވަޑި" ޢަލީ ޙަސަން އަކީ އުފެއްދުންތެރި ވިސްނުމެއްގެ ވެރިއެކެވެ. އޮޑިދޯނިފަހަރު ބަނުމުގެ ދާއިރާގައި 30 އަހަރަށްވުރެ ދިގު މުއްދަތެއް ހޭދަކޮށްފައިވާ އަދި މިހާރުވެސް ވަރަށް ފުޅާދާއިރާއެއްގައި މި މަސައްކަތް ކުރަމުން އަންނަ ޢަލީ ޙަސަންގެ މި މަސައްކަތްފެނި ގިނަ ބަޔަކަށް ފުރަތަމަ ލިބުނީ ހައިރާންކަމެވެ. ފައިބަރގްލާސް ކަފާފައި ބާކީވާ ބައިތަކުން އެހެން އުޅަނދެއް ބަންނާނެ ގޮތެއް ޚިޔާލަށް ގެންނަން އުނދަގުލެވެ.

"ލަކުޑިއަށްވުރެ ފައިބަރގްލާސް ބައްދަން މާ ފަސޭހަ ވާނެ. ފައިބަރގްލާސްގެ ދެ ބުރި އެއްކޮށްލާފައި ދެފަރާތުން މެޓް ޖަހާފައި ރެސިން ލުމުން ވަރަށް ވަރުގަދަ ވާނެ.ޕުޓީ އަޅާފައި ގާނައިގެން ބައްޓަންތައް ގެންނަންވެސް ވަރަށް ފަސޭހަ. ތައްގަނޑަށް އަޅައިގެން ބަންނަ ލޯންޗްތަކުގައި ހުންނަ އޮމާންކަމެއް ނުހުންނާނެ. ބަންނަމުންދާއިރު ހުންނާނީ އެކިތަންކޮޅު އެކިކުލައިގަ، ރީތިކަން ފެންނަނީ އެއްކޮށް ނިމުނީމަ. ނަމަވެސް ބާކީވާ ބައިތަކުން ތައްޔާރުކުރެވުނު އެއްޗެއްވީމާ ލިބޭ ހިތްހަމަ ޖެހުން ވަރަށް ބޮޑުވާނެ" ކޮޅުދާލި ބޭނުންކޮށްގެން 21 ފޫޓްގެ 3 ލޯންޗް ބަނދެފައިވާ ޢަލީ ކިޔާދިނެވެ. ފުރަތަމަ 2 ލޯންޗްގެ އިންޖީން އެޅުމާއި އެކު ކޮންމެ ލޯންޗެއް ވިއްކާލީ 80،000 ރުފިޔާއަށެވެ. 3 ވަނަ ލޯންޗް ބޭނުން ކުރަނީ ކުންފުނީގެ މަސައްކަތަށެވެ.

މިހިސާބުން ހިތްހަމަ ޖައްސާލައިގެން ހުންނާކަށް ޢަލީ ބޭނުމެއް ނުވެއެވެ. މިހާރު އަމާޒު ހިފާފައި ހުރި ކޮޅުދާލި ބޭނުންކޮށްގެން 55 ފޫޓުގެ ފިޝިންގެ ސަފާރީއެއް ބަނުމަށެވެ. މި ސަފާރީގައި 3 ކޮޓަރިއާއި ފާޚާނާ، ބަދިގެ އަދި ލައުންޖެއް އިންނާނެއެވެ. ޢަލީ ޙަސަންގެ ކުންފުނީ މޯލްޑިވްސް މެރިން ސަރވިސަސްގެ ފަރާތުން ބަނދެފައިވާ އޮޑިދޯނިފަހަރުގެ ފުރިހަމަ ކަމުގެ ވާހަކަ އެއީ ހުސްނުވާ ވާހަކައެކެވެ. ޚާއްސަކޮށް ޒަމާނީ މަސްދޯނިތަކުގެ އެތެރެ ފެނިފައިވާ އެއީ ކަނޑުގައި ދުއްވާ އުޅަނދެއްކަމަށް ވެސް ގަބޫލު ކުރަން އުނދަގޫ ވާނެއެވެ. އެހާވެސް ފުރިހަމަ އެވެ.

ތަފާތު އެއްޗެހި އުފެއްދުމަށްފަހު އެއިން ބާކީވާ ބައިތައް ބޭނުންކޮށްގެން ތަކެތި އުފައްދާ ވާހަކައަކީ އަޅުގަނޑުމެން ކޮންމެ ދުވަހަކުމެ އަޑުއަހާ ވާހަކަ ތަކެކެވެ. ނަމަވެސް ފައިބަރު ދޯނިފަހަރު ބަންނައިރު ބާކީވާ ބައިތަކުން އެހެން އުޅަނދު ބަންނަ ވިސްނުން މިއީ އަޅުގަނޑުމެނަށް އާ ނަމަވެސް ނުހަނު ބޭނުންތެރިކަމެކެވެ. ފައިބަރގްލާސް އިން ބާކީވާ ބައިތައް ނައްތާލުމަކީވެސް އެހާމެ އުނދަގޫ ކަމެކެވެ. މި ބައިތައް ނައްތާލުމަށް އަންދަނީ މީހުން ދިރިއުޅޭ ހިސާބާ ދުރުގައެވެ. ނަމަވެސް މީގެ ދުމުން ފުއްޕާމެއަށް ގެއްލުން ލިބުމުގެ ފުރުސަތު އޮވެއެވެ. މިކަމުގެ ސަބަބުން ފައިބަރގްލާސްގެ މަސައްކަތް ކުރަނީ އެކަމަށް ބޭނުންވާ ރައްކާތެރިކަމުގެ އާލާތްތައް އަޅައިގެންނެވެ. އެހެންކަމުން އެއް ދޯނި ބަނދެ ބާކީވާ ބައިތައް ނައްތާލުމުގެ ބަދަލުގައި އަލުން ބޭނުންކުރުމަށްވުރެ ވަކި ބުއްދިވެރި އަދި ހުރިހާ ގޮތަކުންވެސް ފައިދާހުރި ގޮތެއް ނެތެވެ.