އިންސާނާގެ ނަފްސުގެ ހަމަޖެހުމަކީ ކޮންމެ ދުވަހެއްގެ ވެސް ބާއްޖަވެރިކަމަށް އެޅޭ ވަރަށް ހެޔޮ ފާލެކެވެ. ނަފްސުގެ ހަމަޖެހުން ފެށޭ ހިސާބަކީ ކޮންމެ ދުވަހެއްގެ ފަތިސް ނަމާދެވެ. މިއީ އަހަރެމެން މުސްލިމުންނަށް ވީހިނދު އަހަރެމެން ގަބޫލުކުރާ ހަމައެވެ. އަދި އެކަން އޮތްގޮތްވެސް މެއެވެ. މިކަމާ ޖަދަލުކޮށް ވާހަކަ ދެއްކުމެއް ނެތެވެ. 

ނަފްސުގެ ހަމަޖެހުމުގައި ފަތިސްނަމާދަކީ އެއްމެ އަސާސީ އެއް ކަންތަކެވެ. އަދި އެއީ ބަދަލެއް ނުވާނޭ ކަމެކެވެ. އެހެންކަމުން ފަތިސް ނަމާދުގެ އިތުރުން، ނަފްސުގެ ހަމަ ޖެހުމަށް ކުރެވިދާނޭ އިތުރުކަމެއް އޮތްތޯ ނެތްތޯވެސް ބެލުމަކީ އަދި ގޯސްކަމެއް ނޫނެވެ. ފަތިސްނަމާދު ކުރުމާއި އެކު އެފަދަ ކަމެއް ކޮށްފި މީހާގެ އެ ދުވަހެއްގެ ހަޔާތުގައި ނަފްސުގެ ހަމަ ޖެހުން ބޮޑުކޮށް ފެންނާން ހުންނާނެއެވެ.

އާދޭހެވެ! ދިރާސާވެރިން ދެކިލައްވާ ގޮތުގައި ކޮންމެ ދުވަހެެއްގެ މަސައްކަތްތައް ފެށުމުގެ ކުރިން ކޮންމެވެސް އުފާވެރި ހަބަރެއް ކިޔާލުމަކީ އެ ދުވަހެއްގައި ނަފްސުގެ ހަމަޖެހުން ދުނިޔަވީގޮތުން ލިބިދާ ކަމެކެވެ. އެކި އެކި ތަފާތު ނޫސް މަޖައްލާތައް ކަރުދާހުގައްޔާއި އޮންލައިންކޮށް މިއަދު ލިބެން އެބަ ހުރެއެވެ. އެހެންކަމުން ކޮންމެ ދުވަހަކުވެސް ދުވަހުގެ މަސައްކަތްތައް ފެށުމުގެ ކުރިން އެއިން ނޫހެއް ނުވަތަ މަޖައްލާއެއް ހުޅުވާލާ ބަލާލާށެވެ. އަދި އުފާވެރި ކޮންމެވެސް ހަބަރެއް ކިޔާލާށެވެ. ހިތާމަވެރި ހަބަރުތަކާ އިހަށް ދުރުވެލާށެވެ.

މިފަދައިން އުފާވެރި ހަބަރެއް ކިޔުމުން، ހަށިގަނޑުގައި އުފާވެރިކަން އިހުސާސް ކުރުވާ ހޯމޯނުތައް ގިނަވެގެން ދެއެވެ. ނަތީޖާއަކަށް ވަނީ ނަފްސުގެ މައްޗަށް އޮންނަ އިތުބާރު ބޮޑުވެ މަސައްކަތުގައި ހީވާގިކަން އިތުރުވުމެވެ. މިއީ މަސައްކަތުގެ ފެންވަރު ރަނގަޅު ވުމަށްވެސް އޮތް ވަރަށް ފަހި މަގެކެވެ.

ތަފާތު ނޫސްތަކާއި މަޖައްލާތަކުގައި ތަފާތު ހަބަރުތައް މިއަދު ހުރެއެވެ. މަދެއްކޮށެއް ނޫނެވެ. އެހެންކަމުން މިފަދައިން އުފާވެރި ހަބަރެއް ކިޔާލުމަކީ މާ އުނދަގޫ ކަމެއް ނޫނެވެ. މަސައްކަތު މާހައުލަށް ގޮސް، މަސައްކަތްތައް ފެރުމުގެ ކުރިން ވެސް މިފަދަ ހަބަރެއް ކިޔާލެވިދާނެއެވެ. އެދާ ގޮތަށް ގޮސް މަސައްކަތްތަކައިގެން އުޅުމުގެ ބަދަލުގައި ނަފްސު ހަމަ ޖައްސާލާށެވެ. ކުޑަ ފެންފޮދެއް ބޯލާށެވެ. ހަމަ ޖެހިލައިގެން އިށީނދެލާށެވެ. އެއަށްފަހު ކޮންމެވެސް ލުއި، އުފާވެރި ހަބަރެއް ހިޔާށެވެ. އެއިން ކޮންމެވެސް އުފާވެރިކަމެއް ހޯދާ ހިތްވަރެއް ލިބިގަންނާށެވެ. ނަފްސުގެ ހަމަޖެހުން ހޯދަން މިއީވެސް ކޮށްލުން ރަނގަޅު ކަންކަމެވެ.