ފެނަކަ އިން ހުވަދު އަތޮޅު އުތުރުބުރީ ނިލަންދޫގައި އެޅި އައު އިންޖީނުގެއާއި އޮފީސް އިމާރާތް، ރާއްޖޭގެ ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙް ހުޅުވައިދެއްވައިފިއެވެ.
ނިލަންދޫ އައު އިންޖީނުގެއާއި އޮފީސް އިމާރާތް ރައީސުލްޖުމްހޫރިއްޔާ ހުޅުވައިދެއްވީ މިއަދު ހެނދުނު އެރަށުގެ އައު އިންޖީނުގެ ސަރަޙައްދުގައި ބޭއްވެވި ރަސްމިއްޔާތެއްގައެވެ.
މި ރަސްމިއްޔާތުގައި ވާހަކަފުޅު ދައްކަވަމުން ރައީސުލްޖުމްހޫރިއްޔާ ވަނީ، ރައްޔިތުން ވޯޓުދީގެން ސަރުކާރެއް ހޮވައި، ޓެކްސް ފައިސާ ސަރުކާރަށް ދައްކަނީ ރައްޔިތުންގެ އަސާސީ ޚިދުމަތްތައް ސަރުކާރުން ޤާއިމްކޮށްދިނުމަށްޓަކައި ކަމަށާއި، ރައްޔިތުން އެދޭ ބަދަލު ގެނެސްދޭނީ މި ސަރުކާރުން ކަމުގައި ވިދާޅުވެފައެވެ.
މިއަދު ރަސްމީގޮތުން ހުޅުވި ގއ. ނިލަންދޫގެ އައު އިންޖީނުގޭގައި 1050 ކިލޯވޯޓުގެ ޖުމްލަ ކެޕޭސިޓީގެ އިންޖީނު މިވަގުތު ބެހެއްޓިފައިވާއިރު، މި އިންޖީނުގެ ފަރުމާކޮށްފައިވަނީ 400 ކިލޯވޯޓްގެ 3 ޖެންސެޓް ބެހެއްޓޭގޮތަށެވެ.
ނިލަންދޫގެ ކުރީގެ އިންޖީނުގޭގެ ގޮތުގައި ބޭނުންކުރި ޢިިމާރާތަކީ 22 އަހަރުވެފައިވާ އިމާރާތެކެވެ. އަދި ކުރީގެ އިންޖީނުގެ ހުންނަނީ މީހުން ދިރިއުޅޭ ސަރަޙައްދުގައި ނަމަވެސް ފަހުން މި އިމާރާތްކުރެވުނު އައު އިންޖީނުގެ ޤާއިމްކޮށްފައި ވަނީ މީހުން ދިރިއުޅޭ ސަރަޙައްދާއި ދުރުގައެވެ.
ރައީސުލްޖުމްހޫރިއްޔާ ވަނީ މިއަދު ހުޅުވުނު އައު އިންޖީނުގެ ހުޅުއްވައިދެއްވުމުގެ ރަސްމިއްޔާތަށްފަހު އެ އިންޖީނުގެ ބައްލަވާލައްވާފައެވެ.