މިދުވަސްވަރު މީސްމީޑިޔާގެ ގިނަ މަންސަ ތަކުގައި ދައުރުވަމުން ދަނީ ދިވެހި ރާއްޖޭގެ ގިނަ ރަށްތަކުގެ ގޮނޑުދޮށްތަކުގެ މަންޒަރުތަކެވެ. އިރުގޮސް އޮބާ، ދުނިޔެއަށް އަނދިރިކަން ވެރިވެފައިވާ ވަގުތު، މި ރީތި ގޮނޑުދޮށްތަކުގައި ދިއްލިފައި ހުންނަ އަލިތަކުގެ ރީތި މަންޒަރު ތަކެވެ. ރެދަނުގެ ގުދުރަތީ ރީތި ކަމުގެ ތަފާތު އެކި މަންޒަރުތަކެވެ. މީގެ ކުރިން އާންމުކޮށް ރެދަން ނުލާ ރަށްތަކުގައިވެސް މިދުވަސްކޮޅު ރެދަން އޮތީ ލާފައެވެ. ރޭ ވެެއްޖެނަމަ ގިނަ ބަޔަކު ރެދަން ބަލަން ގޮސް އުޅެއެވެ. އޭގެ ގުދުރަތީ ރީތިކަމުގެ ސަބަބުންނެވެ. އެއިން ލިބޭ ހިތްހަމަ ޖެހުމުގެ ބޮޑުކަމުންނެވެ.

އާދޭހެވެ! ރެދަނާއި ކުޅެ، އޭގެ ފޮޓޯ ނަގާ ތަންތަނުގައި އާންމު ކުރާ އިރު، ރެދަނުގެ ހަގީގަތަކީ ކޮބައިކަން ކޮންމެވެސް ވަރަކަށް އެނގުން މުހިންމެވެ. އާންމުކޮށް ބުނެވެނީ ރެދަނަކީ ކުދި ކުދި މަސްތަކެކޭ ނުވަތަ ކުދި ސޫފި ތަކެކޭ އެވެ. އެހެންނަމަވެސް ރެދަން ލަނީ ހަމަ އެކަނި ކުދި މަސް ނުވަތަ ސޫފިން އެކަންޏެއް ނޫނެވެ. ދިވެހި ރާއްޖޭގައި އާންމުކޮށް އަދި ދުނިޔޭގައިވެސް އެއްމެ އާންމުކޮށް ފެންނަނީ އަލި ނޫކުލައެއްގެ ރެދަން ތަކެކެވެ. ނަމަވެސް ރެދަނުގައި ފެހި ކުލަ އާއި ރަތްކުލައިގެ ރެދަންވެސް ހުރެއެވެ.

ރެދަން ނިސްބަތް ކުރެވެނީ ޖުމުލަކޮށް އެކައްޗަކަށެވެ. ނަމަވެސް ރެދަން ލަނީ ތަފާތު އެކި އެެއްޗެހިންނެވެ. މޫދުގައި އުޅޭ ކުދި ސޫފިތަކަކާއި ކުދި މަސްތަކެއްގެ ސަބަބުންވެސް ރެދަން ލައެވެ. އަދި މޫދުގައި އުފެދޭ ޒާތެއްގެ ގަސްގަހާގެހީގެ ބާވަތެއް ކަމަށްވާ "އަލްގޭ" އެއްގެ ސަބަބުންވެސް ރެދަން ލައެވެ. މި ތަކެތީގެ އުފެދުމުގައި ވާ ފުރިހަމަ ނިޒާމަކުން ރެދަން ލައެވެ.

ކުދި ސޫފިތަކާއި ކުދި މަސްތަކުގެ ސަބަބުން ރެދަން ލަނީ އެ ތަކެތީގެ ހަށިގަނޑުގައި ހިނގާ ކެމިކަލް ރިއެކްޝަނެއްގެ ސަބަބުންނެވެ. މިއީ އެތަކެތީގެ ދިފާއީ ނިޒާމުގެ ތެރެއިން ހިނގާ ހާއްސަ ކަމެކެވެ. އޮޔާއި އެކު ރާޅާ ހަލުވަމުން ގެންދާ މި ކުދިކުދި ސޫފިތައް ނުވަތަ މަސްތައް އެސޮރުމެންނަށް އަންނަ ކުއްލި ސިހުންތަކާއި ހަރަކާތްތަކާއި އެކު މި ކެމިކަލް ރިއެކްޝަން އުފެދެއެވެ. އެއާއި އެކު އެތަކެތީގެ ހަށިގަނޑުގައި ހުންނަ ދިޔަވަރެއް ބޭރުކޮށްލައެވެ. މި ދިޔަވަރުގެ ސަބަބުން ރެދަން ލައެވެ. ނުވަތަ ދިއްލެއެވެ. މިއީ އެހެން މަސްމަހާ މެހީގެ ޝިކާރައިން ސަލާމަތްވުމަށް މި ތަކެއްޗަށް ލިބިފައިވާ ގުދުރަތީ ދިފާއީ ނިޒާމެކެވެ. އަދި އަނެއްބައި ފަހަރަށް މި ތަކެތި، އޭގެ ބައިވެރިޔާ ހޯދުމަށް، އެ ދުވަސްވަރު، އޭގެ ޠަބީއަތުން މި ކެމިކަލް ރިއެކްޝަން އުފައްދައެވެ. މި ކެމިލަކް ރިއެކްޝަނަށް "ބަޔޯލުމިނެސެންސް" އޭ ކިޔައެވެ. މި ކުދިކުދި ސޫފިތަކަށް ނުވަތަ މަސްތަކަށް "ޕްލޭންކްޓަންސް" އޭ ކިޔައެވެ.

ބައެއްކަހަލަ "އަލްގޭ" ތަކުގެ ސަބަބުން ރެދަން ލަނީ އެތަކެތީގައި ހިނގާ ހިނގާ ކެމިކަލް ރިއެކްޝަނެއްގެ ސަބަބުންނެވެ. މިއީ އެއްގަމުގައި ހުންނަ ގަސްގަހާގެހި ފަދައިން ދުވާލަށް އިރުގެ އަވިންނާއި ކާބަންޑައިއޮކްސައިޑުން ހަކަތަހޯދައިގެން ކާނާ އުފައްދާ އެއްޗެކެވެ. މި އަލްގޭތައް ކަނޑުގެ ލޮނުގަނޑުގެ މަތީ ފަށަލައިގައި އުފެދޭ ސަބަބަކީވެސް މިއީއެވެ. ކަންމިހެން ހުރުމާއި އެކު ރޭވެ އަނދިރިވުމުން މި އަލްގޭ ތަކުން ކާބަންޑައިއޮކްސައިޑް ބޭރު ކުރެއެވެ. ނަތީޖާ އަކަށް ވަނީ މި އަލްގޭ ތަކުގައި ހުންނަ ކެމިކަލް ތަކެއްގެ ސަބަބުން ބޭރުކުރާ މި ކާބަންޑައިއޮކްސައިޑުތައް ބޭރުވާ އިރު، އަލިކަމެއް އުފެދުމެެވެ. މިގޮތަށް ރޭގަނޑަށް މި އަލި ފެންނަ ފެނުމަށްވެސް ރެދަން ލުމޭ ކިޔައެވެ. މިއީ ހަރަކާތެއް ނުވި ނަމަވެސް ދިއްލިފައި ހުންނަ ރެދަން ތަކެކެވެ. އެހެންނަމަވެސް އާންމުކޮށް ރާއްޖޭގެ ގޮނޑުދޮށްތަކުގައި މި ފެންނަނީ ކުދި ސޫފިތަކުގެ ސަބަބުން އުފެދޭ ރެދަނެވެ.

ގުދުރަތީ ރީތި ހިތްގައިމު މި މަންޒަރު ތަކަކީ ބަލާ ފޫހިނުވާ ފަދަ މަންޒަރު ތަކެކެވެ. އޭގެ ރީތިކަން އިންތިހާއެވެ. ލިބޭ ހިތްހަމަޖެހުން ގަލަމަކުން ބަޔާންކުރަންވެސް ދައްޗެވެ. މިއިން ކޮންމެ ކަމަކުން ފެނި، އެނގި ހާމަވާ އެއް ކަމަކީ މާތް ﷲ ގެ ކުޅަދުންވަންތަކަމާއި އެ އިލާހު އުފެއްދެވި މަޚްލޫޤުންގެ ފުރިހަމަ ކަމެވެ.