ދިވެހިރާއްޖޭގައިވެސް ގިނަ ސައިހޮޓާ ތަކާއި ކެފޭ ތަކާއި ރެސްޓޯރަންޓް ތަކާއި ބިސްޓްރޯތައް އެހާމެ ގިނައެވެ. އަދި "ޓޭކް އަވޭ" ތަންތަންވެސް އެހާމެ ގިނައެވެ. ހާއްސަކޮށް މާލޭ ސަރަހަައްދުގައެވެ. މިއިން ކޮންމެ ތަނަކުންވެސް މައިގަނޑުކޮށް ދެނީ އެއް ހިދުމަތެކެވެ. އެެއްޗެއް ކާލާ، ބޯލާ ހަދާނޭ ހިދުމަތެކެވެ.

ތަންތަނުގެ ފަރަގު ކަނޑައަޅަނީ އެ ތަންތަނުގެ ދަރަޖައިންނެވެ. އާންމު ގޮތެެއްގައި ހައިބަތު ބޮޑު، ރީތި، ފަރުމާތަކަށް، ތަން ބައްޓަން ކޮށްފައި ހުންނަ "ލަކްޒަރީ" ތަންތަނަށް ރެސްޓޯރަންޓޭ ނުވަތަ ބިސްޓްރޯ އޭ ކިޔާ އުޅެއެވެ. އަދި އެއަށްވުރެ ތަންކޮޅެއް ފެންވަރުގެ ގޮތުން "ދަށް" ތަންތަނަށް ކޭފޭ އޭ ކިޔައެވެ. މާލޭގައި "ކަޑ" އަކީވެސް ކާ އެއްޗެހީގެ ހިދުމަތްދޭ ބައެއް ތަންތަނަށް ނިސްބަތްކޮށް ބޭނުން ކުރާ ބަހެކެވެ. 

ބައެއް މީހުން ސިފަ ކުރާގޮތުގައި މި "ކަޑަ" ތަކަކީ ސާފުތާހިރުކަމުގެ ގޮތުން ތަންކޮޅެއް ދަށް ތަންތަނެވެ. ނަމަވެސް ހަގީގަތަކީ އެތަންތަނުގައި ސާފުތާހިރުކަން ގެންގުޅޭނެއެވެ. ތަނުގެ "ބާ" ކަމުން، އިމާރާތުގެ "މުސްކުޅި" ކަމުން އަހަރެމެންނަށް އެހެން ހީވަނީއެވެ. 

މާލެ ސަރަހައްދުގައި އެތައް ބަޔަކު އުޅެމުން ދާއިރު މިފަދަ ކާ އެއްޗެހި ވިއްކާ ތަންތަނުގެ ހިދުމަތް ހޯދާ މީހުން އެހާމެ ގިނައެވެ. ގަވައިދުން އެފަދަ ތަންތަނުން ކައި އުޅޭ މީހުންވެސް އުޅެއެވެ. އަހަރެމެންނަށް ފެންނަނީ ހުރިހާ ފަންތިއެއްގެ ކާ އެއްޗެހީގެ ހިދުމަތްދޭ ތަންތަންވެސް ބާރުބޮޑުވެފައި އޮންނަ ތަނެވެ. އެއްމެ "ފެންސީ" ރެސްޓޯރެންޓް ތަކުން ފެށިގެން ގޮސް އެއްމެ އާދައިގެ "ކަޑަ" ތަކަށްވެސް މެއެވެ. ނަމަވެސް ފާހަގަވާ އެއް ކަމަކީ "ކަޑަ" ތަކުގެ ބާރު ވަކިން ބޮޑު ކަމެވެ.

މީރު މަސްބުރި ރިހަ އާއި ފިނި ޖޫސްފޮދެއް އެއީ އެތަންތަނުގެ އެއްމެ މަގުބޫލު ކެއުންކަމުގައި ވެފައިވާ ބައެއް "ކަޑަ" ތައްވެސް އޮންނަނީ ފުރިފައެވެ. ބައެއް މީހުން ދެކޭ ގޮތުގައި އެއީ ބިދޭސީންނެވެ. ނަމަވެސް އެއީ ކުށްހީއެކެވެ. އެފަދަ "ކަޑަ" ތަކަށް ގުރޫޕު ހަދާފައިވެސްގޮސް ދިވެހިން ކައި ހަދައެވެ.

އަގުބޮޑެތި ރެސްޓޯރެންޓްތަކަށް ގޮސް ބޮޑު ހަރަދުކޮށްގެން ކުޑަ ކުޑަ އެތިކޮޅެއް ކެއުމުގެ ބަދަލުގައި އަގުހެޔޮ ތަނަކަށްގޮސް ބަނޑާއި ހިތް ފުރެން ކައިގެން އައުމުން، ކެއުމުގެ ހަގީގީ މަގްސަދު ހާސިލް ވީއެވެ. އާންމުކޮށް "ހައިބޮޑުވެގެން" ހައިކަން ފިލުވާލަން، އެއްޗެއް ކާން އެދޭ މީހުން ގިނައިން އިހްތިޔާރު ކުރަނީ އިސްވެ ދެންނެވިފަދަ "ކަޑަ" ތަކެވެ. އަގުހެޔޮވެފާ ލިބޭ މިންވަރު ގިނަ ކަމުންނެވެ. ނުވިތާކަށް މި "ކަޑަ" ތަކުގައި ހުންނަނީ އަނގައަށް މީރު ދިވެހި ކެއުންތަކެވެ. 

ގުރޫޕު ހަދައިގެން ކެއުންތަކަށް ދާއިރު، ނުވަތ އެހެން ދޭތެރެއަކުން ހައިބޮޑުވެގެން އެއްޗެއް ކާލަން ދާއިރު، އާދަވެ މިހެން ކައި އުޅޭއިރު، އަހަރެމެންނަށް ގިނައިން އިހްތިޔާރު ކުރެވެނީ މިދެންނެވި "ކަޑަ" ތައް ހެއްޔެވެ؟ ނުވަތަ ފެންސީ ރެސްޓޯރަންޓް ހެއްޔެވެ؟ މިކަމުގައި އަންހެނަކު ޝާމިލް ވާނަމަ "ކަޑަ" ތަކުގެ މީޒާން ލުއިވެދެއެވެ. ނަމަވެސް އަންހެނުން ބޮޑަށް އެދެނީ ރެސްޓޯރަންޓް ތަކާއި ފެންސީ ހޮޓާ ތަކެވެ. ކަން މިހެން ހުރި ނަމަވެސް ފިރިހެނުން ނުވަތަ ފިރިހެނުންގެ ގުރޫޕުތަކުން "ކަޑަ" ތަކަށް އަރާލެއް މަދެއް ނޫނެވެ. ވީމާ އެފަދަ ތަންތަނަށް ކާން ދިއުމުގެ މަގުސަދުގައި ގުރޫޕު އެއްވެލައިގެންވެސް ގޮސް އުޅެއެވެ. ކެއުންތަކަށް އެކި މީހުންނަށް ކަމުދާނީ އެކި ތަންތަނެވެ. މިކަމުގައި އެކި މީހުންގެ ނަޒަރު ތަފާތު ވެދާނެއެވެ. އެހެން ނަމަވެސް ކެއުމަކަށް ދާން އެއްމެ ރަނގަޅީ "ފެންސީ" ރެސްޓޯރަންޓެއް ތޯ ނުވަތަ "ކަޑަ" އެއްތޯ ނިންމާނީ އެމީހަކު އަމިއްލަ އަށެވެ.