ދުނިޔޭގައި އިންސާނާ ދިރިއުޅެމުން ދާއިރު، ދިމައިވާ އެކިއެކި ކަންކަމުގައި އެހެން މީހުންގެ އެހީތެރިކަން އިންތިހާއަށް ބޭނުންވާ ފަހަރުވެސް އަންނާނެއެވެ. މިފަދަ ވަގުތު ތަކުގައި އެހެން މީހުންގެ އެހީތެރިކަމަށް އެދުމާއި އެހީތެރިކަން ހޯދުމަކީ ލަދުވެތި ކަމެއްވެސް ނޫނެވެ. ނަމަވެސް ހަނދާނުގައި ބަހައްޓަން ޖެހޭ މުހިއްމު އެއް ކަމަކީ ކަންކަމުގައި އަބަދު އެހެން މީހުންނަށް ބަރޯސާވުމަކީ ރަނގަޅު ކަމެއް ނޫން ކަމެވެ. އެހެނީ ދިރިއުޅުމުގައި ދިމައިވާ އެތައް ކަމަކީ އަމިއްލައަށް ހައްލުކޮށްލެވޭނޭ ވަރުގެ އާދައިގެ ކަންކަމެވެ.

މިފަދަ ކަންކަމުގެ ތެރޭގައި ގޭތެރޭގައި ހުންނަ ބައެއް ގެވެހި ކަންކަން ފާހަގަ ކުރެވެއެވެ. އާންމު އާދައިގެ ދިރިއުޅުމެއްގައި ތިމާގެ އަމިއްލަ ގޭގައި ކައްކާ، ކާންހަދަން އެހެން މީހަކާ ހަވާލުކުރުން މިއީ ރީތި އުސޫލެއް ނޫނެވެ. އަމިއްލަ މީހާ ނިދާ ތަންމަތި ބަދަލުކޮށް އަމިއްލަ މީހާ ލާ އަންނައުނު ދޮއެ ހަދަން މުސާރަ ދީފާ މީހަކު ބަހައްޓަން ހެޔޮވާނެ ހެއްޔެވެ؟ އަމިއްލަ މީހާ ކުޑަކަމުގޮސް ބޮޑުކަމުގޮސް އަދި ފެންވަރާ ތާހިރުވާ ފާހާނާ އުނގުޅަންވެސް މީހަކާ ހަވާލުކުރުމަކީ އަދި މާ ކަމުދާ އުސޫލެއް ނޫނެވެ. އަމިއްލަ މީހާގެ ގޭގެ ތަޅުންމަތި ކަހާ މޮއްޕުލާ ސާފުކުރަން، މުޅިން ބީރައްޓެހި މީހަކާ ހަވާލު ކުރުން މިއީވެސް ރަނގަޅު ގޮތެއް ނޫނެވެ. 

ހަމައެފަދައިން އަޅުގަނޑުމެން ބަނޑުއަޅާ ވިހާ ދަރިން، އަޅުގަނޑުމެންގެ ގޭގައި އެ ބައިތިއްބަނީ ކޮންމެވެސް ނުދަންނަ މީހަކާއި ހަވާލުކޮށްފައެވެ. މުސާރަ ދީފައި ތިމާގެ ދަރިން ބަލަން ވެސް ހަވާލު ކުރަނީ އެހެން މީހަކަށެވެ. ނުވަ މަސް ދުވަހު އެޅި ވޭނާއި ވިހެއުމުގެ ތަކުލީފު ހަނދާން ނެތިފައި ހުންނަ ކަހަލައެވެ. މިކަންކަން މި މަގުން ކުރަނީ ކޮންމެހެން ފަރުވާ ކުޑަވެ އަޅާލުން ކުޑަވެގެންނެެއް ނޫނެނެވެ. ވަޒީފާ އަދާކުރުމައިގެން އަވަދިނެތި ވެވޭތީއެވެ. އަމިއްލަ މަސައްކަތްތަކާއި އަމިއްލަ ކަންކަމުގައި ހޭބޯނާރާ އުޅެން ޖެހޭތީއެވެ.

ހަނދާން ކުރާށެވެ. މިއީ އަދި ހަރުދަނާ ދިރިއުޅުމެއް ނޫނެވެ. ބޮޑު މުސާރަ ލިބޭ ވަޒީފާއެއް އަދާކުރުމީ ހަރުދަނާ ވުމެއް ނޫނެވެ. އަމިއްލަ އަށް ބޮޑު ނަފާ ލިބޭ މަސައްކަތެއް ކުރުމަކީވެސް އަދި ހަރުދަނާ ވުމެއް ނޫނެވެ. ތިމާ އަމިއްލަ އަށް، ތިމާގެ ގޭގައި "ހާވާ" ހަޑި، ސާފުކޮށް ފިލުވުމުގެ ކުޅަދާނަކަމާއި ކެރުންތެރިކަން ނެތުމަކީ ހަރުދަނާކަމެއް ނެތް ކަމެވެ. އެހެންކަމުން ތިމާގެ ގޭގައި ހުންނަނ ގެވެހި މިފަދަ ކަންކަން ކުރުމަށް ބީރައްޓެހިންނަށް މުސާރަދީގެން އުޅޭ އުޅުމުގައި ތިމާގެ ހަރުދަނާކަން ސާބިތުކޮށްދޭން ނޫޅޭށެވެ. ތިމާ ބަނޑު އަޅާ ވިހާ ދަރިން، އެހެން މީހުންގެ އުނގަށް ޖަހާފާ ގޮސް ހަރުދަނާ ވަޒީފާއެއްގައި އުޅެމުން، ތިމަ ތިމާމެންގެ ހަރުދަނާ ކަމުގެ ވާހަކަ ނުދައްކާށެވެ. ހަރުދަނާ މީހަކަށް ވުމަށްޓަކައި ފުރަތަމަ ތިމާގެ އަމިއްލަ ގޭގައި ހަރުދަނާ މީހަކަށް ވާށެވެ.