ވަގުތަކީ އަބަދުވެސް ހިނގާ އެއްޗެކެވެ. އެ ވަގުތު ހިނގުމަކަށް ކުޑަނަމަވެސް ބަދަލެއް ނާދެއެވެ. ވަގުތުގެ ދައުރުވުމުގައި އެ ވަގުތައް މަލާމާތްކުރާ އެއްބަޔަކީ އިންސާނުންނެވެ. އަނެކައްޗަކީ ބެޓެރި ހުއްޓިފައި ހުންނަ ގަޑިގަޑިއެވެ. މިފަދައިން ބެޓެރި ހުއްޓިފައި ހުންނަ ގަޑިއެއްގެ މިސާލާ އިންސާނާ ވެއްޓިގަންނަނީ ވަގުތަށް ކަމޭހިތުމުގައި ފަރުވާކުޑަކުރާނަމައެވެ.

ޒަމާން ތަރައްގީވެ ތަހުޒީބުވަމުން އަންނަ މި ޒަމާނުގައި ވަގުތަށް ފަރުވާކުޑަކުރުމަކީ، ފެޝަނެއް ކަމުގައި ބަޔަކު މީހުން ދެކެއެވެ. ތިމާއަށްޓަކައި އަނެކަކު އިންތިޒާރެއް ކޮއްލަން ޖެހުމަކީ ތިމާގެ މޮޅުކަން ނުވަތަ ބޮޑުކަން އިހުސާސް ކުރެވޭ ކަމަކަށް ވެއެވެ. އެހެންކަމުން، ގަވައިދުން ގަޑި ޖެހިގެން އަންނަ މީހުން އުޅެއެވެ. ނައިސްގެން ތިމާ އަށް ގުޅާލުމަކީވެސް ތިމާއަށް ލިބޭ ފަހުރެއް ކަމުގައި ދެކޭ މީހުންވެސް މަދެއް ނޫނެވެ. ވަގުތެއް ކިޔައިފިނަމަ އާދަވެގެން އެ ވަގުތަކަށް ނައިސްގެން ގުޅަން ޖެހޭ މީހުން އަހަރެމެންގެ ތެރޭގައި ވަރަށްވެސް ގިނައެވެ.

އާދޭހެވެ! ވަގުތައް ފަރުވާކުޑަކުރުމަކީ މިއަދު އެއްވެސް މައްސަލައަކަށް ނުވެއެވެ. އެއީ އާއްމު އާދައިގެ ކަމަކަށް ވެ ނިމިއްޖެއެވެ. ގިނަފަހަރަށް މި ނަމޫނާ ދައްކަނީވެސް ތަންތަނުގެ ބޮޑުންނާއި އިސްމީހުންނެވެ. މިކަންކަމުގެ ހިތި ނަތީޖާ މިއަދުވެސް ފެންނަން އެބަ ހުއްޓެވެ. ހައްލު ނުވެ މިއީ ދެންވެސް އާދައިގެ ކަމެއް ކަމުގައި ހިނގާނަމަ މާދަމާގެ ޖީލުތައް ވަގުތައް ފަރުވާތެރިވުމުގައި ފެންނާނީ އަތުނުވާ ހިސާބު ދަށުގައި ތިބޭ މަންޒަރެވެ. 

މިއީ އިހުމާލެކެވެ. މިއީ އަހުލާގީ ގޮތުން މުޑުދާރު ސިފަ އެކެވެ. މިއީ ތަރުބިއްޔަތުގައި ވެވޭ ބޮޑު އިހުމާލެކެވެ. ކަޑިއަކަށް ލަސްވުމަކީ މައްސަލައެއް ނޫންކަން ބޮޑެތިވަމުން އަންނަ ކުދިންނަށް އެކުދިންގެ މައިންބަފައިން އިހުސާސްކޮށްދެއެެވެ. ގަޑިޖެހުމަކީ އިންސާނީ ޠަބީއަތެއް ކަމުގައި ބެލެނިވެރިން އެމީހުންހެ ދަރިންނަށް އެބަ ދައްކައެވެ. މިއީ ތަރުބަވީ ގޮވަތީގައި ދެވޭ މުޑުދާރު ފިލާފަޅު ތަކެކެވެ.

އަހަރެމެންނަށް ހީވާ ގޮތުގައި ވަގުތަށް ފަރުވާތެރިވުމާ ނުވުން އެއީ މާ ބޮޑު ކަމެއް ނޫނެވެ. ގިނަފަހަރަށް ވަގުތަށް ފަރުވާކުޑަ ކުރިޔަސް، ކުރަން ބޭނުންވާ ކަންކަން ވެއެވެ. ދާން ބޭނުންވާ ތަންތަނަށް ދެވެއެވެ. އެހެންކަމުން އެކަމުގައި ފަރުވާލެއް ނުބަހައްޓައެވެ. ވަގުތު އެއީ މާ މުހިއްމު އެއްޗެއް ކަމުގައި ނުދެކެއެވެ. އަދި ތިމާގެ ސަބަބުން އަނެކާގެ ވަގުތު ބޭކާރު ވަމުން ދާއިރުގައިވެސް، އެކަންކަން ދަންނަ މީހަކު ނޫޅެއެވެ. މި ވާހާވެސް ގޮތަކީ ވަގުތައް ފަރުވާތެރިވުމުގެ ރީތި އަހުލާގު ނެތި ދިޔުމެވެ.

އަބަދުވެސް އަނެކާ ވަގުތަށް ކަމޭހިތަން ތިބާ އެދޭނެއެވެ. ނަމަވެސް ތިބާ އެކަން ކުރަން ވުމުން ތިބާއަށް އެކަން ވަނީ ބޮޑު ތަކުލީފަކަށެވެ. މިއީ މި ކެހިވެރި ދުނިޔޭގެ އާދައެކެވެ. ނަމަވެސް މިކަންކަން ބަދަލު ކުރަން އެބަ ޖެހެއެވެ. މިއީ އާއްމު އާދައިގެ ކަމެއް ކަމުގައި ވަނީނަމަ މާދަމާ ވަގުތަށް ކިރިޔާވެސް ފަރުވާތެރިކަމެއް ބަހައްޓާނޭ ހަމަ އެކަކުވެސް ނުހުންނާނެއެވެ. އެކަމިގެ ހިތާމަ ނުކުރާނޭ ހަމަ އެކަކުވެސް ނުހުންނާނެއެވެ.