ގަހުގާ ފޮޅޭ ވަސް ގަދަ މަލާ، އެމަލުގެ ވަހާ އެކު ޖައްވުގާ

   ވަހުގާ އެވާ ފޮނި މީރުކަން، މުޅި ޢާލަމޭ ތާޒާ ކުރީ

 

ޖެހެމުން އެދާ ވައި ރޯޅިއާ، އެކުގާ އެވަސް ފެތުރޭ ގޮތާ

    ބެހެމުން ދެޔޭ މުޅި ގުލްޝަނަށް، އެވަހުން ފަޒާ ތާޒާ ކުރީ

 

ހެލިލާ ވަޔާ އެކު ގޮފިތަކާ، އެ ގޮފީގަ ވާ ކުދި މާތަކާ

   ހެލިހާ ގޮތުން ފަތްތަކު ތެރޭ، މުޅި ގަސް އެކީ ފައްކާ ކުރީ

 

ވައި ރޯޅިއާ އެކުގާ އެމާ، ވަކިވެން ގަހުން އަދި ވެއްޓި ދޭ

   ފައި ދަށުލެވޭ އިރުގާ ވިޔަސް، އެމަލުގެ ވަހުން އާރޯ ކުރީ

 

މީއޭ ހަޔާތު މި ދުނިޔެއިން، ހޯދަން ޖެހޭނެ މިސާލަކީ

   މީއޭ ލިބުން އެދިގެން ކުރާ، މަލަކީ ދުޢާ ރުހިގެން ހުރީ