ނާކަމިޔާބީއާ ކުރިމަތިލުމަކީ އެއްވެސް މީހަކަށް ފަސޭހަ ކަމެއް ނޫނެވެ. ނަމަވެސް ކޮންމެ މީހެެއްގެ ހަޔާތުގައިވެސް ނާކާމިޔާބީއާ ކުރިމަތިލާން ޖެހޭނެއެވެ. ބޮޑުވެ، ފުރާފުރިހަމަ ވެފައިވާ މީހެއްނަމަ އޭނާ ހުންނާނީ އެތައް ނާކާމިޔާބީއެއް އޭނާގެ ހަޔާތުގައި ތަޖުރިބާ ކޮށްފައެވެ. ކަން މިހެން ހުރުމާއި އެކު ނާކާމިޔާބީ އަކީ ދުނިޔޭގެ ހަޔާތުގެ އެއް ބައެވެ. އެއީ ދުނިޔޭގެ ޠަބީއަތެވެ. އެހެންކަމުން ކޮންމެ މީހަކީވެސް ނާކާމިޔާބީއާއި ކުރިމަތިލާން ކެރޭ މީހަކަށް ވާން ވާނެއެވެ.

އަހަރެމެންގެ ތެރެއިން ގިނަ މީހުންނަށް އައު ކަމެއް ކުރަން ނުކެރެނީ އެކަމަކުން ނާކާމިޔާބީ އާއި ކުރިމަތު ވެދާނެތީ ބިރުންނެވެ. ކަމެއްގައި ނާކާމިޔާބު ވުމަކީ ދުނިޔޭގެ އާދަކަން ދަނެގެން ކަންކަމާ ކުރިމަތިލާނަމަ ހަގީގަތުގައި އެފަދަ ވަހުމު ތަކާއި އިންސާނާ ދުރުވާނެއެވެ.

ބައެއް މީހުންނީ އެމީހުންނަށް ދިމައިވާ ނާކާމިޔާބީތަކުގައި އިސްޖަހާ ފަސް އެނބުރޭ ބައެކެވެ. އާދޭހެވެ! ނާކާމިޔާބީތަކުގައި އިންސާނާގެ ކުރި މަރުވެ ހިތް މާޔޫސް ކުރުވާނެއެވެ. ނަމަވެސް އިސްވެ ދެންނެވި ފަދައިން ނާކާމިޔާބީއަކީވެސް ދުނިޔޭގެ ދިރިއުޅުމުގެ ބައެއްކަން ހަނދާން ކުރަން އެބަ ޖެހެއެވެ. އެ ނާކާމިޔާބުގައި ހިތްވަރުގަދަ ކުރަން ދަސްކުރަން އެބަ ޖެހެއެވެ. ނާކަމީޔާބު ތަކާއި ކުރިމަތި ލާނޭ ރިވެހި ހިކުމަތްތެރި ގޮތްތައް ދަސްކުރަން އެބަ ޖެހެއެވެ.

ކޮންމެ ނާކާމިޔާބަކާއި ގުޅިގެން ރުޅި އިސްކުރެވޭތަންވެސް ފެންނަނީ މަދެއްކޮށެއް ނޫނެވެ. މި ރުޅި ބައެއް މީހުން އެމީހުންގެ އަމިއްލަ ނަފްސުތައް ދެކެ އަންނަ އިރު އަނެެއްބަޔަކު ރުޅި އަންނަނީ ކޮންމެވެސް އެހެން ބަޔަކު ދެކެއެވެ. އަދި އެ ރުޅި ނަފްރަތަށް ބަދަލުވެ އެންމެ ފަހުން އެ ނަފްރަތު ހަސަދައަށް ބަދަލުވާތަންވެސް ފެނެއެވެ. މިއީ ނާކާމިޔާބުތަކާ ކުރިމަތިލުމުގެ ގާބިލުކަން އިންސާނާގެ ކިބައިގައި ނެތްކަމުގެ ސިފަތަކެވެ.

މި ހުރިހާކަމެއް މިހެން ހުރުމާއި އެކު އިންސާނާ ދަސްކުރަންވީ ނާކަމިޔާބުތަކަށް ތައްޔާރުވާނެ ގޮތެވެ. އަދި އެ ނާކާމިޔާބުގައި އުންމީދު ކަނދާނުލާ ހިތްވަރު ކުރާނޭ ގޮތެވެ. އެނގެންވީ ކަމަކީ ނާކާމިޔާބީއަކީ ދިރިއުޅުމުގެ އެއް ބައި ކަމެވެ. ނާކާމިޔާބީއާއި ކުރިމަތި ލާން ނުޖެހޭނެ ހަމަ އެކަކުވެސް ނުހުންނާނެއެވެ. އެކި މީހުންނަށް އެކި މިންވަރަށް އެކި ގޮތްގޮތަށެވެ. މިއީ ދުނިޔޭގެ އާދައެވެ. ހަޔާތުގެ ޠަބީއަތެވެ.