އިޖްތިމާއީ ކަންކަމަކީ އެކަންކަމާއި މެދު ކޮންމެ މީހަކުވެސް ހޭލުންތެރިވެ ހުރުން މުހިއްމު ކަންކަމެވެ. ހާއްސަކޮށް ކުދިކުދި އާބާދީތައް އޮންނަ ކުދި ކުދި ރަށްރަށުގައެވެ. އެ ރަށެއްގެ ރަށްވެހި ގިނަ ކަންކަމަށް އެރަށެއްގެ އަހުލުވެރިން ލޯ ހުޅުވިފައި ހުރުން ވަރަށްވެސް މުހިއްމެވެ. އެ ރަށެއްގެ ރަށްވެހި ކަންކަން ތަރުތީބު ވުމަށާއި އެ ރަށެއްގައި އުޅޭ އެރަށެއްގެ ރަށްވެހިންނަށް އެރަށުގައި ލިބޭ ހިދުމަތްތަކުގެ ބޭނުން އޭގެ އެދެވޭ ގޮތުގައި ލިބޭނީވެސް އޭރުންނެވެ.

ކޮންމެ ރަށެއްގައިވެސް އެރަށެއްގައި ލިބެން ހުންނަ އިޖްތިމާއީ ޚިދުމަތްތަކެއް ހުރެއެވެ. އެ ޚިދުމަތްތަކުގެ ތަރުތީބާއި އެ ޚިދުމަތްތައް ލިބޭ ވަގުތު ތަކާއި ތަންތަނުގެ މައުލޫމާތަކީ އެރަށެއްގެ އަހުލުވެރިންނަށް އެނގެން ޖެހޭނޭ ކަންކަމެވެ. އެއަށް އިޖްތިމާއީ ހޭލުންތެރިކަމޭވެސް ކީދާނެއެވެ. އާބާދީ މަދު މިފަދަ ރަށްރަށުގައި ދެވޭ މި ޚިދުމަތްތަކުގެ ބޭނުން ހަމަ ކޮންމެ މީހަކުވެސް ކުރަން ޖެހިދާނެއެވެ.

ރަށެއްގެ އާބާދީ މަދުނަމަ، އެ ރަށެއްގައި ދެވޭ ޚިދުމަތްތަކުގެ މިންވަރުވެސް މަދުވެދެއެވެ. އަދި އެ ޚިދުމަތްތައް ފޯރުކޮށްދޭން ތިބޭ މީހުންގެ އަދަދުވެސް މަދުވެއެވެ. ބައެއް ތަންތަނުން ނުވަތަ މުއައްސަސާތަކުން ދެވޭ ޚިދުމްތަތަކަކީ 24 ގަޑިއިރު ލިބެން ހުންނަ ޚިދުމަތްތަކަކަށް ނުވެދާނެއެވެ. އެހެންކަމުގައި ވަނީނަމަ އެ ޚިދުމަތްތައް ލިބެން ހުންނަ ގަޑިތައް ކޮންމެ މީހަކުވެސް ހަނދާން ކުރަން އެބަ ޖެހެއެވެ. އަދި އެ ޚިދުމަތްތައް ދިނުމުގައި އޮންނަ އުސޫލުތަކާއި ހަމަތަކަށްވެސް އަހުލުވެރިވާން ވާނެއެވެ. އެއީ ޚިދުމަތް ދޭ ފަރާތާއި ޚިދުމަތް ލިބިގަންނަ ފަރާތުގެ ފަސޭހައަކަށެވެ.

މިފަދަ ރަށްރަށުގައި މަސައްކަތް ކުރާ މުވައްޒަފުން މަދު ވުމުގެ ސަބަބުން ނުރަސްމީ ވަގުތު ތަކުގައި ޚިދުމަތްތައް ދިނުން އޮންނަނީ ބުރަ ކަމަކަށް ވެފައެވެ. އެހެނީ ކޮންމެ މީހެއްގެ ވެސް އަމިއްލަ ދިރިއުޅުމަކާއި އަމިއްލަ އެތައް ކަމެއް ހުންނާނެއެވެ. މިކަން މިހެން ހުރުމާއި އެކު ނުރަސްމީ ވަގުތުތަކުގައި ޚިދުމަތްތައް ހޯދަން އެދޭ މީހާ މިކަންކަމާ ވިސްނާލުން މުހިއްމެވެ. މަދު ބަޔަކު ޚިދުމަތުގައި ތިބޭތީ، އެ ބައިމީހުންވެސް ބަލިވެ ވަރުބަލިވެދާނޭކަންވެސް ހަނދާން ކުރަންވާނެއެވެ. ޚދުމަތެއް ނުލިބުމުން އެކަމާ ރުޅި އިސްނުކޮށް، މިކަންކަމާ މެދު ވިސްނާލާށެވެ.

އާދޭހެވެ! މި ހުރިހާ ކަމެއް މި އަންނަނީ އިޖްތިމާއީ ހޭލުންތެރިކަމާއި ގާނޫނުތަކާއި ގަވާއިދުތަކަށް އަހުލުވެރި ވުމުގެ ތެރެއިންނެވެ. އެހެންކަމުން ކޮންމެ މީހަކީވެސް އިޖްތިމާއީ ހޭލުންތެެރިކަން އިތުރު، އަދި ގަވާއިދުތަކަށް އަހުލުވެރި ބަޔަކު ކަމުގައި ވަމާ ހިނގާށެވެ!