ހިސާބު ބައްލަވާ މަޙްޝަރު ކުރައްވަވާ ދުވަހު، ޚަލްޤުތަކުން އަލުން ދިރުއްވަވައެވެ. އަދި އެ އަޅެއް ކުޅަ އަމަލުތަކުގެ މައްޗަށް ހިސާބު ބައްލަވަތެވެ. އަދި އެ ހިސާބުގެ މަތިން އެ ބަޔަކަށް އެ ބައެއްގެ ފަތް ހަވާލު ކުރެވެތެވެ. އެއްބަޔަކީ އެބައެއްގެ ކަނާތްފަރާތުން ފަތް ލިބޭ މީހުންނެވެ. އަނެއްބައި މީހުންނީ އެބައިމީހުންގެ ވާތް ފަރާތުން ފަތް ލިބޭ މީހުންނެވެ. އެގޮތުން ކަނާތްފަރާތުން ފަތް ލިބޭ، ކަނާތްފަރާތުގެ މީހުންނަކީ ކޮން ބައެއްކަމާއި އެބައިމީހުންނަށް ހުރި ނިޢުމަތްތަކުގެ ވާހަކަ ކީރިތި ޤުރުއާނުގައި މާތްﷲ ވަނީ ވަޙީ ކުރައްވާފައެވެ. ސޫރަތުލް ވާޤިޢަ ގައި މާތް ﷲ ވަޙީ ކުރައްވަވާފައި ވެއެވެ.

﴿27﴾ وَأَصْحَابُ الْيَمِينِ مَا أَصْحَابُ الْيَمِينِ ﴿28﴾ فِي سِدْرٍ مَّخْضُودٍ ﴿29﴾ وَطَلْحٍ مَّنضُودٍ ﴿30﴾ وَظِلٍّ مَّمْدُودٍ ﴿31﴾ وَمَاءٍ مَّسْكُوبٍ ﴿32﴾ وَفَاكِهَةٍ كَثِيرَةٍ ﴿33﴾ لَّا مَقْطُوعَةٍ وَلَا مَمْنُوعَةٍ ﴿34﴾ وَفُرُشٍ مَّرْفُوعَةٍ ﴿35﴾ إِنَّا أَنشَأْنَاهُنَّ إِنشَاءً ﴿36﴾ فَجَعَلْنَاهُنَّ أَبْكَارًا ﴿37﴾ عُرُبًا أَتْرَابًا ﴿38﴾ لِّأَصْحَابِ الْيَمِينِ.

މާނައީ: "ކަނާތްފަރާތުގެ މީހުންނެވެ. ކަނާތްފަރާތުގެ މީހުންނީ، ކޮންބަޔެއްހެއްޔެވެ؟ (އެއުރެންވަނީ) ކަށިނެތް، ކުންނާރު ގަސްތަކުގެ ތެރޭގައެވެ. ކެޔޮވައްތައް އެތުރިފައިވާ ފަތްކެޔޮ ގަސްތަކުގެ ތެރޭގައެވެ. އަދި ފެތުރިގެންވާ ހިޔަލުގައެވެ. އަދި އަބަދަށް އޮހިއޮހިހުންނަ ފެން، އެއުރެންނަށް ލިބޭނެއެވެ. އަދި ގިނަގުނަވެގެންވާ މޭވާތައްވެސްމެއެވެ. ހުސްވުމެއްނުވާ، އަދި މަނާވުމެއްނުވާ މޭވާއެވެ. އަދި އުފުލިގެންވާ ދާންތަކެވެ. ހަމަކަށަވަރުން، އަލުން އާ އުފެއްދެވުމަކުން ތިމަންރަސްކަލާނގެ އެކަނބަލުން (އެބަހީ: ސުވަރުގޭގެ އަންހެނުން) އުފެއްދެވީމެވެ. ފަހެ، بِكر ވެރި ބަޔަކު ކަމުގައި ތިމަންރަސްކަލާނގެ އެކަނބަލުން ލެއްވީމެވެ. ފިރިންދެކެ ލޯބިވާ، އެއްފުރާގެ ބަޔަކު ކަމުގައެވެ. ކަނާތްފަރާތުގެ މީހުންނަށްޓަކައެވެ." 

(އަލް ވާގިޢަ 27 - 38 ވަނަ އާޔަތުގެ ނިޔަލަށް)

މި އާޔަތްތަކުން އެނގޭގޮތުގައި ކަނާތްފަރާތުގެ މީހުންނީ ސުވަރުގޭގެ އަހުލުވެރިންނެވެ. އަދި ސުވަރުގޭގެ ފުރިހަމަ ކަމާއި އެތަނުގެ ނިޢުމަތްތަކުގެ ވާހަކަ މި އާޔަތްތަކުގައި ސާފުކޮށް ބަޔާން ވެގެން އެބަވެއެވެ. އަދި މީގެ އިތުރުންވެސް ކީރިތި ޤުރުއާނުގެ އެތައް އާޔަތެއްގައި ސުވަރުގޭގެ ސިފަތައް ބަޔާން ކުރައްވާފައި ވެއެވެ.