މިއަދު ގިނަ ބަޔަކު، އެމީހުންގެ ހަޔާތުގެ ގިނަ ވަގުތު ހޭދަ ކުރަނީ ފޯނު ހިފައިގެންނޭ ބުނެވިދާނެއެވެ. އޭގެ ތެރެއިން އެއްބަޔަކު ސްނެޕް ކުރާއިރު އަނެއް ބަޔަކު ޓިކްޓޮކްގައެވެ. ފޭސްބުކާއި އިންސްޓަގްރާމް ގައިވެސް ގިނަ ވަގުތު ހޭދަކުރާ މީހުން މަދެއް ނޫނެވެ. ޔޫޓިއުބާއި ނެޓްފްލިކްސް ފަދަ އެޕްލިކޭޝަން ތަކުގައިވެސް ގިނަ ބަޔަކު، ގިނަ ވަގުތުތަކެއް ދުއްވާލައެވެ. މީގެ ތެރޭގައި ވެސް ތަފާތު މީހުން އުޅެއެވެ. އެތަކެތީގެ ބޭނުން ހެޔޮގޮތުގައި ހިފާ މީހުންނާއި ބޭކާރު ކަންކަން ކޮށް ވަގުތު އިސްރާފު ކުރާމީހުންވެސް މެއެވެ. އަދި ފޯނު ބަލަމުން، އެކަނި އިނދެ ހޭ މީހުންވެސް މަދެއް ނޫނެވެ.

ދިރާސާވެރިން ދެކިލައްވާ ގޮތުގައި އެފަދައިން އެކަނި އިނދެ، ފޯނު ބަލަމުން ހޭ މީހުންނަކީ ނަފްސާނީ ގޮތުން މުޅިއަކުން ހަމަ ޖެހޭ ބައެއް ނޫނެވެ. ދުނިޔޭގައި ހިނގާ ހަގީގީ ކަންކަމަށް އެމީހުންގެ ނަޒަރު ހުއްޓޭ މިންވަރު ކުޑައެވެ. ނަމަވެސް ދުނިޔޭގައި ހަގީގަތަށް ނުހިނގާ، އެހެނަސް ބަޔަކު ކުޅެފައި ހުންނަ އެފަދަ މަންޒަރުތަކަށް ބަލާ ހީ ހަދާ މީހުންނަކީ ހަގީގީ ދުނިޔެ މަތިން ފޫހިވެފައި ތިބޭ ބައެއްކަމަށް ބައެއް ދިރާސާވެރިން ދެކިލައްވައެވެ. ހަގީގަތް ގަބޫލު ނުކުރުމަކީ އެފަދަ މީހުންގެ މިޒާޖެކެވެ. ހަގީގަތަކަށް ތަބާ ވުމުގެ ބަދަލުގައި އެމީހުން ތަބާ ވަނީ އެފަދަ އަސްލެއް ނެތް ހިޔާލީ މަންޒަރުތަކަށެވެ.

ދުނިޔޭގައި ކުރާނޭ ކަންތައް ހުސްވީ ހެއްޔެވެ؟ ތިމާގެ އަގު ބޮޑު ވަގުތުތައް ފޯނު ބަލަން ތިޔަ ހޭދަ ކުރަނީ ހަގީގަތަށް ނުވާ މަންޒަރުތަކެއް ބަލާށެވެ. އަދި އެމަންޒަރުތަކުގައި ތިބާ ތިޔަ މަޖާ ނަގަނީ ދުނިޔެ ތިބާއަށް ކޮން ލަނޑެއް ދިނީމާ ހެއްޔެވެ؟ އެކަނި އެކަހެރިވެ، އެފަދަ މަންޒަރުތަކަށް ނަޒަރު ހުއްޓި، އެކަނި ހޭ މީހުން، އެކަނިވެރިކަމަށް ލޯބި ކުރެއެވެ. އެކަނި އެކަހެރިކޮށް ގިނަ ވަގުތު ހޭދަކުރަން ބޭނުން ވެއެވެ. އެންމެ ފަހުން އެކަންތައް ބޮޑު ނަފްސާނީ ބައްޔަކަށްވެ، ޑިޕްރެޝަނާއި އެންޒައިޓީ ފަދަ ހާލަތްތަކަށް ހުށަހެޅިގެން ދެއެވެ. މިއީ ބައެއް ދިރާސާވެރިން ދެކިލައްވާ ގޮތެވެ.

މިކަމުގައި ދެންވެސް ހިޔާލުތަފާތުވާ ބަޔަކު އުޅެއެވެ. އެއީވެސް ދިރާސާވެރިންނެވެ. އެބައިމީހުން ބުނާ ގޮތުގައި މިގޮތަށް އެކަނި އެކަހެރިކޮށް އިނދެ ފޯނު ބަލާ ހީ ހަދާ މީހުންނަކީ އެމީހުންގެ ދިރިއުޅުމުގައި (އެދުވަހެއްގައި) ދިމާވެފައި ހުންނަ ނުތަނަވަސްކަން ފިލުވާލުމަށް އެކަން ކުރާ މީހުންނެވެ. ނުވަތަ އެ ނުތަވަސްކަން ފިލާތީ އާދަވެ އެކަން ކުރާ މީހުންނެވެ. ހަގީގަތެއް ނެތް މަންޒަރުތަކެއް ނަމަވެސް އެ މަންޒަރުތަކުން ހިނިތުންވުން އިހުސާސް ކުރުވާނަމަ، ހަށިގަނޑުގައި އުފާވެރިކަން ފަތުރުވާ ހޯމޯނުތައް އުފައްދާނެއެވެ. އެހެންކަމުން އެއީ ނަފްސަށް ހަމަޖެހުން ލިބި، ބުރަވެފައިވާ ސިކުނޑިއަށް ލުއިކަމެއް ގެނެސްދޭ ކަމެކެވެ.

އާދޭހެވެ! އެކަނި އިނދެ ފޯނުބަލާ ހޭ މީހުންނާ ބެހޭ ގޮތުން ދެގޮތަކަށް އެބަ ވާހަކަ ދެކެވެއެވެ. މި ދެގޮތަކީވެސް ދިރާސާތަކެއްގެ މައްޗަށް ބިނާކޮށް ދިރާސާވެރިން ކަނޑައަޅުއްވާފައިވާ ގޮތްތަކެކެވެ. އެހެންކަމުން މިކަމުގައި އެހެން އިންސާނަކު މިނެކިރަންވާނީ އެ އިންސާނެއްގެ މުޅި ހަޔާތުގެ ވާހަކަ އަޑުއެހުމަށް ފަހުގައެވެ. އަދި މިކަމަކީ ތިމާއަށްވެސް ކުރެވޭ ކަމެއްނަމަ، މިކަމުގައި ތިމާގެ ހާލަކީ ކޮބައިކަންވެސް ތިބާ އަމިއްލަ އަށް ވިސްނާ ހޯދާށެވެ.