މިފަހަކުން މި ރާއްޖެއިން މި ފެންނަނީ އެކި އެކި ތަފާތު ކަންކަމެވެ. އެގޮތުން ބައެއް ސަރުކާރު މުވައްޒަފުންގެ މުސާރަ ބޮޑުކުރާ ކަމަކީވެސް ފެންނަ ތަފާތު ކަމެކެވެ. ޒަމާންތަކަށް އެއްވަރެއްގައި އޮންނަ އެ މުސާރަތައް ބޮޑުކުރާ ކަމީ ގިނަ ބަޔަކު އުފާކުރާ ކަމެކެވެ. އަދި އެކަމުގައި ޝަކުވާކުރާ މީހުންވެސް މަދެއް ނޫނެވެ.

މި ލިޔުމުގައި މި ބަލާލަނީ މުސާރަބޮޑުކުރުމުގައި ކަންވެދާނެ ގޮތަކަށެވެ. އާދޭހެވެ؟ ރަނގަޅީ މުސާރަ ބޮޑުކުރުން ހެއްޔެވެ؟ ނުވަތަ އެލަވަންސްތައް ބޮޑު ކުރުންހެއްޔެވެ؟ މިއީ ބަހުސް ކުރެވިދާނޭ މައުޟޫއެކެވެ. އެހެންނަމަވެސް މިކަމުގައި އިލްމީ އަދި ހަގީގީ ނަޒަރަކުން ބަލާލަމާ ހިނގާށެވެ.

މުސާރަ ބޮޑުކުރުމުން ބޮޑުވާނީ އެ ބައެއްގެ އެންމެންގެ މުސާރައެވެ. އަހަރެމެން ގަބޫލުކުރަންޖެހޭނެ ހަގީގަތަކީ ކޮންމެ ސިނާއަތެއްގައިވެސް މަސައްކަތަށް ފަރުވާކުޑަ މީހުންނާއި މަސައްކަތުގައި ނަކަރުހަދާ ޒިންމާއިން ރެކޭ މީހުން އުޅޭނެއެވެ. އަދި މަސައްކަތަށް ކަމޭހިތާ މަސައްކަތުގައި ހީވާގި މީހުންވެސް އުޅޭނެއެވެ. ޖުމުލަކޮށް މުސާރަ ބޮޑުކުރުމުން މި ދެބައިމީހުންގެ ވެސް މުސާރަ އިތުރުވެއެވެ. މާނައަކީ މަސައްކަތުގެ ހަރުދަނާކަން އިހުނަށްވުރެ އިތުރުވާން ޖެހޭ ސަބަބެއް ނެތްކަމެވެ. އެހެނީ ދެންވެސް މަސައްކަތަށް ފަރުވާކުޑަ، ރެކޭ މީހުން އުޅޭނީ ހަމަ އެހެންނެވެ. އެހެނީ އެމީހުންގެ މުސާރަވެސް ހަމަ ބޮޑުވާނެއެވެ.

ދެންއޮތީ މުސާރަ އެއްވަރެއްގައި ބަހައްޓާފައި، އެލަވަންސް އިތުރު ކުރުމެވެ. އެލަވަންސް އާންމުގޮތެއްގައި ދެވެނީ ކުރާ އިތުރު މަސައްކަތްތަކަށެވެ. އިސްވެ ދެންނެވި މަސައްކަތަށް ފަރުވާކުޑަ އަދި ރެކޭ މީހުންނީ މިދަންނަވާ އިތުރު މަސައްކަތްތައް ނުވަތަ އިތުރު ގަޑީގައި މަސައްކަތް ކުރަން ބޭނުންވާ ބައެއް ނޫނެވެ. ޝައުގުވެރިކަން ނުހުންނަނީއެވެ. ނަމަވެސް އެލަވަންސްތައް ބޮޑު ކުރާނަމަ، އެއްކަލަ ހީވާގި މީހުން އެ ކުރާ އިތުރު މަސައްކަތާއި އެކު އެމީހުންނަށް ލިބޭ ޖުމްލަ އާމްދަނީ ބޮޑުވާތަން ފެނުމާއި އެކު، މަސައްކަތަށް ފަރުވާކުޑަ، ރެކޭ މީހުންވެސް އިތުރު މަސައްކަތްތައް ކުރަން ޝައުގުވެރިވާނެއެވެ. އެހެނީ އެ އިތުރު މަސައްކަތް ނުކުރާނަމަ، ލިބޭނީ އޭރުވެސް ލިބުނު އާމްދަނީ ކަމުގައި ވާތީއެވެ. ޖުމުލަ އާމްދަނީގައި ކުރިއެރުމެއް ނުލިބޭތީއެވެ. މިހެން ވެއްޖެނަމަ މަސައްކަތުގެ ހަރުދަނާކަން އިތުރުވާނެއެވެ. މަސައްކަތުން ރެކެން އުޅޭ އުޅުން މަދުވާނެއެވެ. އިތުރުވަގުތުގައި ޝައުގުވެރިކަމާއި އެކު މަސައްކަތް ކުރާނެއެވެ. 

އާދޭހެވެ. ބޭނުންވަނީ ދެ ނަތީޖާއެވެ. މުވައްޒަފުންގެ ދިރިއުޅުމުގެ ފެންވަރު ރަނގަޅު ކުރުމާއި މަސައްކަތުގެ ހަރުދަނާކަން އިތުރުކުރުމެވެ. މިދެކަމުގެ އުންމީދުގައި އެބައިމީހުންގެ ޖުމުލަ އާމްދަނީ އިތުރުކުރުމަކީ ވަރަށް ރަނގަޅު ކަމެކެވެ. އެހެން ނަމަވެސް ސީދާ މުސާރަ އިތުރުކުރުމަށްވުރެ އެލަވަންސްތައް ބޮޑުކުރުން ރަނގަޅެއް ނޫންތޯއެވެ؟