ތުންބިއްސަކީ އިންސާނާގެ ތުންފަތުގައި ނަގާ ބިއްސެކެވެ. ނުވަތަ ބިހިބޮނޑިއެކެވެ. ކެހުމަކާއި އެކު ނަގާ މި ބިހިތަކަކީ ވައިރަލް އިންފެކްޝަނެއްގެ ސަބަބުން ނަގާ ބިހިތަކެކެވެ. މި ބިހިތައް ފަޅައިގެން ގޮސް އެތަނުގައި ކުރަގަނޑެއް ލައެވެ. އަދި އެ ކުރަގަނޑު ފިލާ ދިއުމަށް ހަފްތާއަކާއި ދެ ހަފްތާއާއި ދޭތެރޭގެ މުއްދަތެއް ނަގައެވެ. އެ ކުރަގަނޑު ނެއްޓުމާއި އެކު ފަނޑު ލަކުނެއް އިން ނަމަވެސް، ދުވަސްކޮޅަކުން އެ ލަކުނު ފިލާ ދެއެވެ.
ތުންބިހީގައި ތުންފަތް ދުޅަވެ، ތަދުވެ، ރަތްވެލުމަށްފަހު ކުދި ބިހިތަކެއްގެ ގޮތުގައި ފާޅުވާން ފަށައެވެ. އަދި އެބިހިތަކަށް ފެންއަރާ އޭގެ އަމިއްލަ ޒާތުގައި ފަޅައިގެން ދެއެވެ. މިގޮތަށް އެ ބިހިތަށް ފަޅައިގެން ގޮސްފައި ހުންނަ އިރު އެއީ ކުދި ފާރުކޮޅުތަކެއް ކަހަލަ ތަންކޮޅުތަކެކެވެ. ޠަބީއީގޮތުން މިއީ އޭގެ ޒާތުގައި ފަސޭހަވެގެން ހިނގައިދާނެ ކަމެކެވެ.
ކަންއޮތީ މިހެންނަމަވެސް ތުންބިހީގެ އަލާމާތެއް ކިރިޔާވެސް ހުންނަ މީހަކު މިކަމަށް ސަމާލުކަން ދޭން ވާނެއެވެ. ވަރަށް ބޮޑަށެވެ. އެހެނީ މިއީ ފަސޭހަކަމާއި އެކު އަނެކާއަށް ފެތުރިދާނެ ކަމަކަށް ވާތީއެވެ. ތުންބިއްސެއް ނަގާފައި ހުންނަ މީހާ ފެންބޯ ތައްޓާއި ކައިހަދާ ސަމްސަލާއި އޫފަދަ ތަކެތި ރީތިކޮށް ދޮންނަން ވާނެއެވެ. އެމީހުންގެ ގައިގާ ބައްދާ ބޮސްދީ ހެދުންވެސް ރަނގަޅެއް ނޫނެވެ. އެހެނީ ކުޅުގެ ޒަރިއްޔާއިންނާއި ތުންބިހީގައި ހުންނަ ފެނުގެ ސަބަބުން މިއީ ފަސޭހަކަމާއި އެކު ފެތުރިދާނެ އެއްޗެކެވެ.
ތުންބިއްސެއް ނެގުމާއި އެކު ހުން އައިސް ބޮލުގައިރިހި މިފަދަ އެހެން އަލާމާތްތަކެއް ފެންނަ ނަމަ ލަސްނުކޮށް ޑަކްޓަރަކަށް ދައްކަންވާނެއެވެ. އެހެނީ މިކަމުގައި އަޅާނުލާނަމަ ގައިގެ އެހެން ހުސާބުތަކުގައިވެސް އެފަދަ ބިހިތަކެއް ނެގުމުގެ ފުރުސަތު އޮވެދާނެތީއެވެ. އެގޮތުން ދެޖިންސުގެ މީހުންގެވެސް ކުރިމަތިފަރާތުގައި އެފަދަ ބިހިތަކެއް ނެގުމަކީ އެކަށީގެންވާ ކަމެކެވެ.
ތުންފަތް ތެތްކޮށް ބެހެއްޓުމާއި އެކު ފިނި ބުއިންތައް މަދުކުރުމަކީ އާންމުކޮށް ތުންބިހި ނަގާ މީހެއްނަމަ އެކަން އެމަގުން ނުދިޔުމަށް ކުރެވިދާނެ ވަރަށްވެސް މުހިއްމު ކަމެކެވެ. ނަމަވެސް ތުންބިއްސެއް ނެގައިފި ނަމަ ފިނިއެއްޗަކުން އެތަނެއްގައި ޖައްސާ "ބޮނޑިތާން" ކުރުމަކީ އަވަހަށް އެތަނެއް ފަސޭހަވެގެން ހިނގައިދާނެ ކަމެކެވެ. އަދި ތަދުގެ އިހުސާސް ކުޑަކުރެވިދާނެ ކަމެކެވެ. މި ބަލާލެވުނީ ތުންބިއްސާއި ބެހޭ ވަރަށް އާއްމު މައުލޫމާތު ކޮޅަކަށެވެ. ނަމަވެސް އަދިވެސް މިކަމާއި ބެހޭގޮތުން ދެއްކިދާނެ ވާހަކަތައް އެބަހުއްޓެވެ.