އަޑުގަދަ މީހާ ރުއް ގިނަ ވާނޭ ބުނާ އުސޫލަކީ މާ ކުރީއްސުރެ އަހަރެމެން ގަބޫލު ކުރާ ކަމެކެވެ. މިކަން މިހެން ވަނީ އަޑުގަދަ މީހާގެ ބާރުގެ ދަށަށް ގިނަ ކަންކަން ފަސޭހަ ކަމާއެކު ވައްދާލެވޭތީއެވެ. އެހެންކަމުން އަޑުގަދަ ގޮތުގައި ހިފަހައްޓާލާފައި ހުންނަ މީހުންނަކީ ވަރަށް ގަޓު ބައެއް ކަމަށް އަހަރެމެން ދެކެމުއެވެ. ނަމަވެސް އޭގެ ބައެެއް މީހުންނަކީ އެމީހުންގެ އަޑުގައި ބާރުކަމެއް ހުއްޓަސް އެއްވެސް އުރައްޕަތެއް ހުރި ބައެއް ނޫނެވެ. 

އާދޭހެވެ! ދަންނަވަން މިއުޅޭ ވާހަކަ އަކީ ރަށުތެރޭގައި އަޑުގަދަ މީހާ، ކަންކަމުގައި ގޮތުގައި ހިފަހައްޓާ މީހާގެ ބާރު، އެއްވެސް ބާރަކާ ނުލާ ފޯރާ ހިސާބަށް އެ ބާރު ނުފޯރާ ވާހަކައެވެ. އެއީ ރަށުތެރޭގައި އަޑުގަދަ ބަފައިންގެ ކޮންޓްރޯލުން އެމީހުންގެ އަމިއްލަ ދަރިން ކަޓާފައި ހުންނަ ވާހަކައެވެ. 

ރަށުގެ އިޖްތިމާއީ ސިޔާސީ އަދި ރަށްވެރި ކަންކަމުގައި މި މީހުންގެ އަޑު ވަރަށް ގަދަވާނެއެވެ. ހަޅޭލަވާ ޒުވާބުވެސް ކުރާނެއެވެ. ގަޔަށް އަތްލާ މާރާމާރީވެސް ހިންގުމަކީ މިފަދަ މީހުންނަށް މާ ބޮޑު ކަމަކަށްވެސް ނުވެއެވެ. އެއީ އެމީހުންގެ އަޑުގަދަ ކަމުންނެވެ. "ގަޓު" ހުންނާތީއެވެ. ކެރޭ މީހަކަށް ވާތީއެވެ. ރަށުގައި ހިނގާ ހަމަ ކޮންމެ ކަމަކަށް ގޮތް ފާޑު ކިޔާނެއެވެ. ކަމެއް ވެ ނިމުމުން އެކަމެއް އެވެނި މިވެނި ގޮތަކަށް ކުރިއްޔާ އަދި މާ ރަނގަޅުވާނޭ ބުނާނެއެވެ. ހުރިހާ އެއްޗެއް ވެސް އިނގޭނެއެވެ. ކަމެއްގައި ހިޔާލުތަފާތުވެއްޖެނަމަ ގޮތެއް ދުލެއް ނުކުރާނެއެވެ. އެހެނީ އަނެކާގެ ކުރިމަތީގައި ތިމާ ގޮތް ދޫކޮށްފިނަމަ ތިމާގެ އަގުވެއްޓުނީކަމަށް އެބައިމީހުންނަށް ހީވާތީއެވެ.

ދަންނާށެވެ! އަނެކާގެ ކުރިމަތީގައި ބުނަން ބޭނުން އެއްޗެއް ބުނެ، އަނެކާ ލައްވާ ކުރަން ބޭނުންވާ ކަމެއް ކުރުވާ، އަނެކާގެ ކުރިމަތީ ގޮތް ދޫނުކުރަނީ "ގަޓު" ކަން ދައްކާށެވެ. ނަމަވެސް ހިތާމަ އަކީ މިފަދަ ބަފައިންނަކީ އެމީހުންގެ ދަރިން ކުރިމަތީގައި ވަރަށް ފަސޭހައިން ގޮތް ދޫކުރާ ބައެކެވެ. އެ ދަރީގެ މައްޗަށް އެ ބައްޕަގެ އެއްވެސް ކޮންޓްރޯލެއް ނޯވެއެވެ. އެ ދަރިން އުޅެނީ އުޅޭނެ ގޮތަކަށެވެ. ހިތުހުރި ގޮތަކަށެވެ. ބޮޑުވަމުން އަންނަނީ އެކުދިންގެ ބައްޕަގެ މިޒާޖުގައެވެ. އަޑުގަދަކޮށް ގޮތް ދޫނުކުރާ މީހެއްގެ ގޮތުގައެވެ.

އާދޭހެވެ! މުޖުތަމައު ކޮންޓްރޯލު ކުރަން އަޑުގަދަކޮށް "ގަޓު" ދެއްކިޔަސް ތިމާގެ ބާރު ހިނގާ ތިމާގެ އޮޅީގެ ތެރޭގައި ހުރި ތިމާގެ ދަރިން ކޮންޓްރޯލު ނުކުރެވޭނަމަ ތިޔައީ ބޮޑު ފިނޑިއެކެވެ. މުޖުތަމައު އިސްލާހު ކުރަން އަޑުގަދަ ކުރާނެ ކަމެއް ނެތެވެ. ޖަމާއަތުގެ ކަންކަމުގައި ގޮތްފާޑު ކިޔާނެ ކަމެއް ނެތެވެ. އިހަށް ތިމާގެ ފުރިހަމަ ބާރު ހިނގާ ތިމާގެ އޮޅީގެ އެތެރޭގެ ކޮންޓްރޯލު ނަގާށެވެ. ހިތުހުރި ގޮތަކަށް ތިމާގެ ދަރިން ބޮޑުވިޔަ ނުދޭށެވެ. އެއީ މިނިވަންކަމެއް ނޫނެވެ. ކޮންމެ މިނިވަންކަމެއްގަައި ގައިދުވެފައިވާ އިމެއް ވާނެއެވެ. އެފަދައިން ދަރިންގެ ކޮންޓްރޯލު އޮތުމަކީ އަދި އެ ދަރިންގެ ހައްގަކަށް އަރައިގަތުމެއްވެސް ނޫނެވެ. އެއީ ތަރުބަވީ ހަޔާތުގައި އެދަރިން ހިނގާނޭ މަގު ދެއްކުމެވެ. 

ކަން މިހެން ހުރުމާއި އެކު ރަށުތެރޭ އަޑުގަދަކޮށް "ގަޓު" ކަން ދައްކަން އުޅޭ މީހާ ދަންނާށެވެ. އިހަށް ތިމާގެ ދަރިންނީ ކިޔަމަންތެރި ބަސްއަހާ، އަހުލާގު ރިވެތި ބަޔަކަށް ހަދާށެވެ. ޖަމާއަތުގެ ކަންކަމާ އުޅޭނީ އޭގެ ފަހުންނެވެ.