ހަގީގީ މުއްސަނދި ކަމަކީ ނަފްސުގެ މުއްސަނދިކަން ކަމަށާއި ފައިސާ އާއި މުދަލުގެ ތަނަވަސްކަން ހުރިނަމަވެސް ނަފްސުގެ މުއްސަނދިކަން ނެތްނަމަ އެއީ ފަގީރެއް ކަމަށް މިއަދުގެ ޚުތުބާގައި ވަނީ ބުނެފައެވެ.

މި ހަފްތާގެ ހުކުރު ޚުތުބާ ހާއްސަ ކޮށްފައިވަނީ ނަފްސުގެ މުއްސަނދިކަމުގެ މައްޗަށެވެ. އެގޮތުން، ތަބީއީގޮތުން އިންސާނާ، މުދާދެކެ ލޯބިވާ ކަމަށާއި އޭގެ ސަބަބުން ދުންޔަވީ އަރާމުގެ ސާމާނު އެއްކޮށް، ގިނަ ކުރަން އިންސާނާ އެދޭއިރު މިކަންކަމުގެ ސަބަބުން އޭނާ ޙައްގު މަގުން ކައްސާލައިގެން ދާތަން ފެންނަ ކަމަށް ޚުތުބާގައި ވަނީ ފާހަގަކޮށްފައެވެ.

ދުނިޔަވީ އަރާމު ހޯދުމަށް މާތް ﷲ ހަރާމް ކުރައްވާފައިވާ މަގުތަކުންނާއި ވަސީލަތްތަކުން މުއްސަނދިކަން އިތުރުކުރަން އިންސާނާ މަސައްކަތް ކުރާކަން ފާހަގަކޮށް ޚުތުބާގައި ބުނީ މީގެ ސަބަބުން އިންސާނާއަށް އޭނާ ހެއްދެވި މަގުސަދު އޮޅި، ހުރިހާވެސް ބޭނުމަކީ ދުނިޔެ ހޮދުން ކަމުގައި ހަދާ ކަމަށެވެ. ނަމަވެސް އިސްލާމީ ޝަރީއަތް އައިސްފައިވަނީ ދެ ދުނިޔޭގެ ހަޔާތް ބާއްޖަވެރިކުރާނެ ގޮތް ބަޔާންކޮށްދެމުން ކަމަށައި އެހެންވެ، އިންސާނާ އެންމެ ކަންބޮޑުވާކަމަކީ ދުނިޔެ ހޯދުން އެކަނި ކަމުގައި ހަދައި، އާޚިރަތް ނަގައިނުލުމަށް އިސްލާމްދީން ގޮވާލާކަން ވެސް ޚުތުބާގައި ވަނީ ފާހަގަކޮށްފައެވެ.

ކީރިތި ރަސޫލާގެ ހަދީސެއްގައި މުއްސަނދިކަމަކީ މުދާ ގިނަވުމެއް ނޫން ކަމަށާއި މުއްސަނދިކަމަކީ ނަފްސުގެ މުއްސަނދިކަން ކަމަށް ވާކަން ފާހަގަކޮށް ޚުތުބާގައި ބުނީ މި ބަސްފުޅުން އިންސާނާ ދުނިޔޭގައި އަމާޒުހިފަންވީ މިސްރާބު ވަރަށް ރަނގަޅަށް އެނގޭ ކަމަށެވެ.

ޚުތުބާގައި ބުނިގޮތުގައި ރަސޫލާގެ ބަސްފުޅުން އެނގޭގޮތުގައި ހަގީގީ މުއްސަނދިކަމަކީ މުދަލާ ފައިސާ ގިނަވުމެއް ނޫނެވެ. އެގޮތުން، އެ މީހެއްގެ އަތުގައި ފުދި އިތުރުވާ މިންވަރަށް ހުރިހާ އެއްޗެއް ހުއްޓސް ދުނިޔެވީ އެދުންތަކަށް ނިމުމެއް ނާންނާނެ ކަމަށާއި އަބަދުވެސް އިތުރަށް އެދޭނެ ކަމަށް ވަނީ ބުނެފައެވެ. އެހެންކަމުން އެ މީހާއަކީ ފަގީރެއް ކަމަށް ވެސް ޚުތުބާގައި ވަނީ ސިފަކޮށްފައެވެ.