ބަލިތަކުގެ ތެރެއިން ކެންސަރު ބައްޔަކީ އެ ބައްޔަކާއި މެދު އަހަރެމެން ބިރުގަނެ ކަންބޮޑުވާ ބައްޔެކެވެ. އެހެން އެކަން ވަނީ މި ބަލީގައި ގިނަބަޔަކު ދުނިޔެ ދޫކުރާތީއެވެ. ނަމަވެސް މިއީ ފަރުވާކޮށް ފަސޭހަ ނުކުރެވޭނެ ބައްޔެއް ނޫނެވެ. މިކަމުގައި އޮތީ ބަލީގެ ކުރީކޮޅު، ބަލި ދެނެގަތުމެވެ. ބަލީގެ ކުރީކޮޅު ބަލި ދެނެގަނެވިއްޖެނަމަ ކެންސަރު ބަލީގެ ފަރުވާގައި ފަސޭހަކަމާއި އެކު ކުރި ހޯދިދާނެކަމަށް ޑަކްޓަރުން ބުނެއެވެ.
މިގޮތަށް ބަލީގެ ކުރީގެކޮޅުގައި ބަލި ދެނެގަނެވިއްޖެނަމަ، ބަލީގެ މަރުހަލާ ވެސް ސާފުވެގެން ދާނެއެވެ. އެހާރުން އެ މަރުހަލާއަށް ބޭނުންވާ ސީދާ ފަރުވާއަށް ފަސޭހަ ކަމާއި އެކު ދެވޭނެއެވެ. އެހެންކަމުން މިކަމުގައި އެއްމެ މުހިއްމީ ބަލީގެ ކުރީކޮޅު ބަލި ދެނެގަތުމެވެ. ދެން އުފެދޭ ސުވާލަކީ ބަލީގެ ކުރީކޮޅު ބަލި މީހާއަށް އެކަން ދެނެގަންނާނީ ކިހިނެއްތޯއެވެ؟
ބައެއްކަހަލަ ކެންސަރު ތަކުގައި އެ ކެންސަރުތަކުގެ ސްކްރީނިން މަރުހަލާ އަކީ ކޮންމެ މީހަކަށްވެސް އަމިއްލަ އަށް ކުރެވިދާނޭ ކަންކަމެވެ. ހާއްސަކޮށް އުރަމަތީގެ ކެންސަރުފަދަ ކެންސަރުތަކުގައެވެ. މިފަދަ ސްކްރީނިންގ ތަކާއި ބައެއްކަހަލަ ބެލުންތައް ޑަކްޓަރުންވެސް ބަލާނެއެވެ. ހަށިގަނޑުގެ ތަނެއްގައި ގަނޑުލާ ނުވަތަ ގޮށެއް ނަގާފައި ހުރެދާނެއެވެ. ދުޅަވެ ހަރުވެފައި ހުރެދާނެއެވެ. ހަންގަނޑު ހާދަޔާ ހިލާފަށް ހޫނުކޮށް ހުރެދާނެއެވެ. ހަމުގެ ކުލަ ބަދަލުވެފައި ހުރެދާނެއެވެ. ދަތުވެދާނެއެވެ. އޮބާލުމުން ހަރުކޮށް ހުރެދާނެއެވެ. މިފަދަ ކިތައްމެ ކިތައްމެ ޑަކްޓަރުން ހޯދާ ބަލާނެއެވެ. ޝައްކު ކުރެވޭ ކަންކަމުގައި އިތުރު ތަހުލީލުތައް ހަދާނެއެވެ.
ލެޔާއި ކުޑަކަމުދާ ތަކެތީގެ ތަހުލީލުތަކުގައި އާދަޔާ ހިލާފު ނަތީޖާތަކެއް ވާނަމަވެސް އެއީ ކެންސަރުކަން ދެނެގަތުމަށް އޮތް މަގެކެވެ. އެކަންކަމަކީ ކަމުގެ މާހިރުންނަށް ފަސޭހަ ކަމާއި އެކު ދެނެގަނެވޭނޭ ކަންކެމެވެ. އޭގެ އެއް މިސާލަށް ބަލާލާނަމެވެ. ލޭގެ ކެންސަރު ޖެހިފައިވާ މީހެއްނަމަ، އެއްމެ އާދައިގެ ލޭގެ ތަހުލީލެއް ކަމަށްވާ "ކޮމްޕްލީޓް ބްލަޑް ކައުންޓް" ނަމަކަށް ކިޔާ ލޭގެ ތަހުލީލަކުން ލޭގައި ހުންނަ ހުދުލޭހަތާތަށް އާދަޔާ ހިލާފަށް ގިނަކޮށް ދައްކާނެއެވެ. ފަހަރުގައި އެއީ އެހެން ބައްޔެއްގެ ސަބަބެއް ކަމަށް ވެދާނެއެވެ. ނަމަވެސް ބޭހާއި އެކުވެސް އެކަން ރަނގަޅުނުވެ، ހަދާ ކޮންމެ ލޭގެ ތަހުލީލަކުން އެކަން ތަކުރާރުވާނަމަ، ކުރިއަށް އެހެން ފިޔަވަޅެއް އަޅާނެއެވެ. ނުވަތަ އަޅަން ވާނެއެވެ. އިސްވެ ދެންނެވުނު، "ކޮމްޕްލީޓް ބްލަޑް ކައުންޓް" އަކީ ރާއްޖޭގެ އެއްމެ އާދައިގެ ހެލްތް ސެންޓަރު ތަކުގައި ހުންނަ ލެބޯޓަރީތަކުންވެސް ހެދޭ ޓެސްޓް ތަކެވެ.
އެކިކަހަލަ އިމޭޖިން ޓެސްޓް ތަކަކީވެސް ކެންސަރު ދެނެގަތުމަށް ހެދިދާނޭ ޓެސްޓް ތަކެވެ. އެއީ އެކްސް-ރޭ، އެމް.އާރު.އައި، ސީ.ޓީ.ސްކޭން، ޕީ.އީ.ޓީ.ސްކޭން، މެމޯގްރާމް އަދި އަލްޓްރާ ސައުންޑް ސްކޭން ފަދަ ތަހުލީލުތަކެވެ. މިފަދަ ޓެސްޓްކުން ބޮޑަށް ފާހަގަ ކުރެވޭނީ ސީދާ ވަކި ގުނަވަންތަކެއްގައި އާދަޔާހިލާފު ކަންތައްތަކެއް ހުރި ތޯއެވެ. އެގޮތުން ވަކި ހާއްސަ، އާދަޔާ ހިލާފުކަމެއް ފާހަގަ ނުވުމާއި އެކު، އެހެންނަމަވެސް އާދަޔާހިލާފު ކަމެއް ފާހަގަ ވާނަމަ، ކެންސަރުގެ ތަހުލީލުގައި ކުރިއަށް ފިޔަވަޅު ނަގާނެއެވެ. ނުވަތަ ނަގަން ވާނެއެވެ.
ދެން އޮތީ ކެންސަރުކަން ޔަގީންކުރާ އެއްމެ ސައްޙަ ތަހުލީލެވެ. އެއީ ކެންސަރު ހުރި ކަމަށް ޝަައްކު ކުރެވޭ ގުނަވަނެއްގެ ނުވަތަ ތަނެއްގެ ތަހުލީލީ އެތިކޮޅެއް، ނަގާ އެއިން ތަހުލީލުތައް ހެދުމެވެ. މިއަށް "ބަޔޮޕްސީ" އޭ ކިޔައެވެ. ގިނަ މީގެ ތަހުލީލު ތަކަކީ ރާއްޖެއިން ބޭރަށް އޭގެ ސުންކު ފޮނުގައިގެން ހެދޭ ތަހުލީލުތަކެވެ. ހަމަ އެއާއި އެކު މިއީ ކެންސަރު ބަލީގެ މަރުހަލާ ކަނޑައަޅަންވެސް ބޭނުން ކުރާ ތަހުލީލެވެ.
ެިއިސްވެ މި ދެންނެވި ކަންކަމަކީ ގިނަފަހަރަށް ޑަކްޓަރުން އިސްވެ ކުރާނޭ ކަންކަމެވެ. ހަދާނޭ ތަހުލީލު ތަކެވެ. ނަމަވެސް ބަލިމީހާގެ ހިތުގައި ކެންސަރުގެ ޝައްކާއި ބިރުވެރިކަން އޮވެމެ، ޑަކްޓަރު އެ ތަހުލީލުތައް ނުހަދާނަމަ، އެ ތަހުލީލުތައް ހަދައި ދިނުމަށް އެދުމަކީ ބަލިމީހާއަށް ލިބިގެންވާ ހައްގެކެވެ. އެމީހެއްގެ ސިއްހަތަށް އެމީހަކު ނުބެލިވަރަށް ބަލާނޭ އެހެން މީހަކު ނުހުންނާނެއެވެ. އެހެންކަމުން އުނދަގޫތަކެއް ވުމާއި އެކު، އިސްވެ ދެންނެވި ފުރަތަނަ އަދި ދެވަނަ ތަހުލީލީ ގޮތްތަކުގައި އެއިން ކަމެއް ފާހަގަ ވާނަމަ ކުރިއަށް ފިޔަވަޅެއް އަޅަން ވާނެއެވެ. ބުއްދިވެރި ގޮތަކީ އެއީއެވެ.