އަންނަ މަހު ބާއްވާ މޯލްޑިވްސް މެރިން އެކްސްޕޯގެ މެއިން ސްޕޮންސަރަކަށް އެމްޓީސީސީ ހަމަޖައްސައިފިއެވެ.
ރާއްޖޭގައި ބާއްވާ ކަނޑުގެ އުޅަނދުފަހަރުގެ އެންމެ ބޮޑު އެކްސްޕޯ، މޯލްޑިވްސް މެރިން އެކްސްޕޯގެ މިއަހަރުގެ އެޑިޝަން ބާއްވާނީ މާރިޗް މަހުގެ 15 އިން 18 ވަނަ ދުވަހުގެ ނިޔަލަށެވެ.
މީގެ ކުރީ އަހަރުތަކެކޭ އެއްފަދައިން މިއަހަރުގެ މެރިން އެކްސްޕޯ ވެސް ކުރިއަށްގެންދިއުމަށް ހަމަޖެހިފައިވަނީ ހުޅުމާލެ، ސެންޓުރަލް ޕާކުގައެވެ.
މި އަހަރުގެ މެރިން އެކްސްޕޯ ބޭއްވުމަށް ހަމަޖެހިފައިވަނީ އޭޝިއާގެ ލީޑިންގ ސްކޫބާ ޑައިވިންގ އެގްޒިބިޝަން ބްރޭންޑް "އޭޝިއާ ޑައިވް އެކްސްޕޯ މޯލްޑިވްސް (އެޑެކްސް)" އާ ވެސް އެކީގައެވެ. އެޑެކްސް މޯލްޑިވްސް އަކީ ރާއްޖޭގައި ޑައިވިންގ ދާއިރާގައި ހަރަކާތްތެރިވާ ފަރާތްތަކަށް ހާއްސަކޮށްގެން ބާއްވާ ފުރަތަމަ އިވެންޓެވެ.
މި ފަހަރުގެ މެރިން އެކްސްޕޯގެ ޕާޓްނަރުންނާއެކު ސޮއިކުރުމުގެ ރަސްމިއްޔާތު ބާއްވާފައިވާއިރު، ކޯ ސްޕޮންސަރަކަށް ހަމަޖައްސާފައިވަނީ ގަލްފް ކްރާފްޓް މޯލްޑިވްސް އެވެ. ޑިޖިޓަލް ޕާޓްނަރަކަށް އުރީދޫ މޯލްޑިވްސް ހަމަޖައްސާފައިވާއިރު، އޮފިޝަލް ފިއުލް ޕާޓުނަރަކީ ދަ ހޯކްސް ޕުރައިވެޓް ލިމިޓެޑެވެ.
އެކްސްޕޯގެ އިތުރު ޕާޓްނަރުންގެ ތެރޭގައި؛ އޮފިޝަލް ޕުރޮޑަކްޓަކީ ހަސަން މެރިންގެ މާކިއުރީ އިންޖީނެވެ. އެކްސްޕޯގެ އޮފިޝަލް ސަޕްލަޔަރަކަށް މެރިން އިކުއިޕްމަންޓްސް ހަމަޖައްސާފައި ވާއިރު ވޯޓާ ސްޕޯޓްސް ޕާޓުނަރަކީ އޯޝަން ގުރޫޕު މޯލްޑިވްސް އެވެ. އަދި އޮފިޝަލް ޑައިވް އިކުއިޕްމަންޓު ސަޕްލަޔަރަކީ ސީގިއާ އެވެ.
މޯލްޑިވްސް މެރިން އެކްސްޕޯ އަކީ ނޭޝަނަލް ބޯޓިން އެސޯސިއޭޝަން އޮފް މޯލްޑިވްސް (އެންބީއޭއެމް) އިން 2014 ވަނަ އަހަރުން ފެށިގެން ރާއްޖޭގެ ބޯޓިން ދާއިރާ އަށް ހާއްސަކޮށްގެން ބާއްވަމުން އަންނަ މައުރަޒެކެވެ.