މުދަލާ ފައިސާ އާއި ހެދިގެން އުޅުނަސް ތިޔައީ ދެން ބޮޑުވަރެކެވެ! މިއީ މިއަދު ވަރަށްގިނަ ބަޔަކު، ހަމަ އެހާ ގިނަ ބަޔަކާއި ދިމާލަށް ބުނެ އުޅޭ ބަހެކެވެ. މިއީ ވިސްނާލަން ވެސް ރަނގަޅު ކަމެކެވެ. ފުރަތަމައީ އެހެން ބުނެގެން ވާނެތޯ އުފެދޭ ސުވާލެވެ. ދެވަނައީ އެބުނާހެން އުޅެން ވާނެތޯ އުފެދޭ ސުވާލެވެ.

އާދޭހެވެ! ކޮންމެ މީހެއްގެވެސް ހަޔާތަކީ އެމީހަކު އަމިއްލަ އަށް ކުރުހާ ކުލަޖައްސާ އެއްޗެކެވެ. ހަގީގަތަކީ އެހެން މީހުންނަށް އަނެކާގެ ހަޔާތުގައި ރޮނގެއް ނުދެމޭނެކަމެވެ. ނަމަވެސް އެބުނާހެން ފައިސާ އާއި މުދާ ހޯދުމުގައި އެއްބަޔަކު އުޅެނީ ދުނިޔޭގެ އާދަތަކާއި މުޅިން ހިލާފަށެވެ. ހަރާމެއް ހަލާލެއް ނުބަލައެވެ. ލިބެން އޮތް އެއްޗެއް ވިއްޔާ ދަމައިގަންނަނީ އެ އެއްޗެއްގެ ހުކުމާއިމެދު ވިސްނާވެސް ނުލައެވެ. ދުނިޔެމަތީގައި ފަހަރުގައި އޭގެ އުގޫބާތް ނުލިބިދާނެއެވެ. އެހެނަސް މުސްލިމުންނަށްވީތީ، ހަރާމް ގޮތުގައި ހޯދާ ފައިސާގެ ސަބަބުން ބޮޑެތި އުގޫބާތްތަކާއި ކުރިމަތިވާނޭކަން އަހަރެމެން ގަބޫލުކުރަންވާނެެއެވެ.

އެއްބަޔަކު ހަރާމެއް ހަލާލެއް ނުބަލާ ފައިސާ ހޯދަމުން ދާއިރު އަނެއްބަޔަކު ފައިސާ ހޯދަނީ ހަލާލު ގޮތުގައެވެ. ނަމަވެސް މީގެ ތެރެއިން އެއްބައި މީހުންނީ އެ ފައިސާ ހޯދުމުގައި ދޭދޭ ގުޅުންތަކަށް ބަލާ ބައެއް ނޫނެވެ. މުދަލާ ފައިސާގެ އަވާގައި ޖެހިގެން ގޮސް އާއިލީ ގުޅުންތަކަށް ބަލައެއް ނުލައެވެ. އާއިލީ ކަންކަމުގައި ބައިވެރިއެއް ނުވެވެއެވެ. އާއިލާ އާއި އެކު ވަގުތު ހޭދަންކޮށްލަން އަވައްޖެއް ނުވެއެވެ. އަނބިދަރިންނާއި މައިންބަފައިންނާއި އެކީ އެކުވެރި އުފާވެރި ވަގުތުކޮޅެއް ހޭދަކޮށްލުން އޮންނަނީ ބުރަ ކަމަކަށް ވެފައެވެ. ދަރިއަކު ބަލިވެގެން ޑަކްޓަރަށް ދައްކަންވެސް ވަނީ ބޮޑު ތަކުލީފަކަށެވެ. އާދޭހެވެ! ކަން އޮތީ އެމަގުން ނަމަވެސް އެބައިމީހުން ކުރަނީ ހަލާލު މަސައްކަތެކެވެ.

އެކުވެރިންނަކީ އިންސާނެއްގެ ހަޔާތުގައި ވަރަށް މުހިއްމު ބައެކެވެ. ނަމަވެސް ބައެއް މީހުން މުދަލާއި ފައިސާ ހޯދުމުގައި އަވަދިނެތި ވަނީ އެކުވެރިން މަތިން މުޅިން ހަނދާން ނައްތާލާފައެވެ. އެކުވެރިންނާއި އެކީ ކޮފީ ބުއިމާއި ހީ ސަމާސާކޮށް ސަކަރާތްޖަހާލާނޭ ވަގުތެއް އެބައިމީހުންނަކަށް ނުލިބެއެވެ.

ދެންއޮތީ އިޖްތިމާއީ ގުޅުންތަކާއި އިޖްތިމާއީ މަސައްކަތްތަކެކެވެ. އަމިއްލަ ވިޔަފާރިއާއިގެން އެހެން ކަމެއް ކުރާނޭ ވަގުތެއް ގިނަ މީހުންނަކަށް ނުވެއެވެ. އަމުދުން އިޖްތިމާއީ ކަންކަމުގައި ބައިވެރިވުން އެއީ ކުރުން ނަފްރަތު ކުރާ ކަހަލަ ކަމެއް ކަމުގައި ވެދެއެވެ. އެހެން ނުވާންވީ ކީއްވެ ހެއްޔެވެ؟ އިޖްތިމާއީ މަސައްކަތްތަކަކީ އެއިން މުދަލާއި ފައިސާ އެކޮށް ޖަމާ ކުރެވޭނޭ މަސައްކަތްތަކެއް ނޫނެވެ. އެހެންކަމުން މުދަލާއި ފައިސާ އާއި ހެދިގެން އުޅޭ މީހަކަށް އެފަދަ މަސައަކަތެއް ކުރެވޭނީ ކިހިނަކުން ހެއްޔެވެ؟

އާދޭހެވެ! މުދަލާ ފައިސާ އާއި ހެދިގެން އުޅުނަސް ތިޔައީ ބޮޑުވަރެކެވެ! ހޯދާ މުދަލާ ފައިސާ އަކީ ހަލާލު ތަކެތިތޯ ޔަގީން ކުރަން ވާނެއެވެ. މުދަލާއި ފައިސާ ހޯދަން ވާނީ އެއިން ހަރަދުކުރަން ތިބި މީހުންނަށް އަޅާލުމާ އޯގާތެރިކަންވެސް ދެވޭނެ ނަމައެވެ. މުދަލާއި ފައިސާގެ ދަހިވެތިކަމުގައި އެއްމެ ކައިރީގާ ހީފާ އުޅޭ ރައްޓެހިންނަށް، ފަހުން ބޭވަފާ ވާ ފަދަ އެކުވެރިއަކަށް ނުވަމާތޯއެވެ. މުޖުމަތަމުގެ ތެރޭގައި ކުރާ މަސައްކަތްތަކުން ތިމާގެ ޖީބު ފުރާނަމަ، އެ މުޖުތަމައަށްޓަކައި ކޮންމެވެސް ކަމެއް ކޮށްދޭން ވާނެ އެވެ. މިކަންކަން މިމަގުން ނުކުރެވޭނަމަ ތިޔަ ހޯދާ މުދަލާއި ފައިސާގައި ވަނީ ގެއްލުމެވެ. ތަނަވަސްވަމުން ދާނީ ހިތާއި ސިކުނޑީގެ ނުތަނަވަސްކަމެވެ.