ޗިޕް އުފައްދާ ކުންފުނި މީޑިއާޓެކް އިން ސްމާޓްފޯންތަކަށް ސެޓްލައިޓް މުއާމަލާތް ދެ ފަރާތުން ކުރުމަށް އައު 3ޖީޕީޕީ ނޮން ޓެރެސްޓްރިއަލް ނެޓްވޯކް (އެންޓީއެން) ދައްކާލުމަށް ހަމަޖެހިފައިވާ ކަމަށް ހުކުރު ދުވަހު ބުނެފިއެވެ.
އެގޮތުން، އެންޓީއެން ޓެކްނޮލޮޖީ ދައްކާލުމަށް ހަމަޖެހިފައިވަނީ މި މަހުގެ 27 އިން އަންނަ މާރިޗް މަހުގެ 2 ގެ ނިޔަލަށް ސްޕެއިނުގެ ބާސެލޯނާގައި ކުރިއަށްދާ މޮބައިލް ވޯލްޑް ކޮންގްރެސް (އެމްޑަބްލިއުސީ) ގައެވެ.
އެންޓީއެން އަކީ ސެޓެލައިޓްތަކާއި ބިމުގައި ނޫން އެހެން އުޅަނދުތައް ބޭނުންކޮށްގެން ފަރުބަދަތަކުގެ މަތީގައި ވިޔަސް، ފަޅުތަކެއް ހުރަސްކޮށް ނުވަތަ މާކަނޑުގެ މެދުން ވިޔަސް، ކުރިން ބިމުގެ ނެޓްވޯކްތަކުން ނުފޯރާ ސަރަހައްދުތަކަށް ގުޅުން ގެނެސްދޭ މުވާސަލާތީ ޓެކްނޮލޮޖީއެކެވެ.
އަދި މިނޫނަސް، މީޑިއާޓެކްގެ ސެޓެލައިޓް ކަނެކްޓިވިޓީ އެކުލެވޭ ފުރަތަމަ ސްމާޓްފޯނުތައް ވެސް އެ ކުންފުނިން ތައާރަފްކުރުމަށް ހަމަޖެހިފައިވާއިރު، ކުރިއަށް އޮތް މަސްތަކުގައި އިތުރު ޑިވައިސްތައް ދައްކާލާނެ އެވެ.
"ސްމާޓްފޯނާއި އެހެނިހެން ޑިވައިސްތަކުގައި ދެ ފަރާތުން ސެޓެލައިޓް މުވާސަލާތު ކުރުމަކީ ކަނެކްޓިވިޓީގެ އާ ޒަމާނަކަށް ވަދެ، ތަފާތު އެތައް ވަރޓިކަލްތަކެއްގައި އާ ފުރުސަތުތަކެއް ހުޅުވިގެންދާނެ ކަމެއް،" މީޑިއާޓެކްގެ ވައިސް ޕްރެސިޑެންޓް އަދި އެ ކުންފުނީގެ ވަޔާލެސް ކޮމިއުނިކޭޝަންސްގެ ޖެނެރަލް މެނޭޖަރު ޖޭ.ސީ ސޫ ނެރުނު ބަޔާނެއްގައިވެއެވެ.
މީގެއިތުރުން، އިނގިރޭސިވިލާތުގެ މޯބައިލް ފޯން އުފައްދާ ކުންފުނި ކަމަށްވާ ބުލިޓް އާއި ގުޅިގެން ބުލިޓް ސެޓެލައިޓް ކަނެކްޓް ޕްލެޓްފޯމާ ގުޅުމަށް އެމްޓީ6825 ޗިޕްސެޓް ބޭނުންކޮށްގެން 3ޖީޕީޕީ އެންޓީއެން ޓެކްނޮލޮޖީއާއެކު ދުނިޔޭގެ ފުރަތަމަ ވިޔަފާރީގެ ގޮތުން ލިބެން ހުރި ޑިވައިސްތައް ވެސް ގެނެސްދޭނެއެވެ. އޭގެތެރޭގައި މޮޓޯރޯލާ ޑިފައި 2 އަދި ކެޓް އެސް75 ސްމާޓްފޯނުތައް ހިމެނޭނެ؛ އަދި އެންޑްރޮއިޑް އާއި އައިއޯއެސް ޑިވައިސްތައް ބުލިޓް ސެޓެލައިޓް ކަނެކްޓް ޕްލެޓްފޯމާ ގުޅޭ ކޮމްޕެކްޓް އަދި ލުއި ބްލޫޓޫތު އެކްސެސަރީއެއް ކަމަށްވާ މޮޓޯރޯލާ ޑިފައި ސެޓެލައިޓް ލިންކް ހިމެނޭނެ ކަމަށް އެ ކުންފުނިން ބުނެ އެވެ.
ބުލިޓް ސެޓެލައިޓް ކަނެކްޓްގެ ހިދުމަތުގެ ސަބަބުން ދުނިޔޭގެ އިތުރު ތަންތަނުގައި ޓޫ ވޭ ސެޓެލައިޓް މެސެޖިން އާއި ލޮކޭޝަން ޝެއަރިންގ އާއި އިމަޖެންސީ އެސްއޯއެސްގެ ހިދުމަތް ލިބިގެންދާނެ އެވެ.
އަދި ކުރިއަށް އޮތް އަހަރުތަކުގައި މީޑިއާޓެކްގެ ސެޓެލައިޓް ކޮމިއުނިކޭޝަންސް ޕޯޓްފޯލިއޯގައި 3ޖީޕީޕީ 5ޖީ ރިލީޒް 17 ސްޕެސިފިކޭޝަން (އާރު17) އަށް ބިނާކޮށް އައިއޯޓީ-އެންޓީއެން އަދި އެންއާރު-އެންޓީއެން ޓެކްނޮލޮޖީ އަށް ވެސް ފޯކަސް ކުރާނެ އެވެ.
އައިއޯޓީ-އެންޓީއެން އަކީ ލޯ ޑޭޓާ ރޭޓް ކަނެކްޝަންތަކަށް ހާއްސަކޮށް ފަރުމާކޮށްފައިވާ އެއްޗަކަށް ވާތީ މެސެޖިން އަށް ރަނގަޅު އެއްޗަކަށް ވާއިރު، އެންއާރު-އެންޓީއެން އިން ވީޑިއޯ ކޯލާއި އެހެނިހެން އެޕްލިކޭޝަންތަކަށް ސަޕޯޓް ކުރެވޭ ޑޭޓާ ރޭޓް މަތިކުރުމުގެ ފުރުސަތު ލިބޭނެ ކަމަށް އެ ކުންފުނިން ބުނެ އެވެ.