މިއީ އިބުރަތުން ފުރިގެންވާ ވާހަކައެކެވެ. މިއީ ތަރުބަވީ ގޮވަތިތަކުގައި ގިނައިން ދެކެވޭ ވާހަކައެކެވެ. މިއީ ޒުލަކަށް ވަން ބަޔަކަށް ދިމާވި ހާދިސާއަކުން ލިބިދޭ އިބުރަތްތެރި ފިލާވަޅެއްގެ ވާހަކައެވެ.

އާދޭހެވެ! މީހަކު ވަރަށް ބުރަ މަސައްކަތުން ޒުލެއް ހުޅުވިއެވެ. ތަފާތު އެކި ޖަނަވާރުތަކާއި ދޫނިސޫފާ ސޫފިތަކާއި މަސްމަހާމެހީގެ ފެންގަނޑުތަކުން އެ ޒޫ އޮތީ ފައްކާ ކޮށްފައެވެ. އަހަރުތަކެއްގެ އެ ބުރަ މަސައްކަތަށް ފަހު ހުޅުވުނު މި ޒުލުގެ ތަރުހީބު އެ އަވަށުގެ މީހުންގެ މެދުގައި ވަރަށް ކުޑައެވެ. ހަމަ އެކަކުވެސް އެ ޒުލަށް ޒިޔާރަތެއް ނުކުރެއެވެ. އޭރު އެ ޒޫ ބަލާލަން ވަނުމުގެ ފީ އަކީ ތިންސަތޭކަ ޑޮލަރެވެ.

މި އަގުގައި އެ ޒޫ ބަލަން ހަމަ އެކަކުވެސް ނުވަނުމުން، ޒޫ ބަލަން ވަނުމުގެ ފީ ކުޑަކޮށްލިއެވެ. މިފަހަރު ދުއިސައްތަ ޑޮލަރަށެވެ. މިފަހަރުވެސް ހަމަ އެކަކުވެސް ނައެވެ. ދެންވެސް ސަތޭކަ ޑޮލަރު ކަނޑާލިއެވެ. އެއާއެކު ދެން ފީއަކަށް ވީ ސަތޭކަ ޑޮލަރެވެ. ދެންވެސް އެ ޒުލަށް ޒިޔާރަތް ކުރާނޭ މީހަކު ނުވިއެވެ.

ޒުލުގެ ވެރިމީހާ މިކަމާ ދެރަވުމުގެ ބަދަލުގަައި އަައީ ރުޅިއެވެ. އެ އަވަށުގެ މީހުންދެކެ އައީ އަމަށަކު ރުޅިއެއް ނޫނެވެ. ދެން ނިކަން ނުވަދެ ހުރޭތޯ ބަލަންވެގެން ޒުލުގެ ވެރިޔާ ހެދި ވަޑާމަކީ ޒުލަށް ވަނުމުގެ ފީ އެއްކޮށް ކަނޑާލީއެވެ. މުޅިން ހިލޭ ވަދެވޭގޮތް ހެދީއެވެ. އެހިސާބުން މުޅި ޒޫ ފުރިގެން ދިޔައެވެ. އަދި އެ އަވަށުގެ ގިނަ ބަޔަކު ޒުލަށް ވަންނަން ފެށިއެވެ. ހިލޭ ލިބުމުން އެ ފުރުސަތުގެ ބޭނުން ގިނަ ބަޔަކު ހިފިއެވެ.

ރުޅި އައިސްފައި ހުރި ޒުލުގެ ވެރިޔާ ދެން ހެދި ވަޑާމަކީ ޒުލަށް ވަންނަ ގޭޓު ބަންދުކޮށް ޒުލުގެ ތެރޭގައި ތިބި މީހުންނަށް ނުނިކުމެވޭނޭހެން ޒޫ ތަޅުލީއެވެ. އެއަށްފަހު ވަލު ޖަނަވާރުތައް މަދު މަދުން ދޫކުރަމުން ދިޔައެވެ. ދެން މި ޒުލުގެ ވެރިމީހާ، ޒުލުގެ ނުކުންނަ ދޮރު ކައިރިއަށް އައިސް ބުނަމުން ދިޔައީ، ޒުލުން ނުކުތުމުގެ ފީ އަކީ ފަސްސަތޭކަ ޑޮލަރު ކަމުގައެވެ. ޒޫ ތެރޭގައި ވަލު ޖަނަވާރުތައް ދޫވެފައި ހުރުމުން ކޮންމެ ގޮތެއްވިޔަސް ޒުލުން ނުކުންނަން ޖެހޭނެތާއެވެ. ދެން ކޮންމެ މީހަކު ފަސްސަތޭކަ ޑޮލަރު ދިނުމަށްފަހު ޒުލުން ނުކުތެވެ.

އަގުބޮޑުކަމުން ޒުލަށް ނުވަދެ ތިބި މީހުން އެ ޒުލުން ނުކުންނަން ޖެހުނީ އޭރު ބޮޑު ކަމަށް ދެކުނު އަގަށްވުރެ ބޮޑު އަގެއް ދީފައެވެ. މި ވާހަކައިން ލިބޭ އިބުރަތަކީ ކޮބާ ހެއްޔެވެ؟ މި ވާހަކައިން ލިބޭ އިބުރަތަކީ ދިރިއުޅުގައި ފަހިވާ ކޮންމެ ފަސޭހަ މަގަކީ އޭގެ ނިމުން އަދި ފޮނިވެދާނެ މަގެއް ނޫންކަމެވެ. އަދި ހިލޭ ނުވަތަ ފަސޭހަ ކަމާއެކު ކުރެވޭ ކޮންމެ ކަމަކީ ހަމަ އެ ފަސޭހަ ކަމާއެކީ ނިމޭނޭ ކަމެއް ނޫންކަމެވެ. އަދި މި ދުނިޔޭގައި އެދުމެއް ނެތި ވެދުމެއް ނުކުރާނޭކަންވެސް މި ވާހަކައިން ދޭހަވެެއެވެ. އެހެންކަމުން، ދިރިއުޅުމުގައި ކުރިމަތިވާ މިފަދަ ފުރުސަތުތަކާއި މެދު ވިސްނާށެވެ! ހަލާދަނޑީގެ ދެކޮޅު ރަނގަޅަށް ބަލާށެވެ!